MAZMUR 34 - Hakcipta - Biatah Bidayuh

Muji Pinyikana Tapa

¹ Aku re ari nggen trima kaseh ka TUHAN; aku dŭh re ko muji Ayŭh.

² Aku re muji Ayŭh yŭn kayuh adi mbŭh-I ndai; isa-i sopŭrŭg adi dog kinanyuh dingah ka gaŭn!

³ Piagah ngga aku bās TUHAN; ja ata samah muji adŭn-I.

⁴ Aku bidua ka TUHAN, ka Ayŭh nam aku; Ayŭh pirupas aku so sopŭrŭg taru ku.

⁵ Adi dog kisiis nyigura ka Ayŭh, ka mbŭh gaŭn; ngara dŭh re asa.

⁶ Adi sirata bagan Ayŭh, ka Ayŭh nam; Ayŭh nyiramat ngara so sopŭrŭg susah ngara.

⁷ Malaikat-I kingat ngara adi stabi di TUHAN ka pirupas ngara so pinyusah.

⁸ Adŭp ngan kira munki kana-i TUHAN. Sanang inŭh ngara adi mbŭh siramat darŭm Ayŭh.

⁹ Stabi di TUHAN, sopŭrŭg daya-I; ngara adi dingah pinganang-I re dapŭd sopŭrŭg adi ngara biguna.

¹⁰ Ndŭg ka singah re sibŭrŭk amai pinguman dŭh sadang, pak ngara adi tunda pinganang TUHAN dŭh re kurang kayuh.

¹¹ Mandŭg bara jerā ku adi mara, ka dingah aku, ka aku re ngajar angān stabi di TUHAN.

¹² Raan kah angān udip sanang? Raan kah angān udip tui ngga udip sanang?

¹³ Dŭhnyah garang piruah pinganang arap ka pinganang kadong.

¹⁴ Pijo adŭp ngan so arap ka ndai kayuh kana; jiroh damai ngga sipuno atin ngan.

¹⁵ TUHAN nyibatŭh daya adi tŭnggŭn ka dingah sien ngara;

¹⁶ pak Ayŭh matah ngara adi ndai arap, isa kan ngara kabŭs, ngara rikas dog kambŭt.

¹⁷ Daya adi tŭnggŭn bagan TUHAN, ka Ayŭh dingah; Ayŭh pirupas ngara so sopŭrŭg susah ngara.

¹⁸ TUHAN sindŭk ngara adi dog pijimŭ; Ayŭh nyiramat ngara adi manyap pingarap.

¹⁹ Daya adi kana sangsara amai pinyusah, pak TUHAN pirupas ngara so sopŭrŭg-i;

²⁰ TUHAN bandar grindung ngara; ndi mating gŭh turang ngara pata.

²¹ Daya ginaka re kabŭs sabab arap ngara. Ngara adi tiru di daya tŭnggŭn re dog ukum.

²² TUHAN re nyiramat daya-I; ngara adi di ka yŭn-I yŭn pinyigrindung re siramat.