MATTHEW 3 - Hakcipta - Biatah Bidayuh

Ajar John Pembaptisa

¹ Di tika anŭ John Pembaptisa di ka tarun tana-pajam Judea ka piguru ngajar.

² “Dŭh tia bidosa pak marik pimudip ngan pari ka Tapa,” ayŭh nang, “sabab dŭm dŭh tui Tapa re mritah!”

³ John inŭh sianŭ adi nabi Isaiah nang kan ayŭh minyu nang, “Agi daya nyirais di tarun tana-pajam, ‘Sidia aran yŭn Tuhan; bada tŭnggŭn aran yŭn-I panu!’ ”

⁴ Piraka John dog ndai so buruh onta; ayŭh pakai bŭŭng kupong dog ndai so anyit, ka pinguman-i kadis ngga ju banyis tarun.

⁵ Daya mandŭg tudu ayŭh so Jerusalem, so ndi tarun tarun tana darŭm utung rais Judea, ka so ndi abong tarun tana maning Yang Jordan.

⁶ Ngara ngaku dosa ngara, ka ayŭh baptisa ngara di Yang Jordan.

⁷ Kan John kiris bagŭ daya Pharisee ka daya Sadducee mandŭg ka yŭn-i an kambat baptisa, ayŭh nang di ngara, “Angān jippŭh, asi kidaan di angān nang angān bisa bu mangān ukum adi Tapa re pait?

⁸ Ndai pingandai adi kiren adŭp ngan mbŭh dŭh tia bidosa adi kiren angān mbŭh marik pimudip ngan pari ka Tapa.

⁹ Ka dŭhnyah pikir, ngga pinganang ngan adi nang Abraham babuk ngan, angān tungang bu mangān ukum. Aku kidaan di angān, Tapa bisa, so batuh ati ndai sesang yŭn Abraham!

¹⁰ Kapak mbŭh dog sidia ngga tabŭng tŭngŭn kayuh di uat-i; barang tŭngŭn kayuh adi dŭh buān buwa adi kana re dog tabŭng ka dog taran ka darŭm apui.

¹¹ Aku baptisa angān ngga piin ngga kiren angān mbŭh dŭh tia bidosa, pak sianŭ adi mandŭg sundis so aku re baptisa angān ngga Roh Kudus ka apui. Ayŭh agi bās dŭ so aku; ka aku dŭh sadang kana re sirabi ka tukang taban kasut-I.

¹² Ayŭh biyŭn tapan di tangan-I ngga napan ka nyidŭrŭ gandom so aping. Ayŭh re nguruk gandom adi bisig ka darŭm panggau, pak aping Ayŭh re badang di apui adi dŭh bisa pura.”

Jesus dog Baptisa

¹³ Di tika anŭ Jesus mandŭg so Galilee ka tudu John di Yang Jordan, an kambat baptisa so ayŭh.

¹⁴ Pak John suba bada Ayŭh nukar pikir-I. “Aku patut kambat baptisa so Kaam,” John nang, “gŭt-i Kaam adi mandŭg tudu aku!”

¹⁵ Pak Jesus nam ayŭh, “Awang adŭp-i simŭnŭ madin. Amai simŭnŭ inŭh ata bisa pijadi sopŭrŭg pinyiraan Tapa.” Jadi John situju.

¹⁶ Kan-I ko dog baptisa, Ayŭh makat so piin. Rangit tikuka ka-I kiris Roh Kudus mūn mun manuk asang ka mbap di adŭp-I.

¹⁷ Komŭnŭ agi dog dingah sirŭŭn Tapa minyu, nang, “Ati inŭh Anak nyirot Ku, di Ayŭh asŭng Ku munos.”