MAZMUR 20 - Hakcipta - Biatah Bidayuh

Dua Mite Pimanang

¹ Isa-i TUHAN nam kuu kan kuu darŭm susah! Isa-i Tapa Jacob grindung kuu!

² Isa-i Ayŭh pait pinurung ka kuu so Ramin-I ka nggen pinyibatu di kuu so Sandah Zion.

³ Isa-i Ayŭh kambat sopŭrŭg pinganggen mu ka munos asŭng di sopŭrŭg sadis mu.

⁴ Isa-i Ayŭh nggen di kuu kayuh adi raan mu ka bada sopŭrŭg pusar mu mujur.

⁵ Komŭnŭ kieh re nyirais ngga gaŭn di pimanang mu ka pawŭn yŭn pimanang mu ngga muji Tapa. Isa-i TUHAN nam sopŭrŭg pimite mu.

⁶ Madin aku puan nang TUHAN nggen pimanang di raja adi-I mien; Ayŭh nam ayŭh so shorga kudus-I ka ngga kuasa-I nggen di ayŭh pimanang bās.

⁷ Kada so ngara sabah di krita kuda perang ngara, ka adi bŭkŭn di kuda ngara, pak ata sabah di kuasa TUHAN adi Tapa ta.

⁸ Daya adi mun anŭ re sikak ka rabu, pak ata re makat ka mijog tagap.

⁹ Nggen pimanang di raja, O TUHAN; nam kieh kan kieh bagan.