MAZMUR 51 - Hakcipta - Biatah Bidayuh

Dua Mite Apun

¹ Masi di aku, O Tapa, sabab pinyirindu Mai adi dŭh bisa birubah. Sabab masi bās Mai taran dosa ku!

² Musor sopŭrŭg arap ku ka bada aku bisig so dosa ku!

³ Aku natŭng sarah ku; ka ari rada dosa ku.

⁴ Aku mbŭh bidosa rawan Kaam — rawan Kaam adŭ — ka mbŭh ndai anŭ adi Kaam nang arap. Ngapŭi Kaam batur kan Kaam nyarah aku; Kaam inŭh tŭnggŭn darŭm Kaam ngukum aku.

⁵ Aku ati arap so andu aku dog biranak; so aku di darŭm tain, aku mbŭh bidosa.

⁶ Atin tŭnggŭn ngga pinyawŭ inŭh adi raan Mai kiris; ngisi pikir ku ngga pinyibijak Mai.

⁷ Kadi dosa ku, ka aku re bisig; musor aku, ka aku re rabis buda so salju.

⁸ Bada aku dingah pawŭn ngga pinyigaŭn; ka sunggu Kaam mbŭh pirandŭk aku ka mata turang ku, aku re gaŭn dinge.

⁹ Dŭhnyah tingga dosa ku pak taran sopŭrŭg arap ku.

¹⁰ Ndai atin bisig di aku, O Tapa, ka bada aku tŭtŭd dinge.

¹¹ Dŭhnyah bada aku miyap so yŭn Mai; dŭhnyah kadi roh kudus Mai so aku.

¹² Nggen di aku dinge pinyigaŭn adi mandŭg so pinyiramat Mai, ka bada aku raan tunda pinganang Mai.

¹³ Komŭnŭ aku re ngajar pesan Mai di ngara adi bidosa, ka ngara re pari ka Kaam.

¹⁴ Dŭhnyah bada aku kabŭs, O Tapa, ka nyiramat aku, ka aku re ngga atin gaŭn piagah pinŭnggŭn Mai.

¹⁵ Turung aku minyu, TUHAN, ka aku re kibās Kaam.

¹⁶ Kaam dŭh raan sadis, kambŭi aku jugan-i, Kaam dŭh re munos asŭng dieh; Kaam dŭh munos asŭng di sadis badang.

¹⁷ Sadis ku inŭh atin rapat ku, O Tapa; Kaam dŭh re tirawan atin rapat ngga atin ku adi raan marik pimudip ku pari ka Kaam.

¹⁸ O Tapa, mandis ngga Zion ka turung-i; pari pijog sindung Jerusalem.

¹⁹ Komŭnŭ Kaam re munos asŭng di sadis adi batur ka di sadis badang ami; ka dari dari sapi re dog nyadis di tunduh mija-sambah Mai.