MAZMUR 118 - Hakcipta - Biatah Bidayuh

Dua Nggen Trima Kaseh amai Mbŭh Manang

¹ Nggen trima kaseh di TUHAN, sabab Ayŭh kana, ka pinyirindu-I tan adu adu.

² Daya Israel patut nang, “Pinyirindu-I tan adu adu.”

³ Bara imam Tapa patut nang, “Pinyirindu-I tan adu adu.”

⁴ Sopŭrŭg adi nyambah Ayŭh patut nang, “Pinyirindu-I tan adu adu.”

⁵ Darŭm susah aku bagan TUHAN; Ayŭh nam aku ka pirupas aku.

⁶ TUHAN agi ngga aku, aku dŭh re taru; ani tungang daya ndai di aku?

⁷ TUHAN inŭh adi turung aku, ka aku re kiris pinganyu ku dog ngarah.

⁸ Kana dŭ nŭŭh sabah di TUHAN so nŭŭh bisangan di manusia.

⁹ Kana dŭ nŭŭh sabah di TUHAN so nŭŭh bisangan di pinguru manusia.

¹⁰ Bagŭ pinganyu maning aku; pak aku siŭ ngara ngga kuasa TUHAN!

¹¹ Ngara kirurung aku di barang parad; pak aku siŭ ngara ngga kuasa TUHAN!

¹² Ngara kirurung aku mun banyis, pak ngara rasu sau mun apui di randa reja; ngga kuasa TUHAN aku siŭ ngara.

¹³ Aku mbŭh bandar dog nyerang ka mbŭh sindŭk re arah, pak TUHAN turung aku.

¹⁴ TUHAN bada aku bikuasa ka bake; Ayŭh mbŭh nyiramat aku.

¹⁵ Dingah sirais gaŭn di bari daya Tapa amai mbŭh manang: “TUHAN mbŭh ndai pingandai bās-I!

¹⁶ Kuasa-I mbŭh bada ata manang, kuasa bās-I darŭm perang!”

¹⁷ Dŭh aku re kabŭs; pak aku re udip ka piagah kayuh adi TUHAN mbŭh ndai.

¹⁸ Ayŭh mbŭh bandar ngukum aku, pak Ayŭh gi-dŭh bada aku kabŭs.

¹⁹ Kuka yŭn ku tiban buwang Ramin TUHAN; aku re mŭrŭt ka nggen trima kaseh di TUHAN!

²⁰ Ati inŭh tiban buwang TUHAN; adŭ-i daya tŭnggŭn dapŭd mŭrŭt.

²¹ Aku muji Kaam, TUHAN, sabab Kaam dingah aku, sabab Kaam mbŭh nggen di aku pimanang.

²² Batuh adi tukang ramin taran amai dŭh biguna mbŭh jadi anŭ adi siabo biguna.

²³ Ati mbŭh pingandai TUHAN; mbŭh raru sangŭn-i di batŭh ta!

²⁴ Ati inŭh andu pimanang TUHAN; ja ata gaŭn, ja ata pawŭn!

²⁵ Nyiramat kieh, TUHAN, nyiramat kieh! Bada kieh mujur, O TUHAN!

²⁶ Isa-i Tapa nyiberkat sianŭ adi mandŭg ngga adŭn TUHAN! So Ramin TUHAN kieh nyiberkat kuu.

²⁷ TUHAN inŭh Tapa; Ayŭh kana ngga ata. Ngga daan daan kayuh di tangan ngan, piguru gawai ka baris maning mija-sambah.

²⁸ Kaam inŭh Tapa ku, ka aku nggen trima kaseh ka Kaam; aku re piagah bās Mai.

²⁹ Nggen trima kaseh di TUHAN, sabab Ayŭh kana, ka pinyirindu-I tan adu adu.