MAZMUR 19 - Hakcipta - Biatah Bidayuh

Bragah Tapa darŭm Kayuh adi-I Napa

¹ Rangit kidaan bragah Tapa! Rangit piagah kayuh adi-I ndai!

² Andu ndi kidaan-i di andu adi re; ngarŭm ndi kidaan-i di ngarŭm adi re.

³ Mating piminyu puan kah pinganang dog pakai, mating sirŭŭn dog dingah;

⁴ pak pinganang-I ngukap di ndi ong ong ka dog dingah ndŭg ka bŭngŭn ong. Tapa ndai ramin yŭn batŭh andu di rangit;

⁵ ka-i ruah isan isan keya ka pingaten dari adi gaŭn, keya ka daya adi tukang sitama bikaduh graŭh an bikaduh.

⁶ Ka-i piguru so ndi bŭngŭn rangit ka mutas ka parad andi. Mating kayuh dapŭd bisukan so paras-i.

Ukum-adat TUHAN

⁷ Ukum-adat TUHAN inŭh siabo batur; ukum-adat anŭ nggen pinyibake bauh. Pesan TUHAN dapŭd dog sabah, nggen pinyibijak di daya adi dŭh biyŭn-i ngga sukup.

⁸ Ukum-adat TUHAN inŭh batur, ka ngara adi tunda-i agi sanang. Pesan TUHAN inŭh tŭnggŭn ka nggen pinyimirati yŭn pikir-kira.

⁹ Puno stabi di TUHAN inŭh kana; ka-i re pijuu adu adu. Itong TUHAN agi tŭnggŭn; ka-i ari dŭh marad.

¹⁰ Ka-i rabis dog raan so tigŭrŭ mas ayŭh rabis nyibanyis so aŭn ju banyis.

¹¹ Ka-i nggen pinyipuan di aku, adi urun Mai; aku dog ngupah amai tunda sopŭrŭg-i.

¹² Mating daya tungang kiris sarah adŭp-i; pirupas aku, TUHAN, so sarah adi bisukan!

¹³ Bada aku siramat so dosa adi saji dog ndai gŭh; dŭhnyah bada-i nguasa aku. Komŭnŭ aku re sukup kana jo so arap dosa.

¹⁴ Isa-i pinganang ku, ka pikir-kira ku dog trima Mai. O TUHAN, pinyigrindung ku ngga pinubos ku!