MATTHEW 8 - Hakcipta - Biatah Bidayuh

Jesus Pibua ndi naan Daya naman Andam Kurit adi Bisā

¹ Kan Jesus mūn so sandah anŭ, bara daya bagŭ tunda Ayŭh.

² Komŭnŭ ndi naan daya adi naman andam kurit adi bisā mandŭg tudu Ayŭh, sidikang di sirung jawin-I, ka nang, “Tuan, kambŭi Kaam raan, Kaam dapŭd bada aku bisig.”

³ Jesus ton tangan-I ka tama ayŭh. “Aku raan,” Ayŭh nam. “Bisig meh!” Jam anŭ gŭh daya anŭ bua so andam-i.

⁴ Komŭnŭ Jesus nang di Ayŭh, “Ingat! Dŭhnyah kidaan di tadŭ tadŭ daya, pak di ka imam ka bada ayŭh natu kuu sawŭ mbŭh bua. Ka ngga kiren adŭp mu mbŭh bua di daya bagŭ, di jugan sadis anŭ nimun adi ko Moses pesan.”

Jesus Pibua Daya-gaji Pingubak Soldadu daya Rome

⁵ Kan Jesus mŭrŭt Capernaum, ndi naan Pingubak Soldadu daya Rome bidapŭd ngga Ayŭh ka mite turung so Ayŭh:

⁶ “Tuan, daya-gaji ku birandam ka guring di arŭn, dŭh tungang kimitak buang mbŭh sangsara.”

⁷ “Aku re di pibua ayŭh,” Jesus nang.

⁸ “Dŭhsah Tuan,” pingubak soldadu anŭ nang. “Aku dŭh sukup kana re bada Kaam mŭrŭt ka darŭm ramin ku. Minyu adŭ, ka daya-gaji ku bisa bua.

⁹ Aku ati gŭh, daya adi ribo kuasa bara pingibās, ka aku biyŭn soldadu di ribo ku. Aku mritah siati, ‘Panu!’ ka-i panu; aku mritah siajeh, ‘Mandŭg!’ ka-i mandŭg; ka aku mritah urun ku, ‘Ndai ati!’ ka ayŭh ndai-i.”

¹⁰ Kan Jesus dingah sakanŭ, Ayŭh gŭgŭh ka nang di bara daya adi tunda Ayŭh, “Aku kidaan di angān, gi-bŭn Aku dapŭd daya di Israel biyŭn pinyabah mun ati.

¹¹ Puan meh! bagŭ re mandŭg so timor ngga barat ka guru ngga Abraham, Isaac, ka Jacob darŭm gawai darŭm Ong Bauh Tapa.

¹² Pak ngara adi patut kinyam Pinyipritah Tapa re dog taran ka yŭn karŭm, di yŭn ngara re sien buang sangsara.”

¹³ Komŭnŭ Jesus nang di pingubak soldadu anŭ, “Panu maad; anŭ adi kuu sabah re jadi di kuu.” Ka daya-gaji pingubak soldadu anŭ bua di jam anŭ.

Jesus Pibua bagŭ Daya

¹⁴ Jesus di ka ramin Peter, ka diginŭ Ayŭh kiris dinŭh Peter guring di ambok sungoh.

¹⁵ Ayŭh tama tangan-i; sungoh anŭ bu so ayŭh, ka ayŭh makat ka piguru ngidang Ayŭh.

¹⁶ Kan-i mbŭh singumi andu, daya taban ka Jesus bagŭ daya adi dog mŭrŭt umot. Jesus pibu roh roh arap anŭ ngga ndi bang piminyu ka pibua sopŭrŭg ngara adi birandam.

¹⁷ Ayŭh ndai simŭnŭ ngga bada jadi bitŭtŭk kayuh adi nabi Isaiah ko nang, “Adŭp-I tambit sangsara ta ka taban andam ta ngga bu.”

Ngara adi Raan jadi Pinunda Jesus

¹⁸ Kan Jesus kiris bara daya bagŭ maning adŭp-I, Ayŭh nggen ukum bada bara murid-I di ka pah mandi danu anŭ.

¹⁹ Ndi naan gurū Ukum-adat Jahudi mandŭg tudu Ayŭh. “Gurū,” ayŭh nang, “Aku mbŭh sidia an tunda Kaam ka barang yŭn Kaam di.”

²⁰ Jesus nam ayŭh, “Bisirŭh biyŭn rubang, manuk biyŭn sarin, pak Anak Manusia dŭh biyŭn tarun yŭn guring ka rŭŭ-paya.”

²¹ Adi bŭkŭn, adi mbŭh jadi murid, nang, “Tuan, bada aku pari diŭ di ngubur sama ku.”

²² “Tunda Aku,” Jesus nam, “tandah daya adi kabŭs ngubur daya-i adi kabŭs.”

Jesus Pirŭŭ Sabak Ribut

²³ Jesus mŭrŭt arud, ka murid murid-I tunda Ayŭh.

²⁴ Ka gŭgŭh agi sabak ribut maka danu, ka arud ngara mbŭh re an kaŭm. Pak Jesus aŭn bŭŭs.

²⁵ Murid murid-I tudu Ayŭh ka kies Ayŭh. “Tuhan, nyiramat ata!” ngara nang. “Ata re rŭnggŭd!”

²⁶ “Mani angān tikaran?” Jesus nam. “Mani angān kurang sabah di Aku?” Jesus makat ka mritah sabak ribut ngga girumbang da rŭŭ, ka sopŭrŭg-i mbŭh tanang.

²⁷ Sopŭrŭg ngara mbŭh inga inga. “Manusia ani ati?” ngara nang. “Ndŭg ka sabak ribut tunda pinganang-I!”

Jesus Pibu Bara Umot so Duwŭh naan Daya

²⁸ Kan Jesus mandŭg ka tarun tana Gadara di pah mandi danu anŭ, Ayŭh bidapŭd ngga duwŭh naan daya adi mandŭg so kubur diginŭ. Ngara anŭ dog mŭrŭt umot ka mbŭh raru mangah ndŭg ka mating daya birani panu kadŭg aran anŭ.

²⁹ Ngara rasu nyirais, “Ani re Mai ndai di tunduh kieh, Kaam adi Anak Tapa? Kaam mandŭg an ngukum kieh diŭ so tipuh-i kah?”

³⁰ Dŭh jo so nŭ agi kaban ayo aŭn man.

³¹ Jadi bara umot anŭ mite so Jesus, “Kambŭi Kaam re pibu kieh so ti, bada kieh di ka kaban ayo ajeh.”

³² “Di,” Jesus nang di ngara; jadi ngara ruah ka di mŭrŭt bara ayo anŭ. Ndi kaban ayo anŭ bikaduh mūn jenjang di ka danu ka rŭnggŭd.

³³ Bara adi tukang jaga ayo bikaduh bu di mŭrŭt kupo, di yŭn ngara rasu nyidundan kayuh adi mbŭh jadi di duwŭh naan daya anŭ adi ko dog mŭrŭt bara umot.

³⁴ Jadi sopŭrŭg daya so kupo anŭ ruah di dapŭd Jesus; ka kan ngara kiris Ayŭh, ngara mite Ayŭh bu so tarun tana anŭ.