MAZMUR 16 - Hakcipta - Biatah Bidayuh

Dua Yŭn Atin Sabah

¹ Grindung aku, O Tapa; Aku sabah di Kaam yŭn ku dapŭd siramat.

² Aku nang di TUHAN, “Kaam inŭh TUHAN ku; sopŭrŭg kayuh kana adi aku biyŭn mandŭg so Kaam.”

³ Mbŭh sukup kana-i daya TUHAN adi tŭtŭd! Pinyigaŭn bās ku inŭh kambŭi aku agi ngga ngara.

⁴ Ngara adi nyambah tapa tapa bŭkŭn taban bagŭ pinyusah di adŭp ngara. Aku dŭh re sua ngga ngara jugan sadis; aku dŭh re nyambah tapa tapa ngara.

⁵ TUHAN, Kaam sadi adŭ adi aku biyŭn, ka Kaam inŭh adi nggen di aku sopŭrŭg adi aku biguna; pimudip ku adi re inŭh di tangan Mai.

⁶ Munki masam grua-i pinganggen Mai di aku; mbŭh raru kana inŭh sopŭrŭg-i!

⁷ Aku muji TUHAN, sabab Ayŭh nyiruton aku, ka singarŭm pikir-kira atin ku agi bakan aku.

⁸ Aku ari puan TUHAN agi ngga aku; Ayŭh agi sindŭk, ka mating kayuh dapŭd ngugoh aku.

⁹ Ngapŭi aku munos asŭng buang gaŭn, ka aku kinyam adŭp ku pagŭng,

¹⁰ sabab Kaam grindung aku so kuasa pinyikabŭs. Aku mbŭh tŭtŭd bituan di Kaam, ka Kaam dŭh re tangan aku di sibayan.

¹¹ Kaam re kiren di aku aran nuju udip adi sawŭ; Kaam adi agi ngga aku mbŭh bada aku gaŭn ka adu adu pimunos atin ku.