MAZMUR 55 - Hakcipta - Biatah Bidayuh

Dua Daya adi Dog Jua dingan

¹ Dingah dua ku, O Tapa; dŭhnyah abah nyiringa pimite ku!

² Dingah aku ka nam aku; aku mbŭh raru jera da susah ku.

³ Aku raru taru amai pinganyu ku natang aku, aku randŭk dog kinanyuh daya adi ginaka. Ngara taban pinyusah ka aku; ngara baji di aku ka tiru di aku.

⁴ Aku raru taru, ka jawin pinyikabŭs pirandŭk aku.

⁵ Aku mbŭh taru buang kimŭtŭr; aku mbŭh tikaran.

⁶ Kambŭi bisa, aku raan biyŭn urad, mun manuk asang. Aku mikabur bu di jiroh yŭn rŭŭ-paya.

⁷ Aku mikabur ka tarun jo ka piramin di tarun tana-pajam.

⁸ Aku bisa rikas dapŭd bari yŭn adŭp ku ngga tak adŭp ku so sabak ribut adi bangat.

⁹ Bada riruk pinganang pinganyu ku, O TUHAN! Aku kiris pinyiganas ka pito darŭm kupo,

¹⁰ kirurung-i sandu singarŭm, ngisi-i ngga sarah ngga pito.

¹¹ Agi pinyirusag di barang yŭn; aran raya mbŭh puno ngga kraja pingandai kinanyuh ngga tipu.

¹² Kambŭi-i pinganyu ku adi napat aku, aku dapŭd nyijŭn; kambŭi-i pinganyu ku mingangŭn di tunduh aku, aku bisa sukan adŭp ku so ayŭh.

¹³ Pak-i kuu, adi ayō ku, adi dingan ku ka adi jerā rapat ku.

¹⁴ Ata mbŭh ari kirakar dupan adŭp ta ka samah nyambah darŭm ramin TUHAN.

¹⁵ Isa-i bara pinganyu ku kabŭs diŭ so tipuh-i; isa-i ngara gibabŭ udip darŭm ngara mūn ka sibayan. Ramin arŭn ngara ngga atin ngara inŭh puno ngga arap.

¹⁶ Pak aku bagan TUHAN Tapa yŭn mite turung, ka Ayŭh re nyiramat aku.

¹⁷ Isan isan, kumbeng, ka singarŭm aku ngadu ngga nyidaing, Ayŭh dingah aku; Ayŭh re dingah sirŭŭn ku.

¹⁸ Ayŭh re tambit aku pari ngga siramat so perang ku ngga so bara pinganyu ku adi raru bagŭ.

¹⁹ Tapa, adi mbŭh mritah so ndun jah, re dingah aku ka ngarah ngara; amai ngara abah birubah, ka ngara dŭh taru Ayŭh.

²⁰ Dingan ku adi dawŭ nyerang dingan-i; ayŭh kadong janji-i.

²¹ Pinganang-i ruai nang nyibanyis, pak atin-i puno ngga tiru; pinganang-i nyarap keya ka inyo, pak-i kapŭg mun pedang adi reja.

²² Pasan pinyusah mu di TUHAN, ka Ayŭh re ngibān kuu; Ayŭh dŭh re bada daya adi jujur dog ngarah.

²³ Pak Kaam, O Tapa, re taban pinyiŭ ngga daya pingadong anŭ ka darŭm kubur ngara sibayuh ngara ndŭg rapŭt umbur. Ka aku ati, aku re sabah di Kaam.