MAZMUR 10 - Hakcipta - Biatah Bidayuh

Dua Mite Pinyitŭnggŭn

¹ O TUHAN, mani Kaam paŭh jo? Mani Kaam sukan adŭp Mai kan kieh darŭm pito?

² Daya adi ginaka mingangŭn ka kinanyuh daya sirata; nakap ngara di jarat adi adŭp ngara tŭŭn.

³ Daya ginaka mingangŭn di pinyiraan arap ngara; daya adi raka mangu ka tirawan TUHAN.

⁴ Daya ginaka dŭh piduri TUHAN; ngga uap-sambuh ngara, ngara pikir Tapa dŭh biguna.

⁵ Daya adi ginaka mujur di sopŭrŭg kayuh. Ngara dŭh dapŭd mirati ukum Tapa; ngara tawŭh pinganyu ngara.

⁶ Ngara nang di adŭp ngara, “Ata dŭh re arah; ata dŭh re dog nyatŭk pinyusah.”

⁷ Pinganang ngara puno ngga pangu, kadong, ka tatang; ngara rikas piruah pinganang tiru, ka pinganang adi arap.

⁸ Ngara sukan adŭp ngara di anak anak kupo, tuman daya adi dŭh sarah an-i siŭ. Ngara nyibatŭh daya adi rumuh;

⁹ ngara kajŭn di tarun yŭn ngara bisukan keya ka singah. Ngara tuman daya adi sirata; ngara nakap ngara ngga jarat ngara ka taban ngara ngga bu.

¹⁰ Adi rumuh mbŭh randŭk dog nyatŭk; pinyiganas mbŭh ngarah ngara.

¹¹ Adi ginaka nang di adŭp ngara, “Tapa dŭh piduri! Ayŭh mbŭh tŭŭp batŭh-I ka dŭh kiris ata!”

¹² O TUHAN, ngukum ngara adi ginaka! Ingat ngara adi sangsara!

¹³ Simuki daya adi ginaka re bisa ngamun Tapa ka nang di adŭp ngara, “Ayŭh dŭh re ngukum aku”?

¹⁴ Pak Kaam taŭn kiris; Kaam kiris pinyusah ngga sangsara daya ka ari sidia an turung. Adi dŭh biyŭn nasip bisangan di Kaam; Kaam ari turung daya adi sirata.

¹⁵ Mata kuasa daya ginaka ngga daya adi arap; ngukum ngara amai sarah adi mbŭh ngara ndai ndŭg ka ngara dŭh tia ndai-i.

¹⁶ TUHAN inŭh raja adi ndŭg situi tui. Ngara adi nyambah tapa tapa adi bŭkŭn re miyap so tarun tana-I.

¹⁷ Kaam re dingah, O TUHAN, dua daya adi pirapat adŭp; Kaam re nggen pingatat di ngara.

¹⁸ Kaam re dingah sien daya adi dog kinanyuh ngga sien bara anak tumang; Kaam re ngibān ngara, isa manusia adi bisa kabŭs dŭh re tia pitaru ngara.