MAZMUR 106 - Hakcipta - Biatah Bidayuh

TUHAN Mandis ngga Daya-I

¹ Muji meh TUHAN! Nggen trima kaseh di TUHAN, sabab Ayŭh kana; pinyirindu-I tan adu adu.

² Asi tungang kidaan sopŭrŭg pingandai bās adi mbŭh-I ndai? Asi tungang muji Ayŭh ngga sukup-i?

³ Sanang inŭh ngara adi tunda pinyipesan-I, adi siraru ndai kayuh adi batur.

⁴ Ingat aku, TUHAN, kan Kaam turung daya Mai; nyiramat gŭh aku, kan Kaam nyiramat ngara.

⁵ Bada aku kiris daya Mai mujur ka sua darŭm udip sanang bangsa Mai, darŭm gaŭn mingangŭn ngara adi tung jamai.

⁶ Kieh mbŭh bidosa nimun tayung-babuk ami; kieh mbŭh ginaka buang arap.

⁷ Tayung-babuk ami di Egypt dŭh mirati pingandai saruh Tapa; ngara kambŭt kudu kari Ayŭh kiren pinyirindu-I di ngara, ka ngara rawan Ayŭh adi Bisa-pŭrŭg di Rawŭt Bireh.

⁸ Pak Ayŭh nyiramat ngara, nimun adi muko-I janji, ngga kiren kuasa bās-I.

⁹ Ayŭh mritah Rawŭt Bireh bada badŭh, ka-i sawŭ badŭh; Ayŭh nguru daya-I mutas di tunduh tana badŭh.

¹⁰ Ayŭh nyiramat ngara so daya adi tiru di ngara; Ayŭh pirupas ngara so pinganyu ngara.

¹¹ Pak piin pirŭnggŭd pinganyu ngara; ndi mating gŭh ngara dŭm.

¹² Komŭnŭ daya-I sabah janji-I ka biragu nang ragu puji di Ayŭh.

¹³ Pak ngara rikas kambŭt kayuh adi Ayŭh mbŭh ndai ka dŭh kajŭn pinyitayan so Ayŭh kan re ndai kayuh.

¹⁴ Ngara mbŭh natis bagŭ masam kayuh kan ngara di tarun tana-pajam ka suba Tapa;

¹⁵ jadi Ayŭh nggen di ngara kayuh adi ngara mite, pak Ayŭh pait gŭh andam adi bisā di dupan ngara.

¹⁶ Diginŭ di tarun tana-pajam ngara sina di Moses ngga Aaron, urun kudus TUHAN.

¹⁷ Komŭnŭ tana tikuka ka tŭrŭn Dathan ka kubur Abiram ngga rawang-i;

¹⁸ apui nyatŭk bara pinunda ngara ka sigot ngara adi ginaka.

¹⁹ Ngara ndai anak sapi mas di Sinai ka nyambah tibudo anŭ;

²⁰ ngara nukar bragah Tapa ngga patong dāng adi man kupai.

²¹ Ngara kambŭt Tapa adi nyiramat ngara ngga pingandai bās-I di Egypt.

²² Munki masam saruh kayuh ndai-I diginŭ! Munki masam nginga nŭŭh kiris kayuh di Rawŭt Bireh!

²³ Kan Tapa nang adŭp-I re pirabur daya-I, urun adi-I ko mien, Moses, mijog ka matah Tapa ka bada baji-I dŭh pirabur ngara.

²⁴ Komŭnŭ ngara abah tambit tana adi mandis anŭ, sabab ngara dŭh sabah di janji Tapa.

²⁵ Ngara rŭŭ darŭm bari ngara ka mingungut ka abah dingah pinganang TUHAN.

²⁶ Jadi ngga payu Ayŭh bakan ngara nang adŭp-I re bada ngara kabŭs di tarun tana-pajam

²⁷ ka bada sesang ngara papar sasah di dupan daya adi dŭh puan Tapa, ka bada ngara kabŭs di rais tami.

²⁸ Komŭnŭ di Peor, daya Tapa sua nyambah Baal, ka man sadis adi dog jugan ka tapa tapa adi kabŭs.

²⁹ Ngara kinuas TUHAN ngga urah ngara, ka andam adi bisā nyerang ngara.

³⁰ Pak Phinehas mijog ka ngukum ngara adi sarah, ka sesak-andam anŭ rŭŭ.

³¹ Amai kayuh anŭ Ayŭh dog ingat so nganŭ ka re dog ingat adu adu.

³² Di rubang piin di Meribah daya bada TUHAN baji, ka Moses mbŭh susah bada pingandai ngara.

³³ Ngara bada ayŭh raru baji ndŭg ka ayŭh minyu dŭh so bipikir.

³⁴ Ngara dŭh siŭ daya adi dŭh puan Tapa, nimun adi TUHAN mbŭh pesan di ngara,

³⁵ pak ngara banan sawan ngga ngara ka tunda aran pimudip daya adi dŭh puan Tapa.

³⁶ Daya Tapa nyambah tibudo, ka ati adi bada ngara dog pinyirusag.

³⁷ Ngara jugan anak dari ngga anak dayung ngara ndu sadis ka tibudo daya Canaan.

³⁸ Ngara siŭ bara anak-sŭ adi dŭh sarah, ka tarun tana mbŭh sembar bada bara pinyiŭ anŭ.

³⁹ Ngara kinais adŭp ngara ngga pingandai ngara buang dŭh tŭtŭd di Tapa.

⁴⁰ Jadi TUHAN baji di daya-I; ka sidot di ngara.

⁴¹ Ayŭh tagan ngara ka darŭm kuasa bangsa daya, ka pinganyu ngara mritah ngara.

⁴² Ngara dog kinanyuh pinganyu ngara ka mbŭh dog nguasa ngara.

⁴³ Siraru TUHAN pirupas daya-I, pak ngara raan dŭ rawan Ayŭh ngga bada dosa ngara jadi rabis bagŭ.

⁴⁴ Pak TUHAN dingah ngara kan ngara mite turung, ka Ayŭh ngatin susah ngara.

⁴⁵ Yŭn kana ngara Ayŭh ingat simanya-I, ka sabab pinyirindu bās-I Ayŭh masi di ngara.

⁴⁶ Ayŭh bada sopŭrŭg adi kinanyuh ngara masi di ngara.

⁴⁷ Nyiramat kieh, O TUHAN Tapa ami, ka taban kieh pari so dupan dudu bangsa, isa kieh bisa nggen trima kaseh ka muji adŭn kudus Mai.

⁴⁸ Puji ka TUHAN, Tapa Israel; muji Ayŭh madin ngga ndŭg situi tui! Bada sopŭrŭg nang, “Amen!” Muji meh TUHAN!