MAZMUR 27 - Hakcipta - Biatah Bidayuh

Dua Puji

¹ TUHAN inŭh jawa ku ka pinyiramat ku; aku dŭh re taru asi asi. TUHAN grindung aku so sopŭrŭg pinyusah; aku dŭh re taru.

² Kan daya arap nyerang aku ka suba an siŭ aku, ngara sikak ka rabu.

³ Sunggu kambŭi bara soldadu kirurung aku, aku dŭh re taru; sunggu kambŭi bara pinganyu nyerang aku, aku re babŭ sabah di Tapa.

⁴ Aku mbŭh mite ndi kayuh so TUHAN; ndi kayuh adŭ raan ku: rŭŭ di ramin TUHAN sitŭkŭd udip ku, nyaksi pinyikana-I, ka mite pinyiruton so Ayŭh.

⁵ Di tipuh pinyusah Ayŭh re grindung aku; Ayŭh re bada aku siramat di Ramin-I ka bada aku pagŭng di tunduh batuh adi bigatung.

⁶ Jadi aku re manang ngarah bara pinganyu ku adi kirurung aku. Ngga sirais gaŭn aku re jugan sadis di Ramin-I; aku re biragu, aku re muji TUHAN.

⁷ Dingah aku, TUHAN, kan aku bagan Kaam! Masi di aku ka nam aku!

⁸ Kan Kaam nang, “Mandŭg ka nyambah Aku,” aku nam, “Aku re mandŭg, TUHAN;

⁹ dŭhnyah sukan adŭp Mai so aku!” Dŭhnyah baji di aku; dŭhnyah pibu urun Mai. Kaam inŭh pinurung ku; dŭhnyah tingge aku, dŭhnyah tagan aku, O Tapa, adi pinyikudip ku.

¹⁰ Sindŭ sama ku kadŭ re tagan aku, pak TUHAN re kingat aku.

¹¹ Ngajar aku, TUHAN, kayuh adi raan Mai aku ndai, ka nguru aku kadŭg aran adi siramat, sabab aku biyŭn bagŭ pinganyu.

¹² Dŭhnyah tagan aku di tangan pinganyu ku, adi nyerang aku ngga pinganang kadong ka tatang.

¹³ Aku puan nang aku re kiris pinyikana TUHAN di tika aku udip di ong.

¹⁴ Sabah di TUHAN. Sabab meh, dŭhnyah jimŭ. Sabah di TUHAN.