MAZMUR 135 - Hakcipta - Biatah Bidayuh

Nyanyi Puji

¹ Muji meh TUHAN! Muji adŭn-I, angān adi urun TUHAN,

² adi mijog di Ramin TUHAN, di yŭn pinyirŭŭ Tapa ta.

³ Muji meh TUHAN, sabab Ayŭh kana; nang ragu puji yŭn adŭn-I, sabab Ayŭh mandis.

⁴ Ayŭh mien Jacob yŭn adŭp-I, daya Israel tah yŭn adŭp-I.

⁵ Aku puan TUHAN inŭh bās, bās so sopŭrŭg tapa.

⁶ Ayŭh ndai tadŭ tadŭ kayuh raan-I di shorga ngga di ong, di rawŭt ngga di rasan rawŭt.

⁷ Ayŭh taban abun sabak ribut so bŭngŭn ong; Ayŭh napa kijat yŭn sabak ribut, ka Ayŭh piruah sabak so yŭn birit pinyirikŭn-I.

⁸ Di Egypt Ayŭh siŭ sopŭrŭg anak pinuai manusia ngga anak bungas dāng.

⁹ Diginŭ Ayŭh ndai pingandai-nginga ngga pingandai saruh ngga ngukum raja samŭn bara pinurung-i.

¹⁰ Ayŭh pirabur bagŭ bangsa ka siŭ raja raja adi bikuasa:

¹¹ Sihon, raja daya Amor, Og, raja daya Bashan, ka sopŭrŭg raja di Canaan.

¹² Ayŭh nggen tana ngara di daya adŭp-I; ka nggen-i di Israel.

¹³ TUHAN, Kaam re siraru dog piagah nimun Tapa; sopŭrŭg turap re ingat Kaam.

¹⁴ TUHAN re ngibān daya-I; Ayŭh re masi di bara urun-I.

¹⁵ Tapa tapa bangsa inŭh dog ndai so pirak ngga mas, ngara dog ndai tangan manusia.

¹⁶ Ngara biyŭn baba, pak dŭh dapŭd minyu, biyŭn batŭh, pak dŭh dapŭd kiris.

¹⁷ Ngara biyŭn kajit, pak dŭh dapŭd dingah; ka ngara dŭh gŭh ngasŭng.

¹⁸ Isa-i sopŭrŭg ngara adi ndai-i ka adi sabah dieh jadi mun tibudo adi ngara ndai!

¹⁹ Muji meh TUHAN, daya Israel; muji meh Ayŭh, angān imam Tapa!

²⁰ Muji meh TUHAN, angān daya Levi; muji meh Ayŭh, sopŭrŭg ngan adi nyambah Ayŭh!

²¹ Muji meh TUHAN di Zion, di Jerusalem, di ramin-I. Muji meh TUHAN!