MAZMUR 72 - Hakcipta - Biatah Bidayuh

Dua Yŭn Raja

¹ Ngajar raja da nggen bisara nanyam ka pinŭnggŭn Mai, O Tapa; kutung ngga ayŭh pinyitŭnggŭn Mai,

² isa ayŭh mritah daya Mai ngga pinyitŭnggŭn ka nguasa ngga pinŭnggŭn daya adi dog kinanyuh.

³ Isa-i agi pimujur di tarun tana; isa-i agi pinŭnggŭn dieh.

⁴ Isa-i raja ngibān daya adi sirata; isa-i ayŭh turung daya adi dŭh biyŭn ani ani ka ngarah daya adi kinanyuh ngara.

⁵ Isa-i daya Mai nyambah Kaam sitŭkŭd batŭh andu nyekar, sitŭkŭd buran nggen jawa, darŭm tipuh barang turap manusia.

⁶ Isa-i raja keya ka ujen di ŭmŭh, keya ka ujen rabu di tana.

⁷ Isa pinŭnggŭn masang di jaman-i, ka isa-i pimujur babŭ sitadŭn buran nggen jawa.

⁸ Pritah-i re ngukap so rawŭt ndi ndŭg rawŭt andi, so Euphrates ndŭg barang bŭngŭn ong.

⁹ Daya so tarun tana-pajam re mutu ubak ngara di sirung jawin-i; ka pinganyu-i re bigawang di dabu tana.

¹⁰ Raja raja di Spain ka di purau purau re jugan pinganggen ka ayŭh; raja raja di Sheba ngga Seba re taban ka yŭn-i pinganggen.

¹¹ Sopŭrŭg raja re mutu ubak ngara di sirung jawin-i; sopŭrŭg bangsa re bituan di ayŭh.

¹² Ayŭh re pirupas daya sirata adi mite turung so ayŭh, ngga ngara adi dŭh biyŭn ani ani ka adi dog nyibireu.

¹³ Ayŭh biyŭn masi di daya adi ramah ngga adi sirata; ayŭh nyiramat asŭng ngara adi dŭh biyŭn ani ani.

¹⁴ Ayŭh pirupas ngara so dog kinanyuh ngga so pinyiganas; asŭng ngara inŭh brega di ayŭh.

¹⁵ Siramat ambu umbur tuan raja! Isa-i ayŭh dog nggen mas so Sheba; isa-i dua adu adu dog nang yŭn-i; isa-i Tapa ari nyiberkat ayŭh!

¹⁶ Isa-i gandom bagŭ di tarun tana; isa sandah puno ngga pimuruh, pisŭng mun anŭ di Lebanon. Isa-i kupo kupo puno ngga daya, keya ka tarun tana adi puno ngga kupai.

¹⁷ Isa-i dŭn raja dŭh re dog kambŭt; isa-i bragah raja tan adu adu mun batŭh andu. Isa-i sopŭrŭg bangsa mite Tapa nyiberkat ngara nimun Ayŭh mbŭh nyiberkat raja.

¹⁸ Muji meh TUHAN, adi Tapa Israel! Ayŭh sadi adŭ adi ndai pingandai bās ati.

¹⁹ Muji meh adŭn-I adi bibragah ndŭg situi tui! Isa-i bragah-I ngisi ndi ong ong. Amen! Amen!

²⁰ Ati inŭh pinŭbŭn dua David adi anak Jesse.