MAZMUR 132 - Hakcipta - Biatah Bidayuh

Puji Yŭn Ramin TUHAN

¹ TUHAN, dŭhnyah kambŭt David ngga sopŭrŭg udip jera adi ayŭh mbŭh kinyam.

² Ingat, TUHAN, kayuh adi ayŭh janji, payu adi-i ndai ngga Kaam, Tapa Jacob, adi Bikuasa:

³ “Aku dŭh re mari bait di ka ambok;

⁴ aku dŭh re rŭŭ-paya puan kah bŭŭs,

⁵ ndŭg ka aku mbŭh ndai ramin yŭn TUHAN, ramin yŭn Tapa Jacob, adi Bikuasa.”

⁶ Di Bethlehem kieh dingah pasar Pati Simanya, ka kieh dapŭd-i di tarun tana Jearim.

⁷ Kieh nang, “Ja ata di ka ramin TUHAN; ja ata nyambah Ayŭh di jawin takta-I.”

⁸ Mandŭg ka Ramin Mai, TUHAN, ngga Pati Simanya, tandā kuasa Mai, ka rŭŭ digiti ndŭg situi tui.

⁹ Isa-i bara imam Mai ari ndai kayuh adi batur; isa-i daya Mai nyirais amai gaŭn!

¹⁰ Kaam bijanji ngga urun Mai David; dŭhnyah tirawan raja Mai adi Kaam mbŭh mien, TUHAN.

¹¹ Kaam bipayu ngga David — janji adi Kaam dŭh re tarik pari: “Aku re bada ndi so anak dari mu jadi raja, ka ayŭh re mritah ripas kuu.

¹² Kambŭi anak anak mu sita simanya Ku samŭn pesan adi Aku nggen di ngara, anak ngara, gŭh, re adu adu gati kuu jadi raja.”

¹³ TUHAN mbŭh mien Zion; Ayŭh raan bada-i jadi tarun yŭn-I rŭŭ:

¹⁴ “Ati inŭh tarun yŭn Aku re rŭŭ adu adu; digiti inŭh Aku raan mritah.

¹⁵ Aku re nggen ngga sibagŭ-i di Zion sopŭrŭg kayuh adi-i biguna; Aku re pibisoh daya sirata ngga pinguman.

¹⁶ Aku re nyiberkat bara imam-i darŭm sopŭrŭg pingandai ngara, ka daya-i re biragu ka nyirais amai gaŭn.

¹⁷ Di Zion aku re bada ndi so sesang David jadi raja adi bās; di Zion aku re bada tan pinyipritah raja adi Aku muko mien.

¹⁸ Aku re bada pinganyu-i mangŭh, pak pinyipritah-i re mujur ka kambang.”