MAZMUR 69 - Hakcipta - Biatah Bidayuh

Dua Mite Turung

¹ Nyiramat aku, O Tapa! Piin mbŭh ndŭg tungo ku;

² Aku timŭtŭm di tawang adi tŭrŭp, ka diginŭ mating tana riang; aku mbŭh di piin tŭrŭp, ka girumbang mbŭh re pirŭnggŭd aku.

³ Aku mbŭh kawŭk bagan mite turung, ka gungong ku mbŭh mandam. Aku mbŭh bada batŭh ku pide, kajŭn Kaam turung.

⁴ Ngara adi tiru di aku ngga dŭh biyŭn pada agi bagŭ dŭ so sirah ubok ku. Pinganyu ku kidaan pinganang kadong rawan aku; ngara bake ka raan siŭ aku. Ngara bada aku pari kayuh adi aku dŭh naku.

⁵ Dosa ku, O Tapa, inŭh tatŭng di batŭh Mai; Kaam puan munki masam budo aku tian-ti.

⁶ Dŭhnyah bada aku nggen mangŭh di ngara adi sabah di Kaam, TUHAN Raja adi Bisa-pŭrŭg! Dŭhnyah bada aku nggen mangŭh di ngara adi nyambah Kaam, O Tapa Israel!

⁷ Amai Kaam inŭh aku dog pimangŭh ka aku mbŭh raru mangŭh.

⁸ Aku mbŭh keya ka daya saruh di dupan bara madis ku, mun daya tami di rawang ku.

⁹ Pinyirindu ku di Ramin Mai bijagu keya ka apui darŭm aku; pinganang pimangŭh adi maka Kaam mbŭh rabu nyatŭk aku.

¹⁰ Aku pirapat adŭp ku ngga bipusa, ka daya pimangŭh aku;

¹¹ aku kasŭk piraka daya ngurid, ngara tawŭh aku.

¹² Ngara minyu pasar aku di aran passar, ngara adi mabuk ndai ragu pasar aku.

¹³ Pak aku, aku re bidua ka Kaam, TUHAN; nam aku, Tapa, di tika adŭp Mai mien. Nam aku sabab pinyirindu bās Mai, sabab Kaam ingat janji Mai an nyiramat.

¹⁴ Nyiramat aku so timŭtŭm di tawang; bada aku siramat so pinganyu ku, siramat so piin adi tŭrŭp.

¹⁵ Dŭhnyah bada uba ngapuh aku; dŭhnyah bada aku rŭnggŭd di yŭn tŭrŭp puan kah mŭrŭt rubang kubur.

¹⁶ Nam aku, TUHAN, ngga mandis pinyirindu Mai adi dŭh bisa birubah; ngga masi bās Mai kimat aku!

¹⁷ Dŭhnyah sukan adŭp Mai so urun Mai; aku ati darŭm susah bās — nam aku madin!

¹⁸ Mandŭg ka aku ka nyiramat aku; pirupas aku so pinganyu ku.

¹⁹ Kaam puan munki aku dog pimangŭh, munki aku dog kinarap ka dŭh dog stabi; Kaam kiris sopŭrŭg pinganyu ku.

²⁰ Pinganang pimangŭh mbŭh kandam atin ku, ka aku mbŭh jimŭ. Aku harap di pinyirasi, pak mating; di saduh, pak mating.

²¹ Kan aku sibŭrŭk, ngara nggen di aku rasun; kan aku badŭh asŭng, ngara nggen di aku suka'.

²² Isa-i gawai ngara pirabur ngara; isa-i gawai kudus ngara pirabu ngara.

²³ Bada ngara karak! Bada punok ngara ari ramah!

²⁴ Bada baji Mai nyatŭk ngara; ka baji Mai nakap ngara.

²⁵ Isa-i bari bari ngara dog tagan; isa-i ndi naan mating gŭh dŭm udip di bari bari ngara.

²⁶ Ngara kisiis ngara adi Kaam mbŭh ngukum; ngara minyu pasar sangsara ngara adi Kaam mbŭh bada biragan.

²⁷ Nuris sopŭrŭg dosa ngara; dŭhnyah bada ngara sua darŭm pinyiramat Mai.

²⁸ Isa-i dŭn ngara dog kadi so surat di yŭn dŭn bara daya adi Kaam mbŭh mien dog nuris; isa-i ngara dŭh dog pibŭrŭt di susud dŭn bara daya Mai.

²⁹ Pak aku mandam ka jimŭ; pakat aku, O Tapa, ka nyiramat aku!

³⁰ Aku re muji Tapa ngga ragu; aku re piagah bās-I ngga nggen trima kaseh.

³¹ Ati re pimunos asŭng TUHAN rabis so jugan sapi ka Ayŭh, rabis so sadis dari sapi adi sukup tuuh.

³² Kan daya adi dog kinanyuh kiris ati, ngara re gaŭn; ngara adi nyambah Tapa re dog ngatat.

³³ TUHAN dingah ngara adi sirata ka dŭh kambŭt daya-I di jer.

³⁴ Muji meh Tapa, O rangit ngga ong, rawŭt ngga sopŭrŭg adi udip dieh.

³⁵ Ayŭh re nyiramat Jerusalem ka pari pijog kupo kupo Judah. Bara daya-I re rŭŭ diginŭ ka dapu tana anŭ;

³⁶ bara sesang urun-I re sua dapu-i, ka ngara adi rindu Ayŭh re rŭŭ diginŭ.