MATTHEW 26 - Hakcipta - Biatah Bidayuh

Bara Pingubak Imam ngga Bara Nyamba Bangsa Bipekat an Siŭ Jesus

¹ Kan Jesus muko ngajar sopŭrŭg kayuh anŭ, Ayŭh nang di bara murid-I,

² “Ripas duwŭh andu te, angān puan nang-i mbŭh Gawai Paska, ka Anak Manusia re dog nyerah yŭn dog masak di rigang.”

³ Komŭnŭ pingubak pingubak imam ngga bara nyamba bangsa Jahudi mandŭg tikuruk di istana Caiaphas, adi Imam Bās,

⁴ ka bisatur an nakap Jesus darŭm bisukan ka siŭ Ayŭh.

⁵ “Ata manyah ndai kayuh ati di tika gawai,” ngara nang, “te daya guga rai-i.”

Jesus dog Nginyo di Bethany

⁶ Jesus mbŭh di Bethany di ramin Simon, daya adi ko naman andam kurit adi bisā.

⁷ Darŭm Jesus aŭn man, ndi naan dayung mandŭg tudu Ayŭh taban gabuk alabasta puno ngga inyo wangi adi raru mbar rega-i, adi-i ren di ubak Jesus.

⁸ Bara murid kiris ka mbŭh tuas. “Mani saat?” ngara siken.

⁹ “Wangi anŭ ata patut jua ngga dapŭd bagŭ duit yŭn nggen di daya sirata!”

¹⁰ Jesus puan kayuh adi ngara nang, ka-I nang di ngara, “Mani angān mito dayung ati? Kayuh adi kana ka tirase inŭh adi ndai-i di Aku.

¹¹ Angān re siraru biyŭn daya sirata ngga angān, pak Aku dŭh re siraru agi ngga angān.

¹² Kayuh adi-i ndai inŭh susen inyo wangi di pŭrŭng Ku ngga sidia Aku yŭn dog kubur.

¹³ Ingat nŭh! Di barang yŭn Agah Kana dog nyuse, kayuh adi-i mbŭh ndai re dog kidaan ngga ingat ayŭh.”

Judas Situju An Jua Jesus

¹⁴ Komŭnŭ ndi so ngara adi simŭng-duwŭh naan murid Jesus, sianŭ adi dŭn Judas Iscariot, di ka bara pingubak imam

¹⁵ ka siken, “Ani re ngan nggen di aku kambŭi aku jua Jesus ka angān?” Ngara ngitong taruh puru kiping duit pirak ka nggen-i di ayŭh.

¹⁶ So andu anŭ meh Judas jiroh pluang ngga-i nyerah Jesus ka tangan ngara.

Jesus Man Gawai Paska ngga Bara Murid-I

¹⁷ Di andu adi ndi darŭm tipuh Gawai Ruti Dŭh-Biragi, murid murid tudu Jesus ka siken Ayŭh, “Diki Kaam raan kieh sidia yŭn Mai man gawai Paska?”

¹⁸ “Di ka yŭn ndi naan daya di kupo,” Ayŭh nang di ngara, “ka kidaan di ayŭh: ‘Gurū nang, Jam Ku mbŭh mandŭg; bara murid Ku ngga Aku re man gawai Paska di ramin mu?’ ”

¹⁹ Murid murid anŭ ndai nimun pinyibada Jesus ka sidia man gawai Paska.

²⁰ Kan-i mbŭh singumi andu, Jesus ngga simŭng-duwŭh naan murid-I guru man.

²¹ Di tika man Jesus nang, “Aku kidaan di angān, ndi so angān re jua Aku.”

²² Bara murid mbŭh raru susah ka piguru siken Ayŭh ndi ngga ndi, “Manŭn dŭh-i aku adi Kaam nang, Tuhan?”

²³ Jesus nam, “Sianŭ adi njug ruti-i di pinggen ngga Aku inŭh adi re jua Aku.

²⁴ Anak Manusia re kabŭs nimun adi dog nang darŭm Surat-kudus, pak mbŭh raru payah inŭh daya anŭ adi re jua Anak Manusia! Mbŭh kana dŭ inŭh kambŭi ayŭh pati ka bŭn dog biranak!”

²⁵ Judas, adi jua Ayŭh, minyu. “Manŭn-i dŭh aku, Gurū, adi Kaam nang?” ayŭh siken. Jesus nam, “Adŭp mu mbŭh nang.”

Jesus Man Gawai Paska ngga bara Murid

²⁶ Darŭm ngara man, Jesus tambit ndi kiping ruti, nang dua trima kaseh, mire-i, ka nggen-i di bara murid-I. “Mbit ka man-i,” Ayŭh nang; “ati inŭh pŭrŭng Ku.”

²⁷ Komŭnŭ Ayŭh tambit makuk, nggen trima kaseh di Tapa, ka nggen-i di ngara. “Nok-i, sopŭrŭg ngan,” Ayŭh nang;

²⁸ “ati inŭh deya Ku, adi natu simanya Tapa, deya Ku adi dog ren yŭn sopŭrŭg daya yŭn pingapun dosa.

²⁹ Aku kidaan di angān, Aku dŭh re tia nok wain ati ndŭg andu adi ngga Aku nok wain adi bauh ngga angān darŭm Ong Bauh Sama Ku.”

³⁰ Komŭnŭ ngara nang ndi nyanyi, ka ripas anŭ ngara ruah di ka Sandah Kanā.

Jesus Ninjau Peter re Miman adŭp-I

³¹ Komŭnŭ Jesus nang di ngara, “Ngarŭm ati sopŭrŭg ngan re babak bu tingge Aku, amai Surat-kudus nang, ‘Tapa re siŭ Pingingat-biri, ka bara biri re pambar.’

³² Pak ripas Aku dog pakat udip bauh, Aku re di ka Galilee diŭ so angān.”

³³ Peter minyu, nang-i di Jesus, “Aku dŭh re tingge Kaam, sunggu ngara adi bŭkŭn re ndai simŭnŭ!”

³⁴ Jesus nang di Peter, “Aku kidaan di kuu diŭ so babang kukok sikambŭh, kuu re pitaruh kari nang adŭp mu dŭh puan Aku.”

³⁵ Peter nam, “Aku dŭh re nang sakanŭ, sunggu bait kani aku dŭh siŭn dŭh kabŭs ngga Kaam!” Ka sopŭrŭg murid adi bŭkŭn nang sakanŭ gŭh.

Jesus Simayang di Gethsemane

³⁶ Komŭnŭ Jesus di ngga bara murid-I ka tarun adi dog kadŭn Gethsemane, ka-I nang di ngara, “Guru digiti sitadŭn Aku di kamajeh simayang.”

³⁷ Ayŭh taban Peter ka duwŭh madis anak Zebedee. Ayŭh mbŭh raru susah buang payah,

³⁸ ka-I nang di ngara, “Pinyusah Ku raru bat-i, batang re kabŭs nyam Ku da-i. Kajŭn digiti angān buang bijaga ngga Aku.”

³⁹ Ayŭh panu mua juan-i, mŭŭb di tana, ka simayang, “Sama Ku, kambŭi bisa, kadi makuk jera-birasa ati so Aku! Sunggu mŭnŭ dŭhnyah nurut pinyiraan Ku, pak ndai adŭ pinyiraan Mai.”

⁴⁰ Komŭnŭ Ayŭh pari ka yŭn taruh naan murid-I anŭ ka dapŭd ngara aŭn bŭŭs; ka-I nang di Peter, “Mani angān mbŭh dŭh adŭ tungang bijaga ngga Aku sirabi ka ndi jam?

⁴¹ Bijaga nŭh ka simayang isa angān dŭh rabu darŭm pinyisuba. Pinyiraan taŭn agi pak pŭrŭng ngan paŭh dŭh sinunuh.”

⁴² Jesus pari dinge di simayang, “Sama Ku, kambŭi makuk jera-birasa ati dŭh bisa dog kadi adŭ-i Aku nok-i, isa-i jadi nanyam pinyiraan Mai.”

⁴³ Ayŭh pari dinge ka dapŭd murid murid-I aŭn bŭŭs; ngara mbŭh dŭh tungang nyijŭn batŭh-i.

⁴⁴ Jesus tingge ngara dinge ka adi pitaruh saba-i Ayŭh bidua, nang sak adi tejah.

⁴⁵ Ka Ayŭh pari ka yŭn murid-I ka nang, “Babŭ bŭŭs kah angān buang rŭŭ-paya? Tingga! Jam mbŭh mandŭg yŭn Anak Manusia dog nyerah ka darŭm tangan daya bidosa.

⁴⁶ Makat, ka panu meh ja. Tingga, daya adi jua Aku mbŭh mandŭg!”

Jesus dog Nakap

⁴⁷ Jesus gibabŭ minyu kan Judas, ndi so ngara adi simŭng-duwŭh naan murid-I, mandŭg. Ayō ayŭh agi bara daya bagŭ taban pedang ka pukong, dog pait bara pingubak imam ka nyamba nyamba bangsa Jahudi.

⁴⁸ Sianŭ adi jua Jesus muko nggen tandā di bara daya bagŭ: “Sianŭ adi aku sium inŭh daya adi angān raan. Nakap Ayŭh!”

⁴⁹ Judas rikas tudu Jesus ka nang, “Tabi Gurū,” ka sium Ayŭh.

⁵⁰ Jesus nam, “Rikas ndai-i, dingan!” Komŭnŭ bara adi ayō Judas mandŭg sindŭk, nakap Jesus, ka muak Ayŭh.

⁵¹ Ndi so ngara adi ayō Jesus nyitak pedang-i ka japa urun Imam Bās, nyaper kajit-i.

⁵² “Kasŭk pedang mu pari ka sibong-i,” Jesus nang di ayŭh. “Sopŭrŭg daya adi pakai pedang re kabŭs da pedang.

⁵³ Dŭh kuu puan Aku bisa mite turung so Sama Ku, ka Ayŭh bisa rasu pait ka Aku rabis so simŭng-duwŭh tibaran malaikat-I?

⁵⁴ Pak kambŭi simŭnŭ, simuki meh Surat-kudus re bisa jadi bitŭtŭk adi nang kayuh ati dŭh siŭn dŭh jadi?”

⁵⁵ Ka Jesus minyu di bara daya bagŭ anŭ, “Sah kah angān mandŭg ngga pedang ka pukong ngga nakap Aku mun ani Aku ati daya arap? Barang andu Aku agi guru ngajar di Ramin Tuhan, ka angān dŭh nakap Aku.

⁵⁶ Pak sopŭrŭg ati mbŭh jadi siŭn kayuh adi bara nabi ko nuris di Surat-kudus jadi bitŭtŭk.” Komŭnŭ sopŭrŭg murid babak bu, tingge Ayŭh.

Jesus di Sirung Jawin Kunsil

⁵⁷ Ngara adi nakap Jesus taban Ayŭh ka ramin Caiaphas, adi Imam Bās, di yŭn bara gurū Ukum-adat Jahudi ngga nyamba bangsa Jahudi mbŭh tikuruk.

⁵⁸ Peter tunda so jo, ndŭg badag ramin Imam Bās. Ayŭh mŭrŭt badag ka guru ngga bara soldadu adi jaga an puan munki kayuh re.

⁵⁹ Bara pingubak imam ngga bara Kunsil suba an jiroh taksi kadong rawan Jesus yŭn dapŭd nggen ukum kabŭs di Ayŭh;

⁶⁰ pak ngara dŭh tungang, sunggu bagŭ daya mandŭg ka minyu kadong pasar Ayŭh. Sikasŭn-i duwŭh naan daya makat

⁶¹ ka nang, “Daya ati agi nang, ‘Aku tungang nyirubuh Ramin Tapa ka darŭm taruh andu Aku tungang pijog-i dinge.’ ”

⁶² Imam Bās mijog ka nang di Jesus, “Mating kah pinyinam Mu yŭn pinganang ngara adi nyarah Kuu?”

⁶³ Pak Jesus pirŭŭ adŭp-I. Imam Bās minyu di Ayŭh dinge, “Ngga adŭn Tapa adi udip aku bada Kuu bipayu: kidaan di kieh kambŭi Kuu ati Kristus, Anak Tapa.”

⁶⁴ Jesus nam ayŭh, “Adŭp mu mbŭh nang. Pak Aku kidaan di sopŭrŭg ngan: so andu ati angān re kiris Anak Manusia guru tura ka tauh Ayŭh adi Bisa-pŭrŭg ka mandŭg di tunduh abun!”

⁶⁵ Dingah sakanŭ, Imam Bās nyiratak piraka-i ka nang, “Ngujat! Ata dŭh biguna tia di saksi! Angān mbŭh dingah pinganang ujat-I!

⁶⁶ Ani kira ngan?” Ngara nam, “Ayŭh sawŭ sarah ka dŭh siŭn dŭh dog nggen ukum kabŭs.”

⁶⁷ Ngara nyiruja jawin-I ka mukong Ayŭh; ka ngara adi napar Ayŭh

⁶⁸ nang, “Minyu-binabi yŭn ami, Kristus! Suba kidaan asi anŭ mukong Kuu!”

Peter Miman Jesus

⁶⁹ Peter mbŭh guru di sapa di badag kan ndi naan daya-gaji Imam Bās mandŭg tudu ayŭh ka nang, “Kuu gŭh, agi ngga Jesus so Galilee.”

⁷⁰ Pak ayŭh miman di sirung jawin sopŭrŭg ngara. “Aku dŭh puan kayuh adi nang mu,” ayŭh nam,

⁷¹ ka panu di ka tiban buwang badag. Daya-gaji adi bŭkŭn kiris ayŭh ka nang di bara daya diginŭ, “Ayŭh agi ngga Jesus so Nazareth.”

⁷² Babŭ gŭh Peter miman ka nam, “Aku bipayu aku dŭh puan daya anŭ!”

⁷³ Dŭh tui ripas anŭ bara daya adi mijog diginŭ tudu Peter. “Taŭn-i sawŭ kuu ndi so ngara,” ngara nang. “So gaya mu minyu kieh mbŭh puan!”

⁷⁴ Jadi Peter nang, “Aku bipayu aku dŭh puan daya anŭ! Isa-i Tapa ngukum aku kambŭi aku kadong! Dŭh aku puan daya anŭ!” Nganŭ gŭh babang kukok,

⁷⁵ ka Peter ingat kayuh adi Jesus ko kidaan di ayŭh: “Diŭ so babang kukok, kuu re pitaruh kari nang adŭp mu dŭh puan Aku.” Ayŭh ruah ka sapa ka nyisakuk sien.