MAZMUR 57 - Hakcipta - Biatah Bidayuh

Dua Pite Turung

¹ Masi di aku, O Tapa, masi di aku, sabab aku mandŭg ka Kaam yŭn pinyiramat. Di sayung ribo urad Mai aku dapŭd pinyigrindung ndŭg ka sabak ribut adi bangat mbŭh saya.

² Aku bagan Tapa, adi Sambu Sopŭrŭg, Tapa adi nggen sopŭrŭg kayuh adi aku biguna.

³ Ayŭh re nam aku so shorga ka nyiramat aku; Ayŭh ngarah ngara adi kinanyuh aku. Tapa re kiren di aku pinyirindu ngga pinyitŭtŭd-I adi dŭh bisa birubah.

⁴ Aku dog kirurung bara pinganyu, adi keya ka singah sikirau an man dagin manusia. Jipŭh ngara keya ka jarok ngga reja-panah; jura ngara keya ka pedang adi reja.

⁵ Kiren bās Mai di rangit, O Tapa, ngga bragah Mai di ndi ong ong.

⁶ Pinganyu ku mbŭh pasang jaring ngga nakap aku; aku mbŭh raru susah. Ngara kareh rubang di aran ku, pak adŭp ngara rabu dieh.

⁷ Aku biyŭn sukup atin sabah, O Tapa; aku re biragu ka kibās Kaam!

⁸ Makat, simangi ku! Makat, kachapi ngga gambus ku! Aku re kies batŭh andu.

⁹ Aku re nggen trima kaseh di Kaam, O TUHAN, di dupan barang bangsa. Aku re muji Kaam di dupan barang daya.

¹⁰ Pinyirindu Mai adi dŭh bisa birubah mbŭh ndŭg rangit; pinyitŭtŭd Mai mbŭh ndŭg abun adi bigatung.

¹¹ Kiren bās Mai di rangit, O Tapa, ka bragah Mai di ndi tarun tana.