MAZMUR 29 - Hakcipta - Biatah Bidayuh

Sirŭŭn TUHAN darŭm Sabak Ribut

¹ Muji TUHAN, angān bara di shorga; muji bragah ngga kuasa-I.

² Muji adŭn bragah TUHAN; mutu di sirung jawin Ayŭh adi Kudus kan Ayŭh nandŭng.

³ Sirŭŭn TUHAN dog dingah di rawŭt; Tapa adi bibragah bidudū, ka angū sirŭŭn-I dog dingah di rawŭt.

⁴ Sirŭŭn TUHAN dog dingah puno ngga kuasa ngga bragah.

⁵ Sirŭŭn TUHAN mata tŭngŭn tŭngŭn kayuh sedar, ndŭg ka tŭngŭn kayuh sedar di Lebanon.

⁶ Ayŭh bada darŭd darŭd di Lebanon mirajok mun anak sapi ka bada Darŭd Hermon mirupat mun anak dari sapi.

⁷ Sirŭŭn TUHAN bada kijat mikirab.

⁸ Sirŭŭn-I bada tarun tana-pajam biguyut; Ayŭh ngugoh tarun tana-pajam Kadesh.

⁹ Sirŭŭn TUHAN ngugoh tŭngŭn kayuh oak ka pirabu dawŭn dawŭn kayuh sitadŭn barang naan daya di Ramin TUHAN nyirais nang, “Bragah ka Tapa!”

¹⁰ TUHAN mritah rawŭt tŭrŭp; Ayŭh mritah nimun raja adu adu.

¹¹ TUHAN nggen pinyibake di daya-I ka nyiberkat ngara ngga pimudip sanang.