MAZMUR 41 - Hakcipta - Biatah Bidayuh

Dua Mite Bua so Andam

¹ Sanang inŭh ngara adi mbit bat daya sirata; TUHAN re turung ngara kan ngara dog susah.

² TUHAN re grindung ngara ka kudip ngara; Ayŭh re bada ngara sanang di tarun tana ati; Ayŭh dŭh re tagan ngara ka darŭm tangan pinganyu ngara.

³ TUHAN re turung ngara kan ngara mandam ka re pibua ngara.

⁴ Aku nang, “Aku mbŭh bidosa rawan Kaam TUHAN; masi di aku ka pibua aku.”

⁵ Pinganyu ku nang pinganang arap pasar aku. Ngara raan aku kabŭs ka dog kambŭt.

⁶ Ngara adi mandŭg ka yŭn ku dŭh bisa dog sabah; ngara nguruk agah arap pasar aku ka komŭnŭ pigarau-i di barang yŭn.

⁷ Sopŭrŭg adi tiru di aku sigayas dupan adŭp ngara pasar aku, ngara pikir kayuh arap pasar aku.

⁸ Ngara nang, “Ayŭh bana birandam; Ayŭh dŭh re tia tungang makat so ambok.”

⁹ Ndŭg ka jerā ku adi ruai aku sabah, sianŭ adi ndi tubi kudos ngga aku, mbŭh rawan aku.

¹⁰ Masi di aku, TUHAN, ka pibua aku, ka aku re maras pinganyu ku.

¹¹ Ngara dŭh re tungang ngarah aku, ka aku re puan nang Kaam munos asŭng di aku.

¹² Kaam re turung aku, sabab aku ndai kayuh adi batur; Kaam re bada aku agi ngga adŭp Mai adu adu.

¹³ Puji ka TUHAN, adi Tapa Israel! Muji Ayŭh madin ka ndŭg situi tui! Amen! Amen!