MATTHEW 25 - Hakcipta - Biatah Bidayuh

Upama Simŭng naan Dayung Bujang

¹ “Di tipuh anŭ, kan Anak Manusia mandŭg darŭm kuasa-I, kayuh agi keya ka di upama ati: Agi ndi sidah, simŭng naan dayung bujang taban prita ngga ruah re di kambat pingaten dari.

² Rimŭh naan so ngara budo, ka rimŭh naan bijak.

³ Ngara adi budo taban prita adŭ, dŭh biringed inyo,

⁴ pak ngara adi bijak biringed inyo yŭn prita ngara.

⁵ Pingaten dari rambat mandŭg, jadi bara dayung anŭ nundu ka rasu bŭŭs.

⁶ “Kan-i mbŭh sitŭrŭp ngarŭm, sirŭŭn agi dog dingah, ‘Pingaten dari mandŭg! Ja meh di kambat ayŭh!’

⁷ Simŭng naan dayung anŭ priguwang makat ka ngatur prita ngara.

⁸ Ngara adi budo nang di ngara adi bijak, ‘Nggen di kieh kada inyo ngan; prita ami mbŭh re pura.’

⁹ ‘Dŭh bisa,’ ngara adi bijak nam, ‘dŭh-i sadang kutung ta. Panu di ka kade di miris yŭn adŭp ngan.’

¹⁰ Jadi ngara adi budo di ka kade di miris inyo; ka atan ngara di, pingaten dari mandŭg. Ngara adi rimŭh naan adi mbŭh sidia di ngga ayŭh ka gawai sawan, ka tiban meh dog tŭŭp.

¹¹ “Ripas anŭ, ngara adi bŭkŭn mandŭg, ‘Tuan, tuan, bada kieh mŭrŭt’ ngara nang.

¹² ‘Manŭn dŭh bisa! Aku dŭh puan angān,’ pingaten dari nam.”

¹³ Ka Jesus nang, “Bijaga meh garang, amai angān dŭh puan andu-i bait kah jam-i.

Upama Taruh Naan Daya gaji

¹⁴ “Di tipuh anŭ, kan Anak Manusia mandŭg darŭm kuasa-I, kayuh agi keya ka di upama ati: Agi ndi sidah, ndi naan daya re matak ka tarun adi jo; ayŭh bagan bara daya gaji-i ka tijuan ngara da jaga buat rata-i.

¹⁵ Ayŭh nggen di barang naan nanyam ka pinyibisa-i: di ndi naan ayŭh nggen rimŭh ribu kiping duit mas, di sianŭ ndi ayŭh nggen duwŭh ribu, ka di sianŭ ndi ayŭh nggen siribu. Komŭnŭ ayŭh matak.

¹⁶ Daya-gaji adi trima rimŭh ribu kiping duit mas rasu matak di sita jangi darŭm dagang ka pijadi rimŭh ribu tambah-i.

¹⁷ Simŭnŭ gŭh daya-gaji adi trima duwŭh ribu, pijadi jangi duwŭh ribu tambah-i.

¹⁸ Pak daya-gaji adi trima siribu matak ka kareh rubang di tana, ka sukan duit tuan-i.

¹⁹ “Ripas mua tian-i, tuan bara daya-gaji anŭ mari ka nyirase kira-kira ngga ngara.

²⁰ Daya-gaji adi trima rimŭh ribu kiping duit mas mŭrŭt ka nyerah rimŭh ribu tambah-i. ‘Kaam nggen di aku rimŭh ribu kiping duit mas, tuan,’ ayŭh nang. ‘Tingga! Ati rimŭh ribu tambah-i adi aku ko pijadi.’

²¹ ‘Pandai kuu, kuu daya-gaji adi kana ka adi tŭtŭd!’ tuan-i nang. ‘Kuu tŭtŭd darŭm mu ngatur kiang adi siit, jadi aku re tijuan kuu da jaga kiang adi rabis bagŭ. Mŭrŭt kamati ka sua gaŭn ngga aku!’

²² Komŭnŭ daya-gaji adi dog nggen duwŭh ribu kiping duit mas mŭrŭt ka nang, ‘Kaam nggen di aku duwŭh ribu kiping duit mas, tuan. Tingga! Ati duwŭh ribu tambah-i adi aku ko pijadi.’

²³ ‘Pandai kuu, kuu daya-gaji adi kana ka adi tŭtŭd!’ tuan-i nang. ‘Kuu tŭtŭd darŭm mu ngatur kiang adi siit, jadi aku re tijuan kuu da jaga kiang adi rabis bagŭ. Mŭrŭt kamati ka sua gaŭn ngga aku!’

²⁴ Komŭnŭ daya-gaji adi trima siribu kiping duit mas mŭrŭt ka nang, ‘Tuan, aku puan kaam daya karas; kaam ngatŭm so yŭn mai bŭn purun, ka nguruk buwa so yŭn mai bŭn nabur ruwang.

²⁵ Aku taru, jadi aku di sukan duit mai di tana. Tingga! Ati inŭh kayuh adi kaam dapu.’

²⁶ ‘Kuu daya-gaji adi tibanga!’ tuan-i nang di ayŭh. ‘Kuu puan, dŭh kah, nang aku ngatŭm so yŭn ku bŭn purun, ka nguruk buwa so yŭn ku bŭn nabur ruwang?

²⁷ Ngapŭi meh, ngga patut, kuu na duit ku di yŭn daya bidagang duit, ka aku meh bisa trima-i pari samŭn anak-i kan aku pari.

²⁸ Tambit duit anŭ so ayŭh ka nggen-i di sianŭ adi biyŭn simŭng ribu kiping duit mas.

²⁹ Amai di barang naan adi biyŭn kayuh, rabis bagŭ re dog nggen, ka-i re biyŭn rabis so sadang; pak sianŭ adi dŭh biyŭn ani ani, sirabi ka rapuh kayuh adi-i biyŭn re dog tambit gŭh so ayŭh.

³⁰ Mun siati, daya-gaji adi dŭh biguna; taran ayŭh ka yŭn karŭm di sapa; diginŭ ayŭh re sien buang sangsara.’

Sikasŭn Bisara

³¹ “Di tipuh anŭ, kan Anak Manusia mandŭg nimun Raja, ka sopŭrŭg malaikat ngga Ayŭh, Ayŭh re guru di takta-I adi bragah,

³² ka daya so barang bangsa re dog nguruk di sirung jawin-I. Komŭnŭ Ayŭh re kutung ngara da jadi duwŭh tibaran, nimun pingingat-biri nyidŭrŭ bara biri so bara kambing.

³³ Ayŭh re nguruk daya tŭnggŭn tura ka tauh-I ka adi bŭkŭn Ayŭh nguruk tura ka bait-I.

³⁴ Komŭnŭ Raja anŭ re nang di daya tura ka tauh-I, ‘Mandŭg, angān adi ko dog nyiberkat Sama Ku! Mandŭg ka sua kinyam Pinyipritah Tapa adi ko dog sidia yŭn ngan so sibungas ong jadi.

³⁵ Aku sibŭrŭk, angān paan Aku; aus, angān nggen di Aku nok; daya saruh, angān kambat Aku di ramin ngan,

³⁶ sitagor, angān nggen di Aku piraka; Aku sungoh, angān sita Aku, darŭm jer, angān munan Aku.’

³⁷ Daya tŭnggŭn re nam Ayŭh, ‘Sinde, Tuhan, kieh kiris Kaam sibŭrŭk ka paan Kaam, puan kah aus ka kieh nggen di Kaam nok?

³⁸ Sinde kieh kiris Kaam daya saruh ka kambat Kaam ka ramin ami, puan kah sitagor ka kieh nggen di Kaam piraka?

³⁹ Sinde kieh kiris Kaam sungoh puan kah darŭm jer, ka kieh munan Kaam?’

⁴⁰ Raja anŭ re nam, ‘Aku kidaan di angān, tiap kari angān ndai simŭnŭ di ndi naan so bara pinunda Ku ati adi siabo sŭ darŭm pangkat-i, angān mbŭh ndai-i di Aku!’

⁴¹ “Komŭnŭ Ayŭh re nang di ngara adi tura ka bait-I, ‘Bu so Aku angān, angān adi dog pangu Tapa! Bu angān ka apui neraka adi mbŭh dog sidia yŭn Siarap ngga bara malaikat-i!

⁴² Aku sibŭrŭk angān dŭh an paan Aku; aus, angān dŭh an nggen di Aku nok;

⁴³ Aku daya saruh, angān dŭh an kambat Aku di ramin ngan; sitagor, angān dŭh an nggen di Aku piraka; sungoh ka darŭm jer, angān dŭh an sita Aku.’

⁴⁴ Nganŭ ngara re nam, ‘Sinde, Tuhan, kieh kiris Kaam sibŭrŭk puan kan aus, puan kah daya saruh, puan kah sitagor, puan kah sungoh, puan kah darŭm jer, ka kieh dŭh an turung Kaam?’

⁴⁵ Raja anŭ re nam, ‘Aku kidaan di angān, tiap kari angān dŭh an turung ndi so ngara ati adi siabo sŭ darŭm pangkat-i, angān dŭh an turung Aku.’

⁴⁶ Ngara anŭ inŭh adi re dog taran ka yŭn ukum ruro, pak ngara adi tŭnggŭn re dapŭd udip adi sawŭ adi tan adu adu.”