MAZMUR 44 - Hakcipta - Biatah Bidayuh

Dua Mite Pinyigrindung

¹ Ngga kajit ami kieh mbŭh dingah, O Tapa. Tayung-babuk ami mbŭh kidaan di kieh, pasar kayuh bās adi Kaam mbŭh ndai di jaman ngara, ndun jah:

² simuki adŭp Mai pibu daya adi dŭh puan Kaam ka piguru daya Mai di tarun tana ngara; simuki Kaam ngukum bangsa bangsa adi bŭkŭn ka bada tung adŭp Mai mujur.

³ Daya Mai dŭh ngarah tarun tana anŭ ngga pedang; ngara dŭh dapŭd-i ngga kuasa adŭp ngara; pak ngga kuasa ka pinyibake Mai, ngga Kaam adi sawŭ agi ngga ngara, adi kiren Kaam rindu ngara.

⁴ Kaam inŭh raja ku ka Tapa ku; Kaam nggen pimanang di daya Mai,

⁵ ka ngga kuasa Mai kieh ngarah pinganyu ami.

⁶ Aku dŭh sabah di bawŭh panah ku puan kah di pedang ku ngga nyiramat adŭp ku;

⁷ pak Kaam mbŭh nyiramat kieh so bara pinganyu ami ka ngarah ngara adi tiru di kieh.

⁸ Kieh re ari muji Kaam ka nggen trima kaseh di Kaam adu adu.

⁹ Pak madin Kaam mbŭh tirawan kieh ka tandah kieh dog ngarah; Kaam mbŭh dŭh tia ruah baris ngga bara soldadu ami.

¹⁰ Kaam bada kieh bikaduh bu so pinganyu ami, ka ngara tambit yŭn adŭp ngara kayuh adi kieh dapu.

¹¹ Kaam tandah kieh dog ninong keya ka biri; Kaam bada kieh papar sasah di rais tami.

¹² Kaam jua daya Mai ngga rega adi sŭ; rah-i ngara dŭh brega.

¹³ Bara rasū ami kiris kayuh adi mbŭh Mai ndai di kieh, ka ngara nyirimbe ka tawŭh kieh.

¹⁴ Kaam mbŭh bada kieh jadi kayuh rubi di dupan bangsa bangsa; ngara kuting ubak ngara ngga tiru.

¹⁵ Aku mangŭh barang andu; raŭn ku bireh bada mangŭh

¹⁶ amai pinganang ngamun ngga bakit so pinganyu ku ngga ngara adi tiru di aku.

¹⁷ Sopŭrŭg kayuh ati mbŭh jadi di kieh, sunggu kieh dŭh kambŭt Kaam puan kah miranggar simanya adi Kaam mbŭh ndai ngga kieh.

¹⁸ Kieh bŭn dŭh tŭtŭd di Kaam; kieh bŭn nyibireu pesan Mai.

¹⁹ Pak Kaam tagan kieh adi rumuh di dupan dāng tarun; Kaam tagan kieh di darŭm karŭm patŭ'.

²⁰ Kambŭi kieh mbŭh dŭh tia nyambah Tapa ami, ka bidua ka tapa saruh,

²¹ Kaam tatu mbŭh tui puan, sabab Kaam puan pikir-kira ami adi bisukan.

²² Pak sitagar Kaam inŭh kieh marar dog siŭ, ngga bada kieh keya ka biri adi re dog ninong.

²³ Makat, TUHAN! Mani Kaam bŭŭs? Makat meh! Dŭhnyah tirawan kieh adu adu!

²⁴ Mani Kaam bisukan so kieh? Dŭhnyah kambŭt sangsara ngga pito ami!

²⁵ Kieh rabu ka asur di tana; ka guring di tana mbŭh arah.

²⁶ Mandŭg di turung kieh! Sabab pinyirindu Mai adi dŭh bisa birubah nyiramat kieh!