MAZMUR 81 - Hakcipta - Biatah Bidayuh

Ragu yŭn tika Gawai

¹ Nyirais amai gaŭn ka Tapa adi pingibān ta; nang ragu puji ka Tapa Jacob!

² Piguru main musik ka mambak tamburin; main musik adi kana ngga kachapi ka gambus.

³ Mambak trompet yŭn gawai di tika anak buran ngga di tika buran turak.

⁴ Ati inŭh ukum-adat di Israel, ukum so Tapa Jacob.

⁵ Ayŭh nggen-i di daya Israel di andu Ayŭh nyerang tarun tana Egypt. Aku dingah sirŭŭn adi saruh nang,

⁶ “Aku tambit pinyirabis adi bat so punok ngan; aku pirupas angān so kraja jera ngan.

⁷ Kan angān darŭm susah, angān bagan Aku, ka Aku nyiramat angān. So tarun yŭn Aku bisukan di abun adi bidudū, Aku nam angān. Aku suba angān di yŭn rubang piin Meribah.

⁸ Dingah, daya Ku, di pinyibakan Ku; Israel, mbŭh raru kana-i kambŭi angān an dingah pinganang Ku!

⁹ Angān dŭh siŭn nyambah tapa adi bŭkŭn.

¹⁰ Aku ati TUHAN adi Tapa ngan, adi taban angān ruah so Egypt. Kuka baba ngan, ka Aku re paan angān.

¹¹ “Pak daya Ku dŭh raan dingah Aku; Israel abah tunda pinganang Ku.

¹² Jadi Aku tandah ngara udip ngga atin tangek ngara ka ndai barang masam kayuh ngara raan.

¹³ Mbŭh raru kana-i kambŭi daya Ku raan dingah pinganang Ku; mbŭh raru kana-i kambŭi daya Ku raan ndai pinyiraan Ku!

¹⁴ Aku taŭn bisa rikas ngarah pinganyu ngara ka ngarah sopŭrŭg adi natang ngara.

¹⁵ Ngara adi tiru di Aku re mutu ubak ngara ka Aku darŭm taru; ukum ngara re dŭh biyŭn pinŭbŭn.

¹⁶ Pak Aku re paan angān ngga gandom adi siabo kana ka pimunos angān ngga ju banyis tarun.”