MAZMUR 109 - Hakcipta - Biatah Bidayuh

Pingadu Daya adi Darŭm Susah

¹ Aku muji Kaam, Tapa; dŭhnyah Kaam pajam!

² Daya ginaka ngga pingadong mbŭh nyerang aku. Ngara napŭ aku

³ ka ngara nang kayuh arap pasar aku, nyerang aku ngga dŭh biyŭn pada.

⁴ Ngara matah aku, sunggu aku rindu ngara ka mbŭh bidua yŭn ngara.

⁵ Ngara maras mandis ku ngga arap ka pinyirindu ku ngga pinyitiru.

⁶ Mien akim adi arap bada suba pinganyu ku, ka bada ndi so pinganyu adŭp-i nyarah ayŭh.

⁷ Isa-i ayŭh dog suba ka dog dapŭd sarah; isa-i dua-i ani dog nyirundeng pingandai sarah.

⁸ Isa-i pimudip-i rikas mungan; isa-i daya bŭkŭn tambit kraja-i!

⁹ Isa-i bara anak-i jadi anak tumang, ka sawŭn-i jadi dayung uban!

¹⁰ Isa-i bara anak-i jadi daya adi mite sidakah adi dŭh biyŭn ramin arŭn; isa-i ngara dog pibu so tibawang di yŭn ngara rŭŭ!

¹¹ Isa-i daya adi yŭn-i birutang tambit sopŭrŭg buat rata-i, ka isa-i daya saruh tambit sopŭrŭg kayuh adi-i dapŭd so turang udas-i.

¹² Isa-i mating daya kana ngga ayŭh bait kingat anak tumang-i.

¹³ Isa-i sopŭrŭg sesang-i kabŭs, ka isa-i dŭn-i dog kambŭt turap tuba bauh.

¹⁴ Isa-i TUHAN ingat arap tayung babuk-i ka dŭh kambŭt dosa sindŭ-i.

¹⁵ Isa-i TUHAN siraru ingat dosa ngara, pak isa-i ngara batur batur dog kambŭt!

¹⁶ Daya anŭ bŭn raan mandis ngga daya; ayŭh kisiis ka siŭ daya adi sirata, adi sangsara, adi rumuh.

¹⁷ Ayŭh suka bipangu — isa-i ayŭh dog pangu! Ayŭh dŭh suka nggen berkat — isa-i daya mating nyiberkat ayŭh!

¹⁸ Ayŭh sanang bipangu, sanang mun adŭp-i kibarui; isa-i pangu adŭp-i mŭrŭt pŭrŭng adŭp-i mun piin adi-i nok, ka paman mun inyo ka darŭm turang-i!

¹⁹ Isa-i pangu anŭ nutu ayŭh mun piraka ka siraru agi maning ayŭh mun abŭt kupong!

²⁰ TUHAN, ngukum pinganyu ku simŭnŭ — ngara adi nang pinganang arap rawan aku!

²¹ Pak TUHAN adi Raja ku, turung aku nanyam ka janji Mai, ka pirupas aku sabab pinyikana ngga pinyirindu Mai.

²² Aku sirata buang sangsara; aku kinaman ndŭg atin ku.

²³ Mun singangi di singumi andu aku mbŭh re miyap; aku dog poh mun kadis.

²⁴ Karŭb ku ramah amai dŭh man; aku ati kurit ngga turang adŭ.

²⁵ Kan daya kiris aku, ngara tawŭh aku; ngara kuting ubak ngamun aku.

²⁶ Turung aku, O TUHAN Tapa ku; sabab pinyirindu Mai adi dŭh bisa birubah, nyiramat aku!

²⁷ Bada pinganyu ku puan nang Kaam inŭh adi nyiramat aku.

²⁸ Ngara mangu aku, pak Kaam re nyiberkat aku. Isa-i bara adi kisiis aku dog ngarah, ka isa-i aku, urun Mai, jadi gaŭn.

²⁹ Isa-i pinganyu ku dog pimangŭh; isa-i mangŭh marut ngara keya ka jipo-ambu.

³⁰ Aku re ngga sirŭŭn bana nggen trima kaseh ka TUHAN; aku re muji Ayŭh di uruk daya bagŭ,

³¹ sabab Ayŭh ngibān daya sirata ka nyiramat ngara so tibaran adi nggen ukum kabŭs di ngara.