MAZMUR 79 - Hakcipta - Biatah Bidayuh

Dua Mite Pinyirupas yŭn Bangsa

¹ O Tapa, daya adi dŭh puan Kaam mbŭh nyerang tarun tana Mai. Ngara mbŭh nyembar Ramin Mai adi kudus ka mbŭh nyirubuh Jerusalem.

² Ngara tandah dudu tadang daya Mai yŭn manuk volcha, ka tadang bara urun Mai yŭn dāng tarun man.

³ Ngara piruah deya daya Mai mun piin; deya paman mun piin di barang yŭn darŭm Jerusalem, ka mating adi babŭ udip adi re tukang kubur daya kabŭs.

⁴ Bangsa bangsa adi maning tarun tana ami mijŭh kieh; ngara tawŭh kieh ka napat kieh.

⁵ TUHAN, re adu adu kah Kaam baji ngga kieh? Re adu adu mun apui kah baji Mai?

⁶ Na baji Mai di bangsa adi dŭh nyambah Kaam, di daya adi dŭh bidua ka Kaam.

⁷ Amai ngara mbŭh siŭ daya Mai; ngara mbŭh pirabur rais Mai.

⁸ Dŭhnyah ngukum kieh amai dosa tayung-babuk ami. Masi di kieh madin; sopŭrŭg pingarap ami mbŭh manyap.

⁹ Turung kieh, O Tapa, ka nyiramat kieh; pirupas kieh ka apun dosa ami amai yŭn kana stabi adŭp Mai.

¹⁰ Mani bangsa bangsa sah siken kieh, “Diki Tapa ngan?” Bada kieh kiris Kaam ngukum bangsa bangsa adi piruah deya bara urun Mai.

¹¹ Dingah sidaing bara daya-takap, ka ngga kuasa Mai pirupas ngara adi dog nggen ukum kabŭs.

¹² TUHAN, maras bangsa bangsa anŭ ju rupet amai sopŭrŭg pinganang bakit ngara adi maka Kaam.

¹³ Komŭnŭ kieh, daya Mai, adi kaban biri Mai, re adu adu nggen trima kaseh ka Kaam ka nggen puji ka Kaam ndŭg situi tui.