MATTHEW 7 - Hakcipta - Biatah Bidayuh

Nyarah Daya

¹ “Dŭhnyah nyarah daya, isa Tapa dŭh nyarah angān,

² amai Tapa re nyarah angān nanyam ka gaya angān nyarah daya, ka Ayŭh re pakai di angān atur adi angān pakai di daya.

³ Mani meh angān truti taŭn adi di batŭh dingan ngan ka dŭh rada apŭg kayuh di batŭh adŭp ngan?

⁴ Simuki angān bisa nang di dingan ngan, ‘Bah, bada aku kadi taŭn so batŭh mu,’ darŭm adŭp ngan biyŭn apŭg kayuh di batŭh adŭp ngan?

⁵ Angān pingadong! Diŭ nŭŭh kadi apŭg kayuh so batŭh adŭp ngan, ka komŭnŭ ka angān tungang granan kiris ka kadi taŭn so batŭh dingan ngan.

⁶ “Dŭhnyah nggen kayuh kudus di kasong, ndong kah te ayŭh nyangang adŭ angān. Dŭhnyah seu gomara ngan di ayo, ndong kah te ayŭh bidigang dieh.

Mite, Jiroh, Gutog

⁷ “Mite, ka angān re kambat; jiroh, ka angān re dapŭd; gutog, ka tiban re tikuka yŭn ngan.

⁸ Amai barang naan daya adi mite re kambat, ka tadŭ tadŭ daya adi jiroh re dapŭd, ka tiban re tikuka yŭn daya adi gutog.

⁹ An kah angān adi sama nggen di anak ngan batuh kan ayŭh mite ruti?

¹⁰ Puan kah nggen jippŭh kan ayŭh mite iken?

¹¹ Angān adi arap, angān puan adŭp ngan nggen kayuh kana di anak ngan. Ka rabis-i Sama ngan adi di shorga, an nggen kayuh kana di ngara adi mite so Ayŭh!

¹² “Ndai yŭn daya kayuh adi angān raan daya ndai yŭn ngan: ati inŭh rati Ukum-adat Moses ka sopŭrŭg ajar bara nabi.

Tiban adi Sapit

¹³ “Mŭrŭt so tiban adi sapit, sabab tiban neraka agi bayah ka aran adi di kamanŭ agi sanang, ka mbŭh bagŭ daya kadŭg-i.

¹⁴ Pak tiban nuju udip adi sawŭ adi tan adu adu agi sapit ka aran adi di kamanŭ agi mbar, ka daya dŭh bagŭ dapŭd-i.

Tŭngŭn kayuh ngga Buwa-I

¹⁵ “Jaga adŭp ngan so bara nabi kadong; ngara mandŭg ka angān mun biri tura ka sapa, pak tura ka darŭm ngara mbŭh keya ka kasong tarun.

¹⁶ Angān puan ngara so kayuh adi ngara ndai. Tŭngŭn reja dŭh buān buwa anggor, ka bakos dŭh buān buwa ara.

¹⁷ Tŭngŭn kayuh adi kana buān buwa adi kana, pak tŭngŭn kayuh adi arap buān buwa adi arap.

¹⁸ Tŭngŭn kayuh adi kana dŭh bisa buān buwa adi arap, ka tŭngŭn kayuh adi arap dŭh bisa buān buwa adi kana.

¹⁹ Ka tadŭ tadŭ tŭngŭn kayuh adi dŭh buān buwa adi kana dog tabŭng ka dog taran ka darŭm apui.

²⁰ Jadi meh, angān re puan nabi kadong so kayuh adi ngara ndai.

Aku Bŭn Puan Angān

²¹ “Dŭh sopŭrŭg daya adi bagan Aku ‘Tuhan, Tuhan’ re kinyam Pinyipritah Tapa, adŭ-i ngara adi ndai pinyiraan Sama Ku adi di shorga.

²² Di Andu Bisara, bagŭ daya re nang di Aku, ‘Tuhan, Tuhan! Ngga adŭn Mai kieh ko nyuse agah so Tapa, ngga adŭn Mai kieh pibu bagŭ umot ka ndai bagŭ pingandai-nginga!’

²³ Nganŭ Aku re nang di ngara, ‘Aku dŭh puan angān. Bu so Aku, angān daya adi ginaka!’

Tukang Ramin adi Bijak ngga Tukang Ramin adi Budo

²⁴ “Jadi meh, barang naan daya adi dingah pinganang Ku ati ka tunda-i agi keya ka daya adi bijak adi pijog ramin-i di tunduh batuh.

²⁵ Andu ujen, uba mandŭg, ka sabak ribut poh maka ramin anŭ. Pak-i dŭh tumbang, sabab-i dog pijog di tunduh batuh.

²⁶ “Pak barang naan daya adi dingah pinganang Ku ati ka dŭh tunda-i agi keya ka daya adi budo adi pijog ramin-i di tunduh sumat.

²⁷ Andu ujen, uba mandŭg, sabak ribut poh maka ramin anŭ, ka-i tumbang. Ka birasa inŭh pinyitumbang-i!”

Kuasa Jesus

²⁸ Kan Jesus muko nang sopŭrŭg kayuh anŭ, bara daya bagŭ mbŭh inga inga di gaya-I ngajar.

²⁹ Ayŭh dŭh mun bara gurū Ukum-adat Jahudi; Ayŭh ngajar ngga kuasa.