MAZMUR 25 - Hakcipta - Biatah Bidayuh

Dua Mite Pinyiruton ngga Pinyigrindung

¹ Aku jugan dua ku ka Kaam, O TUHAN; di Kaam, Tapa ku, aku sabah.

² Dŭhnyah tandah aku dog pimangŭh; dŭhnyah bada bara pinganyu ku tawŭh aku!

³ Ngara adi sabah di Kaam dŭh re arah, pak ngara adi rikas rawan Kaam inŭh.

⁴ Ngajar aku aran Mai, O TUHAN; bada aku puan-i.

⁵ Ngajar aku udip nanyam ka pinyiraan Mai, amai Kaam inŭh Tapa ku, adi nyiramat aku. Aku siraru sabah di Kaam.

⁶ Ingat, O TUHAN, mandis Mai ka pinyirindu Mai adi dŭh bisa birubah adi Kaam mbŭh kiren so jah.

⁷ Apun dosa ngga sarah ku andu gi-mara. Darŭm pinyirindu Mai adi dŭh bisa birubah ngga pinyikana, ingat aku, O TUHAN!

⁸ Sabab TUHAN tŭnggŭn ka kana, Ayŭh ngajar daya adi bidosa aran adi patut ngara tunda.

⁹ Ayŭh nguru daya adi pirapat adŭp-i di aran adi batur ka ngajar ngara pinyiraan-I.

¹⁰ Ngga pinyitŭtŭd ka pinyirindu Ayŭh nguru sopŭrŭg adi sita simanya-I ka adi tunda pinyipesan-I.

¹¹ Digŭng janji Mai, TUHAN, ka apun dosa ku, amai dosa ku bagŭ.

¹² Ngara adi taru di TUHAN re birajar so Ayŭh aran adi patut ngara kadŭg.

¹³ Ngara re ari mujur, ka bara anak ngara re dapu tarun tana anŭ.

¹⁴ TUHAN inŭh jerā ngara adi tunda pinganang-I ka Ayŭh natu simanya-I ngga ngara.

¹⁵ Aku nyigura TUHAN yŭn pinurung di tadŭ nga-i, ka Ayŭh pirupas aku so pinyusah.

¹⁶ Kimat aku, TUHAN, ka masi di aku; sabab aku sadi ka ramah.

¹⁷ Pijangan atin ku so pinyusah ku ka nyiramat aku so sopŭrŭg pinyusah ku.

¹⁸ Nimbang pinyusah ngga sangsara ku ka apun sopŭrŭg dosa ku.

¹⁹ Tingga nŭh bagŭ pinganyu ku; tingga munki masam ngara tiru di aku.

²⁰ Grindung aku ka nyiramat aku; dŭhnyah bada aku dog ngarah, aku mandŭg ka Kaam yŭn pinyigrindung.

²¹ Isa-i pinyikana ku ngga atin jujur ku grindung aku, sabab aku sabah di Kaam.

²² So barang pinyusah ngara, O Tapa, nyiramat daya Mai Israel!