MAZMUR 63 - Hakcipta - Biatah Bidayuh

Jabŭng di Tapa

¹ O Tapa, Kaam inŭh Tapa ku, aku jabŭng di Kaam. Pimudip ku ati gruwŭn Kaam; keya ka tarun tana adi badŭh, baruh ka nyirengas, simangi ku badŭh asŭng di Kaam.

² Bada aku kiris Kaam di yŭn pinyirŭŭ Mai; bada aku kiris munki bikuasa ka bibragah-i Kaam.

³ Pinyirindu Mai adi dŭh bisa birubah taŭn-i rabis kana so pimudip, ngapŭi aku re muji Kaam.

⁴ Aku re nggen trima kaseh di Kaam sitŭkŭd aku udip; aku re pakat tangan ku ka Kaam darŭm bidua.

⁵ Simangi ku re di biruman ka munos, ka aku re nang ragu puji adi gaŭn ka Kaam.

⁶ Darŭm aku guring, aku ingat Kaam; ndi ngarŭm ngarŭm aku pikir Kaam,

⁷ sabab Kaam mbŭh ari turung aku. Di sayung ribo urad Mai aku biragu amai gaŭn.

⁸ Aku bidigŭng tagap di Kaam, ka tangan Mai bada aku pagŭng.

⁹ Ngara adi suba an siŭ aku re mūn ka ong daya adi mbŭh kabŭs.

¹⁰ Ngara re dog siŭ darŭm biperang, ka tadang ngara dog man kasong tarun.

¹¹ Sabab Tapa nggen di ngara pimanang, raja re gaŭn. Ngara adi bijanji ngga adŭn Tapa re muji Ayŭh, pak baba bara pingadong re dog mapot.