MATTHEW 27 - Hakcipta - Biatah Bidayuh

Jesus Dog Taban ka yŭn Pilate

¹ Awar isan isan sopŭrŭg pingubak imam ngga bara nyamba bangsa Jahudi bisatur munki ngara re siŭ Jesus.

² Ngara muak Ayŭh ngga parik basi, taban Ayŭh bu, ka nyerah Ayŭh ka Pilate, adi gabenor pritah Rome.

Pinyikabŭs Judas

³ Kan Judas, adi jua Jesus, dingah Jesus dog nggen ukum kabŭs, ayŭh nyesar ka di pari taruh puru kiping duit pirak anŭ ka pingubak pingubak imam ngga bara nyamba bangsa Jahudi.

⁴ “Aku mbŭh bidosa jua daya adi dŭh sarah da dog ukum kabŭs!” ayŭh nang. “Re ami ngga mani?” ngara nam. “Anŭ mbŭh har adŭp mu!”

⁵ Judas kambur duit anŭ di Ramin Tuhan ka bu; komŭnŭ ayŭh di tangid adŭp-i.

⁶ Pingubak pingubak imam sun duit anŭ ka nang, “Ati duit deya, ka rawan Ukum-adat ta inŭh kambŭi ata na-i darŭm pati duit Ramin Tuhan.”

⁷ Ripas sopŭrŭg mbŭh samah situju pasar simuki ngga duit anŭ, ngara pakai duit anŭ ngga miris tana adi dog kadŭn tana Tukang Priok, ndu kubur daya adi dŭh bangsa Jahudi.

⁸ Anŭ meh sabab tana anŭ dog kadŭn, “Tana Deya” ndŭg andu ati.

⁹ Simŭnŭ inŭh meh pinganang nabi Jeremiah jadi bitŭtŭk: “Ngara tambit taruh puru kiping duit pirak, kiang adi daya Israel ko samah situju ngga miris Ayŭh,

¹⁰ ka pakai duit anŭ ngga miris tana Tukang Priok, nimun adi Tuhan ko pesan di aku.”

Pilate Siken Jesus

¹¹ Jesus mijog di sirung jawin Gabenor Pilate, adi siken Ayŭh, “Kuu kah raja daya Jahudi?” ayŭh siken. “Adŭp mu mbŭh nang,” nam Jesus.

¹² Pak Ayŭh dŭh nang ani ani ngga nam pingubak pingubak imam ka bara nyamba bangsa Jahudi.

¹³ Jadi Pilate nang di Ayŭh, “Dŭh kah Kuu dingah sopŭrŭg kayuh adi ngara nang ngga nyarah Kuu?”

¹⁴ Pak Jesus abah nam, ndi bang dŭh gŭh, ngga bada Gabenor bana nginga.

Jesus dog Nggen Ukum Kabŭs

¹⁵ Di tiap Gawai Paska, nanyam kanyet-i, gabenor pritah Rome pirupas ndi naan daya adi dog jer nanyam pimite bara daya bagŭ.

¹⁶ Di tika anŭ agi ndi naan daya adi dog jer adi traŭn, dŭn Jesus Barabbas.

¹⁷ Jadi kan bara daya bagŭ mbŭh tikuruk, Pilate siken ngara, “Aki ndi an ngan aku pirupas yŭn ngan? Jesus Barabbas kah Jesus adi dog kadŭn Kristus?”

¹⁸ Ayŭh mbŭh taŭn puan bara Pinguasa Jahudi mbŭh nyerah Jesus ka yŭn-i sabab atin sina.

¹⁹ Darŭm Pilate guru ngatur bisara, sawŭn-i pait pinganang ka ayŭh: “Dŭhnyah kuu sua ida ida di tunduh daya adi dŭh bidosa anŭ, sabab singumi aku agi nyipŭmŭh arap pasar Ayŭh.”

²⁰ Bara pingubak imam ngga bara nyamba bangsa Jahudi ngasu bara daya bagŭ mite Pilate pirupas Barabbas ka nggen ukum kabŭs di Jesus.

²¹ Pak Pilate siken bara daya bagŭ, “Aki ndi so ngara duwŭh ati angān raan aku pirupas yŭn ngan?” “Barabbas!” ngara nam.

²² “Re simuki meh aku ngga Jesus adi dog kadŭn Kristus?” Pilate siken ngara. “Masak Ayŭh di rigang!” ngara nam.

²³ Pak Pilate siken, “Ani sarah-i?” Komŭnŭ ngara piguru nyirais ngga sirŭŭn bana, nang: “Masak Ayŭh di rigang!”

²⁴ Kan Pilate kinyam mating guna tia siken, ndong ka ndai pito adŭ, ayŭh tambit piin, ngu tangan-i di sirung jawin daya bagŭ, ka nang, “Aku dŭh dapu tanggong di pinyikabŭs daya ati! Ati pingandai adŭp ngan!”

²⁵ Sopŭrŭg bara daya bagŭ nam, “Isa-i kieh garang ngga bara anak ami dapu tanggong di pinyikabŭs-I!”

²⁶ Komŭnŭ Pilate pirupas Barabbas yŭn ngara; ka ripas-i ko bada daya madŭs Jesus, ayŭh nyerah Ayŭh yŭn dog masak di rigang.

Bara Soldadu Napat Jesus

²⁷ Komŭnŭ soldadu Pilate taban Jesus ka darŭm istana gabenor, ka ndi bara tibaran soldadu tikuruk maning Ayŭh.

²⁸ Ngara pirukos piraka-I ka kasŭk jipo-ambu adi takod bireh di Ayŭh.

²⁹ Komŭnŭ ngara ndai makota so bakah reja ka na-i di ubak Jesus, ka na ndi sikud di tangan tauh-I; komŭnŭ ngara sidikang nadar nyambah Ayŭh ka napat Ayŭh. “Tabi ka Kaam Raja daya Jahudi!” ngara nang.

³⁰ Ngara nyiruja Ayŭh, ka tambit sikud anŭ ka mukong Ayŭh di ubak-I.

³¹ Kan ngara muko pimangŭh napat Ayŭh, ngara kadi jipo-ambu anŭ ka pari kasŭk piraka adŭp-I di Ayŭh. Komŭnŭ ngara taban Ayŭh ruah yŭn dog masak di rigang.

Jesus Dog Masak di Rigang

³² Darŭm ngara aŭn panu ruah, ngara bidapŭd ngga ndi naan daya so Cyrene dŭn Simon, ka bara soldadu takan ayŭh da gŭrŭng rigang Jesus.

³³ Ngara mandŭg ka tarun adi dog kadŭn Golgotha, rati-i, “Tarun yŭn Tikurok.”

³⁴ Diginŭ ngara jugan ka Jesus wain bigaur ngga kayuh pa'it; pak ripas-I ko kija, Ayŭh dŭh an nok-i.

³⁵ Ngara masak Ayŭh di rigang ka komŭnŭ kutung piraka-I dupan adŭp ngara, pakai dadu.

³⁶ Ripas anŭ ngara guru diginŭ, nguan jaga Ayŭh.

³⁷ Nyirungan ubak-I ngara na supek papan adi agi turis ngga pinganang adi ngga daya nyarah Ayŭh: “Ati Jesus, Raja daya Jahudi.”

³⁸ Duwŭh naan daya arap agi dog masak di rigang samah ngga Jesus, ndi tura ka tauh ndi tura ka bait.

³⁹ Daya adi murah kuting ubak ngara ka bakit Jesus:

⁴⁰ “Kuu adi re nyirubuh Ramin Tuhan ka pari pijog-i darŭm taruh andu! Nyiramat adŭp Mu kambŭi Kuu sawŭ Anak Tapa! Mūn so atuh rigang anŭ!”

⁴¹ Simŭnŭ gŭh bara pingubak imam ngga bara gurū Ukum-adat Jahudi ka bara nyamba bangsa Jahudi napat Ayŭh:

⁴² “Ayŭh nyiramat daya, pak Ayŭh dŭh pandai nyiramat adŭp-I! Dŭh kah Ayŭh raja daya Israel? Kambŭi Ayŭh mūn so atuh rigang anŭ madin, ata bisa sabah di Ayŭh!

⁴³ Ayŭh sabah di Tapa ka nang adŭp-I Anak Tapa. Bah garang, ata tingga kambŭi Tapa raan nyiramat Ayŭh madin!”

⁴⁴ Daya arap adi dog masak di rigang samah Ayŭh simŭnŭ gŭh bakit Ayŭh.

Pinyikabŭs Jesus

⁴⁵ Ngga yun kumbeng ndi tarun tarun tana rais anŭ mbŭh karŭm pipet, sitian taruh jam.

⁴⁶ Ngga arong pukor taruh Jesus bagan ngga sirŭŭn bana, “Eli, Eli, lema sabachthani?” rati-i, “Tapa Ku, Tapa Ku, mani Kaam tagan Aku?”

⁴⁷ Agi kada daya adi mijog diginŭ dingah Ayŭh ka nang, “Ayŭh bagan Elijah!”

⁴⁸ Ndi naan so ngara rasu bikaduh, ka di tambit rimut karang, kurom-i di wain adi kurang brega, na-i di tŭbŭn sikuwang, ka suba bada Ayŭh nok-i.

⁴⁹ Pak ngara adi bŭkŭn nang, “Kajŭn, ata tingga mandŭg kah dŭh Elijah di nyiramat Ayŭh!”

⁵⁰ Jesus nyirais dinge ngga sirŭŭn bana ka asŭng-I rasu patŭd.

⁵¹ Komŭnŭ banang tabir adi di darŭm Ramin Tuhan tiratak nyinuwŭh so sambu ndŭg sagān-i. Tana bigugoh, batuh batuh butah,

⁵² kubur kubur tikuka, ka bagŭ bara daya adi Tapa mbŭh mien adi mbŭh kabŭs dog pakat udip bauh.

⁵³ Ngara bu so kubur, ka ripas Jesus makat so kabŭs, ngara di mŭrŭt Kupo Kudus, di yŭn bagŭ daya kiris ngara.

⁵⁴ Kan pingubak soldadu ngga bara soldadu-i adi nguan jaga Jesus kiris tana-bigugoh ka sopŭrŭg kayuh adi jadi, ngara mbŭh taru ka nang, “Ayŭh sawŭ Anak Tapa!”

⁵⁵ Diginŭ bagŭ bara dayung, tingga so jo, adi ko tunda Jesus so Galilee ka adi ko turung Ayŭh.

⁵⁶ Di dupan ngara inŭh Mary Magdalene, Mary adi sindŭ James ngga Joseph, ka sawŭn Zebedee.

Pinyikubur Jesus

⁵⁷ Kan-i mbŭh singumi andu, ndi naan daya kaya so Arimathea mandŭg; dŭn-i Joseph, ka ayŭh gŭh mbŭh murid Jesus.

⁵⁸ Ayŭh di bidapŭd ngga Pilate ka mite tadang Jesus. Pilate nggen ukum bada tadang Jesus dog nggen di Joseph.

⁵⁹ Jadi Joseph tambit-I, marut-I ngga banang linen,

⁶⁰ ka na-I di darŭm kubur adŭp-i, anŭ inŭh di sandah batuh adi-i bauh ko mubo. Komŭnŭ ayŭh biraring tibande batuh ngga nabat rubang kubur, ka ko anŭ ayŭh bu.

⁶¹ Mary Magdalene ngga Mary anŭ ndi agi guru diginŭ, nura kubur anŭ.

Bara Soldadu Jaga di Kubur

⁶² Andu anŭ ndi, di andu Sabbath, bara pingubak imam ngga bara daya Pharisee di bidapŭd ngga Pilate

⁶³ ka nang, “Tuan, kieh ingat di andu daya pingadong anŭ babŭ udip Ayŭh agi nang, ‘Aku re dog pakat udip bauh ripas taruh andu.’

⁶⁴ Nggen ukum bada kubur-I dog nakit jaga ndŭg andu adi taruh, isa bara murid-I dŭh dapŭd mandŭg di naku tadang-I ka kidaan di daya bagŭ nang Ayŭh mbŭh makat so kabŭs. Sikasŭn pinyikadong ati re rabis arap so adi mbŭh.”

⁶⁵ “Bada kada soldadu jaga,” Pilate nang di ngara; “ka di magŭng kubur anŭ ngga situngang ngan.”

⁶⁶ Jadi ngara bu ka di magŭng kubur anŭ, madad batuh anŭ di rubang kubur; ka ngara bada kada soldadu jaga.