MAZMUR 107 - Hakcipta - Biatah Bidayuh

Surat adi Rimŭh Mazmur 107—150 Muji Pinyikana Tapa

¹ “Nggen trima kaseh di TUHAN, sabab Ayŭh kana; pinyirindu-I tan adu adu!”

² Pari nang pinganang anŭ ngga muji TUHAN, sopŭrŭg ngan adi-I mbŭh nyiramat. Ayŭh pirupas angān so pinganyu ngan

³ ka mbŭh taban angān pari so rais tami, so timor ngga barat, so utara ngga siratan.

⁴ Kada bigandon di tarun tana-pajam ka dŭh puan aran ka kupo di yŭn ngara bisa rŭŭ.

⁵ Ngara sibŭrŭk ka badŭh asŭng ka mbŭh dŭh tia biyŭn pingarap.

⁶ Komŭnŭ darŭm ngara susah ngara bagan TUHAN, ka Ayŭh nyiramat ngara so susah ngara.

⁷ Ayŭh nguru ngara di aran adi tŭnggŭn ka kupo di yun ngara bisa rŭŭ.

⁸ Ngara dŭh siŭn dŭh nggen trima kaseh di TUHAN amai pinyirindu-I adi dŭh bisa birubah, amai pingandai saruh adi Ayŭh mbŭh ndai yŭn ngara.

⁹ Ayŭh pimunos asŭng ngara adi badŭh ka paan ngara adi sibŭrŭk ngga kayuh kana.

¹⁰ Kada udip darŭm susah ngga darŭm karŭm, daya-takap sangsara dog muak ngga parik basi,

¹¹ sabab ngara rawan pesan Tapa Bisa-pŭrŭg ka tirawan atur adat-I.

¹² Ngara mbŭh kawŭk so kraja bat ngara; ngara re rabu, ka mating daya re turung.

¹³ Komŭnŭ darŭm ngara susah ngara bagan TUHAN, ka Ayŭh nyiramat ngara so pinyusah ngara.

¹⁴ Ayŭh pirupas ngara adi udip darŭm susah ngga darŭm karŭm ka matŭd parik basi ngara.

¹⁵ Ngara dŭh siŭn dŭh nggen trima kaseh di TUHAN amai pinyirindu-I adi dŭh bisa birubah, amai kayuh saruh adi-I mbŭh ndai yŭn ngara.

¹⁶ Ayŭh nyirubuh tiban timaga ka mata parang basi.

¹⁷ Kada budo, sangsara sabab dosa ngara ka sabab arap ngara;

¹⁸ ngara tiru kiris pinguman ka mbŭh sindŭk re kabŭs.

¹⁹ Komŭnŭ darŭm susah ngara bagan TUHAN, ka Ayŭh nyiramat ngara so pinyusah ngara.

²⁰ Ayŭh pibua ngara ngga pinganang-I ka nyiramat ngara so rubang kubur.

²¹ Ngara dŭh siŭn dŭh nggen trima kaseh di TUHAN amai pinyirindu-I adi dŭh bisa birubah, amai kayuh saruh adi-I mbŭh ndai yŭn ngara.

²² Ngara dŭh siŭn dŭh nggen trima kaseh di Ayŭh ngga sadis, ka ngga ragu pinyigaŭn dŭh siŭn dŭh kidaan sopŭrŭg kayuh adi Ayŭh mbŭh ndai.

²³ Kada birayar mutas rawŭt pakai kapar, kudip adŭp-i ngga pimudip di rawŭt.

²⁴ Ngara kiris kayuh adi TUHAN tungang ndai, pingandai saruh-I di rawŭt.

²⁵ Ngga pinganang-I, ka sabak adi bangat rasu poh ka ndai girumbang.

²⁶ Kapar tikatuh ka au-tarun, rabu ka mŭrŭt ka rasan rawŭt. Di tika adi mun anŭ bara adi pimanu kapar mbŭh raru taru;

²⁷ ngara sikak ka tibabeu mun daya mabuk — sopŭrŭg pimandai ngara mbŭh dŭh tipakai.

²⁸ Komŭnŭ darŭm susah ngara bagan TUHAN, ka Ayŭh nyiramat ngara so pinyusah ngara.

²⁹ Ayŭh bada sabak ribut rŭŭ, ka girumbang pajam.

³⁰ Ngara gaŭn amai-i mbŭh rŭŭ, ka Ayŭh taban ngara ka pinyigŭn adi raan ngara ngga siramat.

³¹ Ngara dŭh siŭn dŭh nggen trima kaseh di TUHAN amai pinyirindu-I adi dŭh bisa birubah, amai kayuh saruh adi Ayŭh mbŭh ndai yŭn ngara.

³² Ngara dŭh siŭn dŭh piagah bās-I kan daya bagŭ tikuruk ka muji Ayŭh di sirung jawin bara pinguru.

³³ TUHAN bada sungi badŭh mun tarun tana-pajam ka bada rubang piin jadi tana badŭh.

³⁴ Ayŭh bada tana gamu jadi tarun tana-pajam adi pide sabab udip ginaka ngara adi rŭŭ dieh.

³⁵ Ayŭh marik tarun tana-pajam bada jadi pagong piin ka tarun tana badŭh jadi yŭn piin aman so rubang.

³⁶ Ayŭh bada daya adi sibŭrŭk rŭŭ diginŭ, ka ngara pijog kupo yŭn rŭŭ.

³⁷ Ngara biteya ka purun anggor ka dapŭd pingatŭm adi kana.

³⁸ Ayŭh nyiberkat daya-I, ka ngara biyŭn bagŭ anak; Ayŭh bada kaban sapi ngara dŭh kurang.

³⁹ Kan daya Tapa dog ngarah ka dog pimangŭh amai dog kinanyuh ka dog pijera,

⁴⁰ Ayŭh kiren baji-I di daya adi kinanyuh ngara ka bada ngara bigandon di tarun tana-pajam.

⁴¹ Pak Ayŭh pirupas ngara adi sirata so pinyusah, ka bada rawang ngara bitambah mun kaban kaban biri.

⁴² Daya tŭnggŭn kiris kayuh anŭ ka gaŭn, pak sopŭrŭg daya ginaka jadi pajam.

⁴³ Isa-i ngara adi bijak bipikir di kayuh anŭ; isa-i ngara bipikir di pinyirindu TUHAN adi dŭh bisa birubah.