MAZMUR 40 - Hakcipta - Biatah Bidayuh

Ragu Puji

¹ Aku ngga atin tŭtŭd kajŭn TUHAN turung; komŭnŭ Ayŭh dingah aku ka dingah sirŭŭn ku.

² Ayŭh tarik aku so rubang adi arap, so tana-musōb. Ayŭh piguru aku di tunduh batuh ngga siramat ka bada aku pagŭng.

³ Ayŭh ngajar aku nang ragu bauh, ragu puji ka Tapa ta. Bagŭ adi kiris kayuh ati re taru ka re sabah di TUHAN.

⁴ Sanang inŭh ngara adi sabah di TUHAN, adi dŭh nyambah tibudo puan kah tunda ngara adi nyambah tapa-kadong.

⁵ Kaam mbŭh ndai bagŭ kayuh yŭn ami, O TUHAN Tapa ami; mating adi bŭkŭn re mun Kaam! Kaam mbŭh ndai bagŭ pusar adi kana yŭn ami. Aku dŭh dapŭd re nyuse sopŭrŭg-i amai-i raru bagŭ!

⁶ Kaam dŭh raan sadis ngga sadis ruwang kayuh; Kaam dŭh mite dāng adi mŭrŭng dog badang di tunduh mija-sambah puan kah sadis adi ngga taran dosa. Pak, Kaam mbŭh nggen di aku kajit ngga dingah Kaam,

⁷ ka aku meh nam, “Ta digiti aku; ajar Mai yŭn ku agi di darŭm surat Ukum-adat.

⁸ Aku rindu ndai pinyiraan Mai, Tapa ku! Aku nyikŭn ajar Mai darŭm atin ku.”

⁹ Di tika daya Mai tikuruk, TUHAN, aku kidaan agah kana pasar Kaam nyiramat kieh. Kaam puan aku dŭh re ko kidaan-i.

¹⁰ Aku dŭh pajam pasar agah pinyiramat anŭ; aku ari minyu pasar pinyitŭtŭd ngga pinurung Mai. Di tika daya Mai tikuruk aku bŭn pajam pasar pinyitŭtŭd ngga pinyirindu Mai adi dŭh bisa birubah.

¹¹ TUHAN, aku puan Kaam dŭh re ko masi di aku. Pinyirindu ngga pinyitŭtŭd Mai re ari bada aku siramat.

Dua Mite Turung

¹² Aku dog kirurung bagŭ pinyusah — raru bagŭ re nŭŭh mirang! Dosa ku mbŭh nyandat aku, ka aku mbŭh dŭh tia dapŭd kiris; ka-i rabis bagŭ so sirah ubok di ubak ku, ka pinyipagan ku mbŭh mating.

¹³ Nyiramat aku, TUHAN! Turung aku madin!

¹⁴ Isa-i ngara adi suba an siŭ aku batur dog ngarah ka riruk. Isa-i ngara adi gaŭn sabab susah ku ngundur ka mangŭh.

¹⁵ Isa-i ngara adi nyirimbe aku gŭgŭh amai mbŭh arah.

¹⁶ Isa-i sopŭrŭg adi mandŭg ka yŭn Mai gaŭn ka pawŭn. Isa-i sopŭrŭg adi munos asŭng amai pinyiramat Mai siraru nang, “Munki masam bās-i TUHAN!”

¹⁷ Aku ramah ka sirata, O TUHAN, pak Kaam dŭh kambŭt aku. Kaam inŭh pinyikudip ku ka Tapa ku — rikas turung aku!