MAZMUR 86 - Hakcipta - Biatah Bidayuh

Dua Mite Turung

¹ Dingah aku, TUHAN, ka nam aku, amai aku ati rumuh ka sirata.

² Nyiramat aku so pinyikabŭs, sabab aku tŭtŭd di Kaam; nyiramat aku, amai aku urun Mai adi sabah di Kaam.

³ Kaam inŭh Tapa ku, masi meh di aku; aku bidua ka Kaam ndi andu andu.

⁴ Bada urun Mai gaŭn, O TUHAN, sabab dua ku maad ka Kaam.

⁵ Kaam kana ngga kieh buang an apun kieh, puno ngga pinyirindu adi dŭh bisa birubah di sopŭrŭg daya adi bidua ka Kaam.

⁶ Dingah, TUHAN, dua ku; dingah sirŭŭn ku mite turung.

⁷ Aku bagan Kaam di tika susah, sabab Kaam nam dua ku.

⁸ Mating tapa bŭkŭn mun Kaam, O TUHAN, mating adi bŭkŭn mbŭh ndai kayuh adi Kaam mbŭh ndai.

⁹ Sopŭrŭg bangsa adi Kaam mbŭh napa re mandŭg ka mutu ubak ka Mai; ngara re muji bās Mai.

¹⁰ Kaam inŭh bikuasa ka ndai kayuh adi saruh; Kaam sadi inŭh Tapa.

¹¹ Ngajar aku, TUHAN, kayuh adi raan Mai aku ndai, ka aku re dingah pinganang Mai ngga pinyitŭtŭd; ngajar aku bituan di Kaam ngga sipuno asŭng ku.

¹² Aku re muji Kaam ngga siabo atin ku, O TUHAN adi Tapa ku; Aku re piagah bās Mai ndŭg situi tui,

¹³ Bās inŭh pinyirindu Mai di aku, adi dŭh bisa birubah! Kaam mbŭh nyiramat aku so rubang kubur.

¹⁴ Ngara adi sambuh mbŭh mandŭg di rawan aku, O Tapa; tibaran adi ganas mbŭh suba an siŭ aku — ngara adi dŭh piduri Kaam.

¹⁵ Pak Kaam, O TUHAN, inŭh Tapa adi masi buang pinyirindu, siraru sabar, siraru mandis ka tŭtŭd.

¹⁶ Kimat aku ka masi di aku; nyibake aku ka nyiramat aku, sabab aku bituan di Kaam, nimun sindŭ adŭp ku ko dawŭ-i.

¹⁷ Kiren di aku tandā sawŭ mandis Mai, TUHAN; ngara adi tiru di aku re dog pimangŭh kan ngara kiris Kaam mbŭh nggen di aku saduh ngga pinurung.