MATTHEW 6 - Hakcipta - Biatah Bidayuh

Ajar pasar Pinganggen yŭn Pinurung

¹ “Ingat meh, dŭhnyah angān ndai kraja adat di sirung jawin daya bagŭ isa daya kiris pingandai ngan. Kambŭi angān ndai simŭnŭ, angān dŭh re kambat upah so Sama ngan adi di shorga.

² “Jadi kan angān nggen kayuh di daya adi sutok, dŭhnyah ndai-i ngga atin mirawa, nimun bara pingadong ndai urah-i di ramin simayang ka di aran passar. Ngara ndai simŭnŭ isa daya muji ngara. Puan meh, ngara mbŭh dog bayar ngga sipuno-i.

³ Pak kan angān turung daya adi sutok, ndai-i darŭm bisukan ndŭg ka adŭp jerā ngan dŭh gŭh puan.

⁴ Mun anŭ pingandai ngan mbŭh darŭm bisukan. Ka Sama ngan, adi kiris pingandai ngan darŭm bisukan, re ngupah angān.

Ajar pasar Simayang

⁵ “Kan angān simayang, dŭhnyah mun daya adi pingadong! Ngara suka mijog simayang di ramin simayang ka di sikuh tarun di aran passar, isa daya kiris ngara. Puan meh, ngara mbŭh dog bayar ngga sipuno-i.

⁶ Pak kan angān simayang, di ka birit ngan, tŭŭp tiban, ka bidua ka Sama ngan adi dŭh tatŭng. Ka Sama ngan, adi kiris pingandai ngan darŭm bisukan, re ngupah angān.

⁷ “Kan angān simayang, dŭhnyah pakai bang bang piminyu adi dŭh biguna, mun daya di dŭh puan Tapa, adi pikir tapa-i an dingah amai dua-i ambu.

⁸ Dŭhnyah mun ngara. Sama ngan mbŭh puan ani adi angān raan sibayuh angān mite so Ayŭh.

⁹ Sakati inŭh angān patut bidua: ‘Sama ami di shorga: Isa-i adŭn kudus Mai dog kibās.

¹⁰ Kaam inŭh adi raja ami. Isa-i Kaam mritah di ong, ka isa-i pinyiraan Mai jadi di ong nimun di shorga.

¹¹ Nggen di kieh pinguman adi kieh biguna di andu ati.

¹² Apun sarah ami, nimun kieh apun sarah daya di kieh.

¹³ Dŭhnyah tandah kieh ramah darŭm pinyabah di tika kieh dog pisuba, pak grindung kieh so Siarap.’ [Amai Kaam inŭh Raja adi bikuasa adi dapu bragah ndŭg situi tui. Amen.]

¹⁴ “Kambŭi angān apun daya adi ndai sarah di angān, Sama ngan di shorga re apun gŭh angān.

¹⁵ Pak kambŭi angān dŭh an apun daya, Sama ngan dŭh gŭh re apun sarah ngan.

Ajar pasar Bipusa

¹⁶ “Kan angān bipusa, dŭhnyah kiren raŭn ngan susah mun ngara adi pingadong. Ngara ndai adŭp-i mun adi sangsara isa daya puan ngara bipusa. Puan meh, ngara mbŭh dog bayar ngga sipuno-i.

¹⁷ Kan angān bipusa, kuas jawin ngan ka nyinod ubok ngan,

¹⁸ isa daya dŭh puan angān bipusa, adŭ-i Sama ngan, adi dŭh tatŭng, puan. Ka Sama ngan, adi kiris pingandai ngan darŭm bisukan, re ngupah angān.

Buat-Rata di Shorga

¹⁹ “Dŭhnyah nugung buat-rata ngan di ong, di yŭn gŭgŭt ngga tagar bisa pirusak, ka pirupak bisa mirupak ka naku.

²⁰ Pak, nugung buat-rata ngan di shorga, di yŭn gŭgŭt ka tagar dŭh bisa pirusak, ka pirupak dŭh bisa mirupak ka naku.

²¹ Amai atin ngan re siraru agi di yŭn buat-rata ngan.

Prita Pŭrŭng

²² “Batŭh agi keya ka prita yŭn pŭrŭng. Kambŭi batŭh ngan kana, ndi pŭrŭng ganan ngan agi puno ngga jawa;

²³ pak kambŭi batŭh ngan dŭh kana, pŭrŭng ngan inŭh darŭm karŭm. Jadi kambŭi jawa adi darŭm ngan mbŭh karŭm, mbŭh karŭm pipet inŭh ayŭh.

Tapa ngga Buat-rata

²⁴ “Mating daya bisa jadi urun duwŭh naan tuan; ayŭh re tiru di sianŭ ndi ka rindu di sianŭ ndi; ayŭh re tŭtŭd ngga sianŭ ndi ka ngamun sianŭ ndi. Angān dŭh bisa bituan di Tapa buang bituan di duit.

²⁵ “Ati inŭh sabab Aku kidaan di angān: dŭhnyah susah pasar pinguman ka kayuh nok adi angān biguna ngga kudip adŭp ngan, puan kah piraka yŭn pŭrŭng ngan. Dŭh kah asŭng adi rabis biguna so pinguman? Ka dŭh kah pŭrŭng adi rabis biguna so piraka?

²⁶ Tingga manuk: ngara dŭh nyipurun, ngatŭm ka ngisi panggau; babŭ gŭh Sama ngan adi di shorga sita ngara! Dŭh kah angān rabis brega so manuk?

²⁷ Tungang kah angān udip tui nisit so ka gapang pasar pimudip?

²⁸ “Ka mani meh gapang pasar piraka? Tingga munki masam bunga tarun udip: ngara dŭh nyiraja puan kah ndai piraka yŭn adŭp-i.

²⁹ Pak Aku kidaan di angān, Raja Solomon ngga sopŭrŭg pinyikaya-i dŭh gŭh re biyŭn piraka-i adi brimun ramus ngga ndi so dudu bunga anŭ.

³⁰ Adŭp Tapa inŭh adi sita kupai, kupai adi agi digiti andu ati ka mating sipagi, dog badang di apui. Dŭh kah Ayŭh rabis an sita angān? Angān kurang sabah di Aku!

³¹ “Jadi dŭhnyah meh susah: ‘Ani re ku man? Ani re ku nok? Ani re ku pakai?’

³² Daya adi dŭh puan Tapa inŭh bipito pasar kayuh adi mun anŭ. Sama ngan adi di shorga puan angān biguna di sopŭrŭg kayuh anŭ.

³³ Pak mbit bat di Pinyipritah Tapa ka ndai pinyiraan-I, ka Ayŭh re nggen di angān sopŭrŭg kayuh anŭ.

³⁴ Jadi meh, dŭhnyah gapang pasar andu sipagi; amai mbŭh sukup yŭn adŭp-i pinyusah di andu sipagi. Dŭhsah nambah pinyusah adi agi di barang andu.