MAZMUR 148 - Hakcipta - Biatah Bidayuh

Rangit ngga Ong Muji meh Tapa

¹ Muji meh TUHAN! Muji TUHAN so shorga, angān adi udip di yŭn adi bigatung.

² Muji meh Ayŭh, sopŭrŭg malaikat-I, sopŭrŭg bara soldadu shorga-I.

³ Muji meh Ayŭh, batŭh andu ngga buran; muji meh Ayŭh, bitang adi nyekar.

⁴ Muji meh Ayŭh, rangit adi siabo bigatung, ka piin di tunduh rangit.

⁵ Bada sopŭrŭg ngara muji adŭn TUHAN! Ayŭh minyu, ka ngara dog napa;

⁶ ngga pinganang-I ngara rakat di yŭn ngara ndŭg situi tui, ka ngara dŭh dapŭd nyibireu pinganang.

⁷ Muji meh TUHAN so ong, dāng-bās di rawŭt ngga sopŭrŭg rasan rawŭt;

⁸ kijat ngga ujen batuh, salju ngga abun, sabak ribut adi tunda pinganang-I.

⁹ Muji meh Ayŭh, sandah ngga darŭd, tŭngŭn pimuruh ngga tuān;

¹⁰ sopŭrŭg dāng, rimon ngga adi siga, dāng bigawang ngga manuk.

¹¹ Muji meh Ayŭh, raja ngga sopŭrŭg bangsa, sopŭrŭg pimritah ngga pinguasa;

¹² dayung bujang ngga dari bujang, daya adi minyamba samŭn anak-anya.

¹³ Patut inŭh ngara muji adŭn TUHAN! Adŭn-I rabis bās so sopŭrŭg adi bŭkŭn; bragah-I bigatung so ong ngga shorga.

¹⁴ Ayŭh bada bangsa-I bake, isa sopŭrŭg daya-I muji Ayŭh — daya Israel, Ayŭh siŭt. Muji meh TUHAN!