MAZMUR 127 - Hakcipta - Biatah Bidayuh

Muji Pinyikana Tapa

¹ Kambŭi TUHAN dŭh pijog ramin, pingandai tukang ramin dŭh biguna; kambŭi TUHAN dŭh grindung kupo, dŭh inŭh biguna bada daya jaga-i.

² Dŭh-i biguna nŭŭh nyiraja ngga nyiran adŭp nŭh, makat awar ka bŭŭs rambat. Amai TUHAN inŭh adi nggen di ngara adi-I rindu, di tika ngara bŭŭs.

³ Bara anak inŭh pinganggen so TUHAN; ngara inŭh sawŭ berkat.

⁴ Anak dari adi daya biyŭn darŭm ayŭh gi-mara inŭh keya ka reja-panah di tangan soldadu.

⁵ Sanang inŭh daya adi biyŭn reja-panah anŭ. Ayŭh re dŭh dog ngarah kan ayŭh bidapŭd ngga pinganyu-i di tarun yŭn bisara.