MAZMUR 119 - Hakcipta - Biatah Bidayuh

Ukum-Adat TUHAN

¹ Sanang inŭh ngara adi udip dŭh ndai sarah, adi udip nanyam ka ukum-adat TUHAN.

² Sanang inŭh ngara adi tunda pinyipesan-I, adi dingah pinganang-I ngga siabo atin ngara.

³ Ngara bŭn ndai sarah; ngara udip nanyam ka pinyiraan TUHAN.

⁴ TUHAN, Kaam mbŭh nggen di kieh ukum-adat Mai ka kidaan di kieh bada tunda-i ngga atin tŭtŭd.

⁵ Aku harap aku tŭtŭd bidigŭng di ajar Mai!

⁶ Kambŭi aku nakit pirati sopŭrŭg pesan Mai, aku re dŭh dog pimangŭh.

⁷ Darŭm aku birajar ukum-adat Mai adi tŭnggŭn, aku re muji Kaam ngga atin bisig ku.

⁸ Aku re tunda ukum-adat Mai; dŭhnyah tagan aku!

Nundok di Ukum-adat TUHAN

⁹ Simuki daya mara dapŭd bada pimudip ngara bisig? So ka tunda pesan Mai.

¹⁰ Ngga siabo atin ku aku suba bituan di Kaam; dŭhnyah bada aku dŭh tunda Pinyipesan Mai.

¹¹ Aku nyikŭn ukum-adat Mai darŭm atin ku, isa aku dŭh bidosa rawan Kaam.

¹² Aku muji Kaam, O TUHAN; ngajar aku pinyiraan Mai.

¹³ Aku re nyuse sopŭrŭg ukum-adat adi Kaam mbŭh nggen.

¹⁴ Aku gaŭn tunda pesan Mai rabis so biyŭn rata bās.

¹⁵ Aku birajar ajar Mai; aku piruh aran Mai.

¹⁶ Aku angan ukum-adat Mai; pesan Mai aku dŭh re kambŭt.

Ukum-adat TUHAN Bada Daya Sanang

¹⁷ Kana ngga aku, adi urun Mai, isa aku bisa udip ka tunda ajar Mai.

¹⁸ Kuka batŭh ku, isa aku dapŭd kiris pinyawŭ bās di ukum-adat Mai.

¹⁹ Aku dŭh tui udip di ong; dŭhnyah sukan pesan Mai so aku.

²⁰ Atin ku mandam amai gruwŭn; sandu singarŭm aku raan puan ukum-adat Mai.

²¹ Kaam ngukum daya adi sambuh; payah inŭh ngara adi dŭh tunda pesan Mai.

²² Pirupas aku so bakit ngga pangu ngara, sabab aku mbŭh sita ukum-adat Mai.

²³ Bara pinguasa tikuruk ka bipekat rawan aku, pak aku re birajar ajar Mai.

²⁴ Ajar Mai aku angan; sopŭrŭg-i jadi keya ka tukang pitayan yŭn ku.

Pinyiraan Sita Ukum-adat TUHAN

²⁵ Aku guring di tana amai mbŭh arah; pakat aku, nanyam ka janji Mai.

²⁶ Aku ngaku sopŭrŭg adi aku mbŭh ndai, ka Kaam nam aku; ngajar aku pinyiraan Mai.

²⁷ Turung aku mirati ukum-adat Mai, ka aku re nakit bipikir di ajar bās Mai.

²⁸ Aku ati dog nyatŭk pinyusah; nyibake aku, nanyam ka janji Mai.

²⁹ Pijo aku so aran adi sarah, ka ngga pinyikana Mai ngajar aku ukum-adat Mai.

³⁰ Aku mbŭh natu adŭp ku nundok di Kaam; aku mbŭh na atin ku di ukum-adat Mai.

³¹ Aku mbŭh tunda ajar Mai, TUHAN; dŭhnyah bada aku dog pimangŭh.

³² Aku re graŭh tunda pesan Mai, sabab Kaam re bada aku rabis mirati.

Dua yŭn Atin Mirati

³³ Ngajar aku, TUHAN, rati ukum-adat Mai, ka aku re ari tunda-i.

³⁴ Kidaan rati ukum-adat Mai di aku, ka aku re tunda-i; aku re sita-i ngga siabo atin ku.

³⁵ Bada aku nundok di Pinyipesan Mai, sabab diginŭ aku dapŭd pinyigaŭn.

³⁶ Nggen di aku pinyiraan ngga tunda ukum-adat Mai ka dŭh pinyiraan ngga dapŭd kaya.

³⁷ Pijo atin ku so kayuh adi dŭh biguna; kana ngga aku, nanyam ka janji Mai.

³⁸ Ingat janji Mai ngga aku, adi urun Mai — janji adi Kaam mbŭh ndai ngga daya adi dingah pinganang Mai.

³⁹ Nyiramat aku so pinganang adi nggen mangŭh adi aku taru; munki masam bās-i ukum-adat Mai!

⁴⁰ Aku raan tunda pesan Mai; nggen di aku udip bauh, amai Kaam inŭh tŭnggŭn.

Sabah di Ukum-adat TUHAN

⁴¹ Kiren di aku munki masam bās pinyirindu Mai di aku, TUHAN, ka nyiramat aku nanyam ka janji Mai.

⁴² Komŭnŭ aku tungang nam ngara adi pimangŭh aku sabab aku sabah di pinganang Mai.

⁴³ Turung aku ari minyu kayuh adi sawŭ, sabab pingarap ku inŭh di ukum-adat Mai.

⁴⁴ Aku re ari tunda ukum-adat Mai, yŭn situi tui.

⁴⁵ Aku re udip dŭh dog ngabŭt pinganyu, sabab aku suba tunda ajar Mai.

⁴⁶ Aku re piagah pesan Mai di bara raja ka aku dŭh re mangŭh.

⁴⁷ Aku gaŭn tunda pesan Mai, sabab aku rindu-i.

⁴⁸ Aku stabi ka rindu di Pinyipesan Mai; aku re nakit bipikir di ajar Mai.

Atin Sabah di Ukum-adat TUHAN

⁴⁹ Ingat janji Mai ngga aku, adi urun Mai; janji Mai anŭ mbŭh nggen di aku pingarap.

⁵⁰ Ndŭg ka di tika aku susah aku dog nyaduh sabab janji Mai nggen di aku udip.

⁵¹ Daya adi sambuh ari ngamun aku, pak aku bŭn jo so ukum-adat Mai.

⁵² Aku ingat ukum-adat Mai adi ndun jah, ka-i taban saduh ka aku, O TUHAN.

⁵³ Kan aku kiris daya ginaka miranggar ukum-adat Mai, aku mbŭh raru baji.

⁵⁴ Darŭm pimudip purok ku di ong ati aku ndai ragu pasar pesan Mai.

⁵⁵ Singarŭm aku ingat Kaam, TUHAN, ka aku bipikir pasar ukum-adat Mai.

⁵⁶ Aku dapŭd udip sanang darŭm aku tunda pesan Mai.

Nundok di Ukum-adat TUHAN

⁵⁷ Kaam adŭ adi aku raan, O TUHAN; aku bijanji an tunda ukum-adat Mai.

⁵⁸ Aku ngga siabo atin ku mite Kaam masi di aku, nanyam ka janji Mai!

⁵⁹ Aku mbŭh bipikir pasar urah-rakah ku ka aku bijanji an tunda ajar Mai.

⁶⁰ Ngga dŭh nyikite aku bigaut tunda pesan Mai.

⁶¹ Daya ginaka tŭŭn jarat yŭn kudog aku, pak aku dŭh kambŭt ukum-adat Mai.

⁶² Ngga sitŭrŭp ngarŭm aku burah muji Kaam amai ukum-adat Mai tŭnggŭn.

⁶³ Aku jerā ngara adi bituan di Kaam, sopŭrŭg ngara adi tunda ukum-adat Mai.

⁶⁴ TUHAN, ong mbŭh puno ngga pinyirindu Mai adi dŭh bisa birubah; ngajar aku Pinyipesan Mai.

Guna Ukum-adat TUHAN

⁶⁵ Kaam mbŭh ingat janji Mai, TUHAN, ka Kaam kana ngga aku, adi urun Mai.

⁶⁶ Nggen di aku pinyibijak ngga pinyipuan, sabab aku sabah di pesan Mai.

⁶⁷ Diŭ so Kaam ngukum aku, aku taŭn mbŭh ari ndai sarah, pak madin aku tunda pinganang Mai.

⁶⁸ Munki masam kana-i Kaam — raru mandis! Ngajar aku pesan Mai.

⁶⁹ Daya sambuh mbŭh napŭ aku, pak ngga siabo atin ku aku tunda ajar Mai.

⁷⁰ Ngara dŭh biyŭn atin mirati, pak aku dapŭd pinyigaŭn di ukum-adat Mai.

⁷¹ Taŭn kana Kaam ngukum aku, sabab-i bada aku birajar pesan Mai.

⁷² Ukum-adat adi Kaam nggen inŭh biguna dŭ di aku so sopŭrŭg duit di ong.

Pinyitŭnggŭn Ukum-adat TUHAN

⁷³ Kaam napa aku, ka Kaam kingat aku; nggen di aku atin mirati, isa aku bisa birajar ukum-adat Mai.

⁷⁴ Ngara adi stabi di Kaam re gaŭn kan ngara kiris aku, sabab aku sabah di janji Mai.

⁷⁵ Aku puan ukum-adat Mai tŭnggŭn, TUHAN, ka Kaam ngukum aku sabab Kaam tŭtŭd.

⁷⁶ Bada pinyirindu Mai adi dŭh bisa birubah nyaduh aku, nanyam ka janji Mai di aku, adi urun Mai.

⁷⁷ Masi di aku, ka aku re udip sabab aku angan ukum-adat Mai.

⁷⁸ Isa-i ngara adi sambuh dog pimangŭh amai napŭ aku; pak aku re nakit bipikir di ajar Mai.

⁷⁹ Isa-i ngara adi stabi di Kaam mandŭg ka aku — sopŭrŭg ngara adi puan pesan Mai.

⁸⁰ Isa-i aku ngga siabo asŭng ku tunda Pinyipesan Mai ka dŭh re mangŭh sitagar dog ngarah.

Dua Mite Pinyirupas

⁸¹ Aku mbŭh raru kawŭk, TUHAN, kajŭn Kaam nyiramat aku; aku sabah di pinganang Mai.

⁸² Batŭh ku mbŭh kawŭk kajŭn kayuh adi Kaam mbŭh bijanji, darŭm aku siken, “Sinde Kaam re turung aku?”

⁸³ Aku mbŭh dŭh biguna keya ka bŭrŭh-kurit adi dog taran; pak aku dŭh kambŭt pesan Mai.

⁸⁴ Dŭm tian-ki dinge aku dŭh siŭn dŭh kajŭn? Sinde Kaam re ngukum ngara adi kisiis aku?

⁸⁵ Daya adi sambuh, adi dŭh tunda ukum-adat Mai, mbŭh kareh rubang ngga mirakap aku.

⁸⁶ Sopŭrŭg Pinyipesan Mai bisa dog sabah; daya kisiis aku ngga pinganang kadong — turung aku!

⁸⁷ Ngara mbŭh dŭm tadŭ re dapŭd siŭ aku, pak aku gi-mating nyibireu pesan Mai.

⁸⁸ Sabab pinyirindu Mai adi dŭh bisa birubah, kana ngga aku; isa aku tunda ukum-adat Mai.

Pinyabah di Ukum-adat TUHAN

⁸⁹ Pinganang Mai, O TUHAN, re tan ndŭg situi tui; pinganang Mai tan adu adu di shorga.

⁹⁰ Pinyitŭtŭd Mai tan yŭn barang turap; Kaam mbŭh na ong di yŭn adŭp-i, ka-i babŭ.

⁹¹ Sopŭrŭg kayuh babŭ ndŭg andu ati sabab pesan Mai, sabab sopŭrŭg-i inŭh urun Mai.

⁹² Kambŭi ukum-adat Mai dŭh atak pinyigaŭn ku, aku taŭn mbŭh kabŭs sabab sangsara ku.

⁹³ Aku dŭh re nyibireu ajar Mai, sabab ngga ajar Mai Kaam mbŭh nyiran aku.

⁹⁴ Aku tung jamai — nyiramat aku! Aku mbŭh suba an tunda pesan Mai.

⁹⁵ Daya ginaka tuman an siŭ aku, pak aku re nakit bipikir di ukum-adat Mai.

⁹⁶ Aku mbŭh puan nang sopŭrŭg kayuh biyŭn pinyikurang-i; pak Pinyipesan Mai sukup batur.

Pinyirindu di Ukum-adat TUHAN

⁹⁷ Aku raru rindu ukum-adat Mai! Aku bipikir pasar ukum-adat Mai ndi andu andu.

⁹⁸ Pinyipesan Mai ari agi ngga aku ka bada aku rabis bijak so pinganyu ku.

⁹⁹ Aku mirati dŭ so sopŭrŭg gurū ku, sabab aku nakit bipikir di ajar Mai.

¹⁰⁰ Pinyibijak ku bās dŭ so tung ngara adi mbŭh tuuh, sabab aku tunda pesan Mai.

¹⁰¹ Aku mbŭh pijo adŭp ku so urah-rakah adi arap, sabab aku raan tunda pinganang Mai.

¹⁰² Aku gi-mating nyibireu ajar Mai, amai adŭp Mai inŭh gurū ku.

¹⁰³ Munki masam nyibanyis-i ajar Mai nyibanyis dŭ so ju banyis!

¹⁰⁴ Aku dapŭd pinyibijak so ukum-adat Mai, ngapŭi aku dŭh suka urah-rakah adi arap.

Jawa Ukum-adat TUHAN

¹⁰⁵ Pinganang Mai inŭh prita adi nyiruton aku ka jawa adi nyekar aran ku.

¹⁰⁶ Aku re bidigŭng di payu ku ka tunda ajar Mai adi tŭnggŭn.

¹⁰⁷ Pinyusah ku, TUHAN, inŭh raru sipŭ; kudip aku, nanyam ka janji Mai.

¹⁰⁸ Kambat dua trima kaseh ku, O TUHAN, ka ngajar aku pesan Mai.

¹⁰⁹ Aku mbŭh ari sidia an ruban asŭng ku; aku dŭh kambŭt ukum-adat Mai.

¹¹⁰ Daya ginaka tŭŭn jarat yŭn kudog aku, pak aku mating nyipunok pesan Mai.

¹¹¹ Pinyipesan Mai inŭh buat-rata ku adi tan adu adu; anŭ inŭh pinyiraan atin ku.

¹¹² Aku mbŭh natu an tunda ukum-adat Mai ndŭg ka andu adi ngga aku kabŭs.

Pinyipagŭng darŭm Ukum-adat TUHAN

¹¹³ Aku tiru di daya adi dŭh sukup tŭtŭd di Kaam, pak aku rindu di ukum-adat Mai.

¹¹⁴ Kaam inŭh pingibān ngga pinyigrindung ku; aku na pingarap ku di janji Mai.

¹¹⁵ Bu so aku, angān daya bidosa. Aku re tunda pesan Tapa ku.

¹¹⁶ Nggen di aku pinyibake, nanyam ka janji Mai, ka aku re udip; dŭhnyah bada aku asa di pingarap ku!

¹¹⁷ Digŭng aku, ka aku re siramat, ka aku re siraru pirati pesan Mai.

¹¹⁸ Kaam san barang naan daya adi nyipunok ukum-adat Mai; pinganang tipu ngara dŭh biguna.

¹¹⁹ Kaam nyirundeng daya ginaka keya ka sapok, ngapŭi aku rindu ajar Mai.

¹²⁰ Sabab Kaam aku taru; aku mbŭh taru sabab ukum-adat Mai.

Nundok di Ukum-adat TUHAN

¹²¹ Aku mbŭh ndai kayuh adi batur ka kana; dŭhnyah tagan aku di tangan pinganyu ku!

¹²² Bijanji Kaam re turung urun Mai; dŭhnyah bada daya sambuh kinanyuh aku!

¹²³ Batŭh ku kawŭk kajŭn Kaam mandŭg di nyiramat aku, ka pirupas aku, nanyam ka janji Mai.

¹²⁴ Ndai di aku nanyam ka pinyirindu Mai adi dŭh bisa birubah, ka ngajar aku pesan Mai.

¹²⁵ Aku ati urun Mai; nggen di aku atin mirati, isa aku bisa puan ajar Mai.

¹²⁶ TUHAN, ati inŭh tika Kaam makat, sabab daya mbŭh miranggar ukum-adat Mai.

¹²⁷ Aku rindu pesan Mai rabis so mas, rabis so aŭn mas.

¹²⁸ Jadi aku tunda sopŭrŭg ajar Mai; aku tiru di sopŭrŭg aran adi sarah.

Raan Tunda Ukum-adat TUHAN

¹²⁹ Ajar Mai inŭh bās; aku tunda-i ngga siabo atin ku.

¹³⁰ Rati ajar Mai nggen jawa ka taban pinyibijak di daya adi mapung braŭg.

¹³¹ Aku gruwŭn pesan Mai ka aku ruai natis-i.

¹³² Tingga aku ka masi di aku nimun Kaam masi di ngara adi rindu di Kaam.

¹³³ Nanyam ka janji Mai, dŭhnyah bada aku rabu; dŭhnyah bada arap nguasa aku.

¹³⁴ Nyiramat aku so ngara adi kinanyuh aku, isa aku bisa tunda pesan Mai.

¹³⁵ Bada jawin Mai nyekar di tunduh aku ka ngajar aku ukum-adat Mai.

¹³⁶ Randang batŭh ku aman mun piin sungi, sabab daya dŭh tunda ukum-adat Mai.

Pinyitŭnggŭn Ukum-adat TUHAN

¹³⁷ Kaam inŭh tŭnggŭn, TUHAN, ka ukum-adat Mai inŭh tŭnggŭn.

¹³⁸ Atur adi Kaam mbŭh nggen inŭh sukup tŭnggŭn ka batur.

¹³⁹ Baji ku bijagu mun apui darŭm aku, sabab pinganyu ku tirawan pesan Mai.

¹⁴⁰ Janji Mai inŭh manŭn! Aku raru rindu-i!

¹⁴¹ Aku ati dŭh biguna ka dog ngamun, pak aku dŭh nyibireu ajar Mai.

¹⁴² Pinŭnggŭn Mai re tan adu adu, ka ukum-adat Mai inŭh adu adu sawŭ.

¹⁴³ Aku raru bipito buang susah, pak Pinyipesan Mai bada aku gaŭn.

¹⁴⁴ Ajar Mai inŭh adu adu tŭnggŭn; nggen di aku atin mirati, ka aku re udip.

Dua Mite Pinyirupas

¹⁴⁵ Ngga siabo atin ku aku bagan Kaam; nam aku, TUHAN, ka aku re tunda pesan Mai!

¹⁴⁶ Aku bagan Kaam; nyiramat aku, ka aku re sita ukum-adat Mai.

¹⁴⁷ Diŭ so batŭh andu makat aku bagan mite turung so Kaam; aku na pingarap ku di janji Mai.

¹⁴⁸ Ndi ngarŭm ngarŭm aku dŭh bŭŭs, amai nakit bipikir di ajar Mai.

¹⁴⁹ Sabab pinyirindu Mai dŭh bisa birubah, dingah aku, O TUHAN; kiren masi Mai, ka kingat aku!

¹⁵⁰ Ngara adi kisiis aku mbŭh mandŭg sindŭk, daya adi bŭn sita ukum-adat Mai.

¹⁵¹ Pak Kaam sindŭk aku, TUHAN, ka sopŭrŭg pesan Mai bisa dog sabah.

¹⁵² Ndun jah aku birajar pasar ajar Mai; Kaam bada-i tan adu adu.

Dua Mite Turung

¹⁵³ Tingga sangsara ku, ka nyiramat aku, sabab aku gi-mating nyibireu ukum-adat Mai.

¹⁵⁴ Ngibān aku so daya di nyarah aku, ka pirupas aku; nyiramat aku, nanyam ka janji Mai.

¹⁵⁵ Daya ginaka dŭh re dog nyiramat, amai ngara dŭh tunda ukum-adat Mai.

¹⁵⁶ Pak pinyirasi Mai, TUHAN, inŭh bās; kiren masi Mai ka nyiramat aku!

¹⁵⁷ Aku biyŭn bagŭ pinganyu samŭn ngara adi an kinanyuh, pak aku dŭh re dŭh tunda ukum-adat Mai.

¹⁵⁸ Kan aku tingga ngara adi dŭh tŭtŭd, aku mbŭh raru tiru, amai ngara dŭh sita pesan Mai.

¹⁵⁹ Tingga munki masam aku raru rindu di ajar Mai, TUHAN. Pinyirindu Mai bŭn birubah, nyiramat meh aku!

¹⁶⁰ Sopŭrŭg pinganang Mai sawŭ, ka sopŭrŭg ukum-adat Mai tŭnggŭn ka tan adu adu.

Bidigŭng Tagap di Ukum-adat TUHAN

¹⁶¹ Daya adi bikuasa nyerang aku ngga dŭh biyŭn pada, pak aku stabi di ukum-adat Mai.

¹⁶² Sanang inŭh aku amai janji Mai, sanang mun daya adi mbŭh dapŭd rata bās.

¹⁶³ Aku tiru di pinganang kadong, pak aku rindu di ukum-adat Mai.

¹⁶⁴ Ju kari barang andu aku nggen trima kaseh di Kaam amai ukum-adat Mai tŭnggŭn.

¹⁶⁵ Ngara adi rindu ukum-adat Mai mbŭh sukup pagŭng, ka diginŭ mating kayuh adi re bada ngara rabu.

¹⁶⁶ Aku kajŭn Kaam nyiramat aku, TUHAN, ka aku ndai kayuh adi Kaam pesan.

¹⁶⁷ Aku tunda ajar Mai; aku rindu-i ngga siabo atin ku.

¹⁶⁸ Aku tunda pesan ngga ajar Mai; Kaam kiris sopŭrŭg kayuh adi aku ndai.

Dua Mite Turung

¹⁶⁹ Bada sirŭŭn ku mite turung ndŭg Kaam, TUHAN! Nggen di aku atin mirati, nanyam ka janji Mai.

¹⁷⁰ Dingah dua ku, ka nyiramat aku nanyam ka janji Mai!

¹⁷¹ Aku re siraru muji Kaam, sabab Kaam ngajar aku ukum-adat Mai.

¹⁷² Aku re biragu pasar ukum-adat Mai, sabab pesan Mai tŭnggŭn.

¹⁷³ Ari sidia an turung aku, sabab aku tunda pesan Mai.

¹⁷⁴ Aku raru gruwŭn an dog nyiramat Mai, O TUHAN! Ukum-adat Mai bada aku gaŭn.

¹⁷⁵ Kudip aku, isa aku bisa muji Kaam; isa-i ajar Mai turung aku.

¹⁷⁶ Aku bigandon mun biri adi manyap; ngapŭi jiroh meh aku, urun Mai, sabab aku mating nyibireu ukum-adat Mai.