MAZMUR 78 - Hakcipta - Biatah Bidayuh

Tapa ngga Daya-I

¹ Dingah ajar ku, angān daya ku, ka nakit dingah kayuh nang ku.

² Aku re pakai pinganang bijak ka kidaan rusia adi so jaman jah,

³ kayuh adi kieh mbŭh dingah ka puan, kayuh adi tayung-babuk ami kidaan di kieh.

⁴ Kieh dŭh re dŭh kidaan-i di bara anak ami; kieh re kidaan di turap bauh pasar kuasa TUHAN ngga pingandai bās-I ka kayuh saruh adi Ayŭh mbŭh ndai.

⁵ Ayŭh nggen ukum-adat di daya Israel ka Pinyipesan di sesang Jacob. Ayŭh pitayan tayung-babuk ami bada ngajar ukum adat-I di bara anak ngara,

⁶ isa turap bauh dapŭd puan-i ka kidaan gŭh di bara anak ngara.

⁷ Ngga simŭnŭ ngara gŭh re na pinyabah ngara di Tapa ka dŭh kambŭt kayuh adi-I mbŭh ndai, pak siraru tunda Pinyipesan-I.

⁸ Ngara dŭh re mun tayung-babuk ngara adi an birawan ka adi dŭh an dingah pinganang, adi dŭh sukup sabah di Tapa ka adi dŭh tui tŭtŭd di Ayŭh.

⁹ Daya Ephraim, ngga bawŭh ka reja-panah ngara, bikaduh bu di andu biperang.

¹⁰ Ngara dŭh sita simanya ngara ngga Tapa; ngara abah tunda ukum adat-I.

¹¹ Ngara kambŭt kayuh adi Ayŭh mbŭh ndai, pingandai-nginga adi ngara kiris Ayŭh ndai.

¹² Di sirung jawin tayung-babuk ngara, Tapa ndai pingandai-nginga di rabak Zoan di tarun tana Egypt.

¹³ Ayŭh mire rawŭt nyinuwŭh ka taban ngara mutas-i; Ayŭh bada piin mijog di duwŭh parad mun sindung.

¹⁴ Sandu Ayŭh nguru ngara ngga abun ka ndi ngarŭm ngarŭm ngga jawa apui.

¹⁵ Ayŭh mire nyinuwŭh batuh di tarun tana-pajam ka nggen di ngara piin so yŭn tŭrŭp.

¹⁶ Ayŭh bada piin ruah so batuh ka bada piin-i paman mun sungi.

¹⁷ Pak ngara babŭ gŭh bidosa rawan Tapa, ka di tarun tana-pajam ngara rawan Ayŭh adi Sambu Sopŭrŭg.

¹⁸ Ngara saji suba Tapa, mite pinguman adi ngara raan.

¹⁹ Ngara minyu rawan Tapa ka nang, “Bisa kah Tapa nggen pinguman di tarun tana-pajam?

²⁰ Sawŭ Ayŭh mukong batuh, ka piin aman so dieh; pak tungang kah Ayŭh nggen gŭh ruti di ata ka nggen gŭh dagin, di ata adi daya-I?”

²¹ Ngapŭi meh TUHAN baji kan Ayŭh dingah ngara; Ayŭh nyerang daya-I ngga apui, ka baji-I di ngara makin bitambah,

²² sabab ngara dŭh biyŭn pinyabah di Ayŭh ka dŭh sabah nang Ayŭh re nyiramat ngara.

²³ Pak Ayŭh minyu di rangit di sambu ka mritah tiban-i da tikuka;

²⁴ Ayŭh nggen di ngara gandom so shorga, ngga manna adi Ayŭh bisor so shorga da ngara man.

²⁵ Jadi ngara man pinguman malaikat, ka Tapa nggen di ngara sopŭrŭg kayuh adi ngara raan.

²⁶ Ayŭh gŭh bada sabak so timor poh, ka ngga kuasa-I Ayŭh bagan sabak so siratan;

²⁷ ka di daya-I ayŭh pait manuk, bagŭ mun sirah sumat di tabing rawŭt;

²⁸ ngara rabu di yun tarun yŭn bibari di arong dudu bari.

²⁹ Jadi daya man ka mbŭh bisoh; Tapa nggen di ngara kayuh adi ngara raan.

³⁰ Pak kayuh adi ngara gruwŭn gibayuh ngara dapŭd ka gibabŭ man,

³¹ kan Tapa jadi baji ngga ngara ka siŭ adi siabo bake dupan ngara, dari adi siabo bake buang mara.

³² Sunggu-i simŭnŭ, ngara gibabŭ gŭh bidosa; sunggu ngara kiris pingandai nginga-I ngara gibabŭ gŭh dŭh sabah di Ayŭh.

³³ Jadi Ayŭh kadi asŭng ngara ka bada ngara rasu dog nyatŭk pinyirusag.

³⁴ Kan Ayŭh siŭ kada so ngara, adi bŭkŭn pari ka Ayŭh; ngara marik pimudip ngara pari ka Ayŭh ka bidua ngga siabo asŭng ka Ayŭh.

³⁵ Ngara ingat Tapa inŭh pinyigrindung ngara, ka adi Bisa-pŭrŭg mbŭh mandŭg di turung ngara.

³⁶ Pak pinganang ngara, sopŭrŭg-i pinganang kadong; mating adŭ kayuh adi nang ngara sawŭ.

³⁷ Ngara dŭh tŭtŭd di Ayŭh; ngara dŭh tŭtŭd di simanya ngara ngga Ayŭh.

³⁸ Pak Tapa masi di daya-I. Ayŭh apun dosa ngara ka dŭh siŭ ngara. Mbŭh siraru Ayŭh nan baji-I ka nan riyŭn-I.

³⁹ Ayŭh ingat ngara adŭ-i manusia adi bisa kabŭs, keya ka sabak adi poh ka rasu mating.

⁴⁰ Munki masam awet-i ngara rawan Ayŭh di tarun tana-pajam; mbŭh pikudu kari ngara bada Ayŭh susah!

⁴¹ Pari pari ngara suba Tapa ka kandam Tapa Kudus Israel.

⁴² Ngara kambŭt kuasa bās-I ka andu adi ngga-I nyiramat ngara so pinganyu ngara

⁴³ ka ndai pingandai bās-I ngga pingandai-nginga-I di rabak Zoan di tarun tana Egypt.

⁴⁴ Ayŭh bada piin sungi marui jadi deya, ka daya Egypt dŭh biyŭn piin re ngara nok.

⁴⁵ Ayŭh pait dudu tura ka yŭn ngara, da pijera ngara, ka dudu tigarag da pirusak tana ngara.

⁴⁶ Ayŭh pait kadis da man pimuruh ngara ka pirusak ŭmŭh ngara.

⁴⁷ Ayŭh siŭ tŭngŭn anggor ngara ngga ujen batuh ka tŭngŭn ara ngga abun adi maku.

⁴⁸ Ayŭh siŭ sapi sapi ngara ngga ujen batuh ka biri biri ngara ngga kijat.

⁴⁹ Ayŭh bada ngara raru susah Ayŭh raru baji ka magā, adi mandŭg nimun malaikat pinyikabŭs.

⁵⁰ Ayŭh dŭh nan baji-I puan kah tandah ngara udip, pak siŭ ngara ngga sesak andam.

⁵¹ Ayŭh siŭ anak anak pinuai darŭm sopŭrŭg rawang di Egypt.

⁵² Komŭnŭ Ayŭh mun pingingat-biri nguru daya-I ruah ka kingat ngara panu di tarun tana-pajam.

⁵³ Ayŭh nguru ngara ngga siramat, ka ngara dŭh taru; pak pinganyu ngara dog ngapuh rawŭt.

⁵⁴ Ayŭh taban ngara ka tarun tana-I adi kudus ka darŭd adi adŭp-I ko ngarah.

⁵⁵ Ayŭh pibu daya adi rŭŭ di tarun tana anŭ darŭm daya-I masang mŭrŭt; Ayŭh kutung tana ngara di dupan tibaran tibaran-asar Israel ka nggen ramin arŭn ngara di daya-I.

⁵⁶ Pak ngara rawan Tapa Bisa-pŭrŭg ka na Ayŭh ka darŭm pinyisuba ngara. Ngara dŭh tunda Pinyipesan-I,

⁵⁷ pak birawan ka dŭh tŭtŭd mun tayung-babuk ngara, dŭh biguna mun reja-panah adi bidikok.

⁵⁸ Ngara bada Ayŭh baji di tarun tarun yŭn bisambah adat karŭm ngara adi yŭn ngara nyambah tibudo ka kinuas Tapa.

⁵⁹ Tapa baji kan Ayŭh kiris pingandai ngara, ka Ayŭh tirawan ngara.

⁶⁰ Ayŭh tagan bari-I di Shiloh yŭn pinyirŭŭ-I di dupan ata.

⁶¹ Ayŭh tandah pinganyu ami sirapas Pati Simanya, adi tandā kuasa ngga bragah-I.

⁶² Ayŭh baji ngga daya adŭp-I ka bada ngara dog siŭ pinganyu ngara.

⁶³ Dari adi gi-mara dog siŭ darŭm biperang, ka dayung adi gi-mara mating dari re-i ndu banŭh.

⁶⁴ Imam dog siŭ ngga pedang, ka uban ngara dŭh dog nyibandar ngurid.

⁶⁵ Sikasŭn-i TUHAN burah keya ka burah so bŭŭs; Ayŭh mbŭh keya ka dari adi bake graŭh ko nok wain.

⁶⁶ Ayŭh bada pinganyu-I ngundur ka bada ngara mangŭh adu adu amai arah;

⁶⁷ Komŭnŭ Ayŭh tirawan sesang Joseph; Ayŭh dŭh mien sesang Ephraim.

⁶⁸ Pak Ayŭh mien tibaran-asar Judah ngga Sandah Zion, adi Ayŭh raru rindu.

⁶⁹ Diginŭ Ayŭh pijog Ramin-I mun yŭn pinyirŭŭ-I di shorga; Ayŭh bada-i tagap mun ong, pagŭng yŭn adu adu.

⁷⁰ Ayŭh mien urun-I David; Ayŭh tambit ayŭh so tarun tana kupai,

⁷¹ di yŭn-i nguan kaban dāng-i, ka Ayŭh bada ayŭh jadi raja Israel, pingingat daya Tapa.

⁷² David kingat jaga ngara ngga pinyitŭnggŭn ka nguru ngara ngga pinyibijak.