MAZMUR 90 - Hakcipta - Biatah Bidayuh

Surat adi Pat Mazmur 90—106 Dua Moses, Urun Tapa

¹ O TUHAN, Kaam inŭh arŭn ami tian-ti.

² Diŭ so Kaam napa dudu sandah bait napa ong, Kaam inŭh mbŭh Tapa adi tan adu adu, ka Tapa ndŭg situi tui.

³ Kaam kidaan di kieh bada pari ka asar ami; Kaam bada kieh pari jadi tana.

⁴ Siribu sawa inŭh keya ka ndi andu di Kaam; mbŭh keya ka mijah, mbŭh ripas, keya ka tika adi purok singarŭm.

⁵ Kaam mun uba taban kieh ngga bu; kieh dŭh tan tui rabis so pŭmŭh. Kieh mbŭh keya ka uduh adi timbu isan isan,

⁶ adi timbu ka rasu mirarak, komŭnŭ rayu ka kabŭs singumi andu.

⁷ Kieh dog pirabur baji Mai; kieh tikaran amai riyŭn Mai

⁸ Kaam na dosa ami di sirung jawin Mai, dosa adi kieh sukan mbŭh Kaam kiris.

⁹ Pimudip ami jadi purok da baji Mai; ka-i miyap keya ka kayuh adi dog sigayas.

¹⁰ Ju puru sawa adŭ adi kieh biyŭn — mai puru sawa, kambŭi kieh grinas; pak sopŭrŭg adi-i taban ka kieh inŭh pito ngga pinyusah; pimudip re rikas ripuan, ka kieh re mating.

¹¹ Asi mbŭh kinyam kuasa bās baji Mai? Asi puan taru anŭ adi timbur sabab riyŭn Mai?

¹² Ngajar kieh munki purok-i udip ami, isa kieh bisa jadi bijak.

¹³ Ndŭg sinde Kaam baji? Masi di urun Mai, O TUHAN!

¹⁴ Ngisi kieh barang isan ngga pinyirindu Mai adi dŭh bisa birubah, isa kieh bisa biragu ka pawŭn sitŭkŭd udip ami.

¹⁵ Bada kieh sanang nimun Kaam muko bada kieh susah di tipuh kieh bisawa sawa sangsara.

¹⁶ Bada kieh adi urun Mai, kiris pingandai bās Mai; bada sesang ami kiris bragah kuasa Mai.

¹⁷ TUHAN adi Tapa ami, isa-i berkat Mai agi ngga kieh. Bada kieh mujur darŭm sopŭrŭg pingandai ami!