MAZMUR 66 - Hakcipta - Biatah Bidayuh

Ragu Puji ngga Trima Kaseh

¹ Muji meh Tapa ngga sirais gaŭn, sopŭrŭg daya!

² Biragu yŭn bragah adŭn-I; jugan ka Ayŭh bragah puji!

³ Nang di Tapa, “Munki masam saruh kayuh adi Kaam ndai! Kuasa Mai inŭh raru bās ndŭg ka pinganyu Mai mutu darŭm taru di sirung jawin Mai.

⁴ Sopŭrŭg daya di ong nyambah Kaam; ngara biragu muji Kaam, ngara biragu muji adŭn Mai.”

⁵ Mandŭg ka tingga kayuh adi Tapa mbŭh ndai, pingandai saruh-I yŭn manusia.

⁶ Ayŭh marik rawŭt da jadi deyŭh; tayung-babuk ta panu kaja mutas sungi. Diginŭ kieh gaŭn sabab kayuh adi-I ndai.

⁷ Ayŭh mritah ndŭg situi tui ngga kuasa-I ka kingat bangsa bangsa ngga batŭh-I. Manyah meh daya arap makat rawan Ayŭh.

⁸ Muji meh Tapa ta, sopŭrŭg bangsa; bada puji ngan dog dingah.

⁹ Ayŭh bada ata babŭ udip ka dŭh bada ata rabu.

¹⁰ Kaam mbŭh suba kieh, Tapa; nimun pirak dog pibisig ngga apui simŭnŭ gŭh Kaam ngga kieh.

¹¹ Kaam bada kieh dog pirakap ka nggen di kieh pinyirabis adi raru bat.

¹² Kaam bada pinganyu ami digang ubak ami; kieh sangsara keya ka dog apui ngga uba, pak madin Kaam mbŭh taban kieh ka tarun yŭn adi siramat.

¹³ Aku re taban sadis badang ka ramin Mai; aku re jugan ka Kaam kayuh adi aku mbŭh bijanji ngga Kaam.

¹⁴ Aku re nggen di Kaam kayuh adi aku nang aku an nggen di tika aku darŭm susah.

¹⁵ Aku re jugan biri yŭn badang di mija-sambah; aku re nyadis dari sapi ngga kambing, ka asuh-i re maad ka rangit.

¹⁶ Mandŭg ka dingah, sopŭrŭg ngan adi stabi di Tapa, ka aku re kidaan di angān kayuh adi-I mbŭh ndai yŭn ku.

¹⁷ Aku bagan mite turung so Ayŭh; aku muji Ayŭh ngga ragu.

¹⁸ Kambŭi aku dŭh mbit bat pasar dosa ku, TUHAN manŭn dŭh re dingah aku.

¹⁹ Pak Tapa taŭn sawŭ agi dingah aku; Ayŭh dingah dua ku.

²⁰ Aku muji Tapa, sabab Ayŭh dŭh turak dua ku puan kah kadi so aku pinyirindu-I adi dŭh bisa birubah.