MATTHEW 28 - Hakcipta - Biatah Bidayuh

Pinyimakat Jesus So Kabŭs

¹ Ripas andu Sabbath, arong siri jawa di andu Minggu, Mary Magdalene ngga Mary anŭ ndi matak di tingga kubur anŭ.

² Gŭgŭh tana agi bana bigugoh, ka malaikat Tuhan agi mūn so shorga, di ngana batuh anŭ, ka guru dieh.

³ Raŭn gayŭn-i mun kijat, ka piraka-i buda mun salju.

⁴ Bara soldadu adi jaga mbŭh raru taru ndŭg ka kimŭtŭr ka rasu mun adi kabŭs.

⁵ Malaikat anŭ minyu di dayung dayung anŭ, “Angān dŭhsah taru,” ayŭh nang. “Aku puan angān jiroh Jesus, adi ko dog masak di rigang.

⁶ Ayŭh mating digiti; Ayŭh mbŭh dog pakat so kabŭs, nimun adi-I ko kidaan. Mandŭg kamati ka tingga tarun yŭn-I ko dog piguring.

⁷ Panu madin rikas di kidaan di bara murid-I, ‘Ayŭh mbŭh dog pakat so kabŭs, ka madin Ayŭh mbŭh panu ka Galilee diŭ so angān; diginŭ angān re kiris Ayŭh!’ Ingat kayuh adi aku mbŭh kidaan di angān.”

⁸ Jadi ngara bigaut bu so kubur, taru buang raru gaŭn, ka bikaduh di kidaan di bara murid-I.

⁹ Gŭgŭh Jesus bidapŭd ngga ngara ka nang, “Damai ka angān.” Ngara tudu Ayŭh, tama kaja-I, ka nyambah Ayŭh.

¹⁰ “Dŭhnyah taru,” Jesus nang di ngara. “Panu di kidaan di bara jurud Ku da di ka Galilee, ka diginŭ ngara re kiris Aku.”

Pinyiripot so Soldadu adi Jaga

¹¹ Atan dayung dayung anŭ di aran, kada so bara soldadu adi jaga kubur pari ka kupo ka kidaan di pingubak pingubak imam sopŭrŭg kayuh adi mbŭh jadi.

¹² Bara pingubak imam tikuruk bisatur ngga bara nyamba bangsa Jahudi; ngara matŭd itong ka nggen bagŭ duit di bara soldadu anŭ

¹³ ka nang, “Angān dŭh siŭn dŭh kidaan nang murid murid-I mandŭg singarŭm di naku tadang-I sitadŭn angān bŭŭs.

¹⁴ Ka kambŭi Gabenor dingah kayuh ati, kieh re nakit kidaan di ayŭh nang angān dŭh sarah, ka angān dŭhsah gapang.”

¹⁵ Bara soldadu anŭ tambit duit anŭ ka ndai kayuh adi dog bada ngara ndai. Ka anŭ inŭh dundan adi dog piagah di dupan daya Jahudi ndŭg andu ati.

Jesus Nandŭng di Bara Murid-I

¹⁶ Bara murid adi simŭng-ndi naan matak ka Galilee, ka ndi sandah nimun adi ko Jesus kidaan di ngara.

¹⁷ Kan ngara kiris Ayŭh, ngara nyambah Ayŭh, sunggu agi kada so ngara babŭ kurang sabah.

¹⁸ Jesus tudu ngara ka nang di ngara, “Aku mbŭh dog nggen sopŭrŭg kuasa di shorga ngga di ong.

¹⁹ Panu angān ka barang yŭn ka bada sopŭrŭg daya jadi murid Ku: baptisa ngara ngga adŭn Sama, Anak, ka Roh Kudus

²⁰ ka ngajar ngara da sita sopŭrŭg kayuh adi Aku ko pesan di angān. Aku re ari agi ngga angān, ndŭg Andu Sikasŭn.”