MAZMUR 48 - Hakcipta - Biatah Bidayuh

Zion, Kupo Tapa

¹ TUHAN inŭh bās ka patut bana dog kibās di kupo bās Tapa ta, di tunduh sandah kudus-I.

² Zion, sandah Tapa, inŭh bigatung ka sangŭn; kupo raja bās taban pawŭn di ndi ong ong.

³ Tapa mbŭh kiren nang pinyipagŭng agi ngga Ayŭh di darŭm kuta kupo anŭ.

⁴ Bara raja samah tikuruk ka mandŭg di nyerang Sandah Zion.

⁵ Pak kan ngara kiris-i, ngara mbŭh nginga; ngara taru ka bikaduh bu.

⁶ Ngara mbŭh raru taru buang susah, mun dayung aŭn re ruwan anak-i,

⁷ mun kapar rusak dog maka sabak ribut.

⁸ Kieh mbŭh dingah kayuh adi Tapa mbŭh ndai, ka madin kieh mbŭh kiris-i di kupo Tapa ta, TUHAN adi Bisa-pŭrŭg; Ayŭh re bada kupo anŭ siramat adu adu.

⁹ Di darŭm Ramin Mai, O Tapa, kieh pikir pasar pinyirindu Mai adi dŭh bisa birubah.

¹⁰ Kaam dog kibās daya di barang yŭn, ka adŭn Mai dog kibās di ndi ong ong. Kaam mritah ngga pinyitŭnggŭn;

¹¹ bada daya Zion gaŭn! Itong Mai batur jeja ka arap kana manusia; bada pinyigaŭn agi di kupo kupo Judah!

¹² Daya Tapa, panu nganing Zion ka mirang dudu tawā;

¹³ pirati sindung sindung samŭn piruh dudu kuta, isa angān bisa kidaan di turap adi re:

¹⁴ “Tapa ati inŭh Tapa ta ndŭg situi tui; Ayŭh re adu adu nguru ata.”