MATTHEW 24 - Hakcipta - Biatah Bidayuh

Jesus Minyu pasar Pinyirubuh Ramin Tuhan

¹ Jesus mbŭh aŭn bu so Ramin Tuhan kan murid murid-I tudu Ayŭh an sigara di Ayŭh sikuh anjung Ramin Tuhan.

² “Sawŭ,” Ayŭh nang, “angān bisa tingga sopŭrŭg-i. Sakati Aku kidaan di angān: ndi batuh mating gŭh re dŭm bisandug di yŭn adŭp-i; sopŭrŭg-i re rubuh.”

Pinyusah ngga Pinyikisiis

³ Di Sandah Kanā, darŭm Jesus guru, murid murid tudu Ayŭh sadi adŭp ngara. “Kidaan di kieh sinde sopŭrŭg kayuh ati re jadi,” ngara siken, “ka ani tandā ngga kiren tika pimandŭg Mai di Andu Sikasŭn.”

⁴ Jesus nam, “Jaga adŭp ngan, ka dŭhnyah bada daya nyibudo angān.

⁵ Bagŭ daya re mandŭg ngga adŭn Ku ka nang, ‘Aku ati Kristus!’ Ngara re nyibudo bagŭ daya.

⁶ Angān re dingah jawŭn daya biperang dŭh jo so angān ka agah pasar perang di tarun adi jo so angān; pak dŭhnyah susah. Kayuh adi mun anŭ dŭh siŭn dŭh jadi, pak dŭh sirati-i sikasŭn ong mbŭh mandŭg.

⁷ Rais re biperang ngga rais adi bŭkŭn; pritah re nyerang pritah adi bŭkŭn. Re agi apag ngga tana-bigugoh di barang yŭn.

⁸ Sopŭrŭg kayuh ati re keya ka sibungas andam dayung re biranak.

⁹ “Komŭnŭ angān re dog nakap ka dog nyerah yŭn dog kijera ka dog nggen ukum kabŭs. Barang naan daya re tiru di angān sabab Aku.

¹⁰ Bagŭ so bara pinunda Ku re dŭh tia sabah di Aku di tika anŭ. Ngara re jua dingan ka tiru di dingan.

¹¹ Ka bagŭ nabi kadong re timbur ka nyibudo bagŭ daya.

¹² Simŭnŭ inŭh re sesak arap adi re bada bagŭ daya dŭh tia rindu dingan-i.

¹³ Pak asi asi adi bijijŭ ndŭg sikasŭn-i re dog nyiramat.

¹⁴ Ka Agah Kana pasar munki Tapa mritah re dog nyuse di barang yŭn di ndi ong ong yŭn sopŭrŭg bangsa daya; ripas anŭ ka sikasŭn ong mandŭg.

Pinyembar Adi Raru Sipŭ

¹⁵ “Angān re kiris ‘Pinyembar adi Raru Sipŭ’ adi ko nabi Daniel nyabŭt, mijog di Yŭn Kudus.” (Ayŭh adi basa patut mirati ani rati kayuh ati!)

¹⁶ “Jadi ngara adi di Judea dŭh siŭn dŭh babak ka tarun tana darŭd.

¹⁷ Daya adi di tibung ramin dŭh siŭn mūn ka darŭm ramin di tambit kayuh-i.

¹⁸ Daya adi di ŭmŭh dŭh siŭn mari di tambit jipo-i.

¹⁹ Mbŭh raru payah-i re di tipuh anŭ yŭn bara dayung adi bite ka bara sindŭ adi mira sŭ!

²⁰ Bidua ka Tapa mite angān dŭh babak di tipuh madud puan kah di andu Sabbath!

²¹ Amai pinyusah di tika anŭ re rabis payah so adi mbŭh, ngitong so sibungas ong jadi ndŭg andu ati. Ka mating re tia mun anŭ dinge.

²² Pak Tapa muko pisigŭt tipuh-i; kambŭi dŭh, mating manusia dŭm. Amai sitagar daya adi-I ko mien, Tapa sunggu mŭnŭ re pisigŭt tipuh anŭ.

²³ “Di tipuh anŭ, kambŭi agi daya nang di angān, ‘Tingga, digiti Kristus!’ puan kah ‘No ajeh Ayŭh!’ dŭhnyah sabah.

²⁴ Amai bara Kristus kadong ka bara nabi kadong re timbur; ngara re ndai pingandai-nginga ka pingandai-saruh ngga nipu ndŭg ka bara daya adi Tapa mbŭh mien ani, kambŭi tungang.

²⁵ Dingah! Aku awar kidaan kayuh ati di angān, diŭ so tipuh-i.

²⁶ “Kambŭi agi daya kidaan di angān, ‘Tingga, Ayŭh di tarun tana-pajam!’ dŭhnyah di; puan kah kambŭi daya nang, ‘Tingga, Ayŭh bisukan dijeh!’ dŭhnyah sabah.

²⁷ Amai Anak Manusia re mandŭg keya ka kijat adi mikirab di rangit nyekar so timor ndŭg barat.

²⁸ “Di barang yŭn agi tadang, diginŭ manuk volcha agi mupuh.

Pimandŭg Anak Manusia

²⁹ “Dŭh tui ripas pinyusah di tipuh anŭ, batŭh andu re marui jadi karŭm, buran re dŭh tia nyekar, bitang bitang re rabu so rangit, ka kuasa di rangit re bigugoh.

³⁰ Komŭnŭ tandā Anak Manusia re tatŭng di rangit; ka sopŭrŭg daya di ong re muās kan ngara kiris Anak Manusia mandŭg di tunduh abun ngga kuasa ka bragah bās.

³¹ Trompet bās re jawŭn, ka Ayŭh re pait bara malaikat-I ka pat sikuh ong, ka ngara re nguruk daya adi-I ko mien so ong, so tŭbŭn ndi ndŭg tŭbŭn andi.

Ajar so Tŭngŭn Ara

³² “Birajar meh so tŭngŭn ara. Kan daan daan-i jadi barŭm buang dŭdŭt ka piguru prisok, angān puan tipuh paras mbŭh sindŭk.

³³ Simŭnŭ gŭh, kan angān kiris sopŭrŭg kayuh ati, angān re puan tika-i mbŭh sindŭk, sidia re piguru.

³⁴ Ingat nŭh, sopŭrŭg kayuh ati re jadi diŭ so daya adi udip madin mbŭh abo kabŭs.

³⁵ Rangit ngga ong re mungan, pak pinganang Ku dŭh re manyap

Mating Daya Puan Andu ngga Jam-i

³⁶ “Mating daya puan sinde andu anŭ ngga jam-i mandŭg; bara malaikat di shorga puan kah Anak dŭh gŭh puan sinde; Kaŭs Sama adŭ puan.

³⁷ Kan Anak Manusia mandŭg, kayuh re keya ka di jaman Noah.

³⁸ Di tipuh diŭ so uba daya man nok, dari dayung banan sawan, ndŭg ka andu adi ngga Noah mŭrŭt batra;

³⁹ pak ngara dŭh rada kayuh adi aŭn jadi ndŭg ka uba mbŭh mandŭg ka ngapuh pirŭnggŭd ngara. Simŭnŭ inŭh kayuh re kan Anak Manusia mandŭg.

⁴⁰ Di tika anŭ duwŭh naan daya re nyiraja di ŭmŭh: ndi naan re dog tambit, sianŭ ndi re dog tingge.

⁴¹ Duwŭh naan dayung re ngisar gandom: ndi naan re dog tambit, sianŭ ndi re dog tingge.

⁴² Bijaga meh angān, sabab angān dŭh puan sinde Tuhan ngan re mandŭg.

⁴³ Kambŭi daya adi dapu ramin puan sinde pinaku re mandŭg, angān puan ayŭh re bijaga ndi ngarŭm ngarŭm dŭh an bada pinaku mŭrŭt ramin-i.

⁴⁴ Ngapŭi meh, angān dŭh siŭn dŭh gŭh an ari sidia, sabab Anak Manusia re mandŭg di jam adi angān dŭh puan Ayŭh mandŭg.

Daya-Gaji adi Tŭtŭd ngga Daya-Gaji adi Dŭh Tŭtŭd

⁴⁵ “Asi meh garang, daya-gaji adi tŭtŭd ka adi bijak? Ayŭh inŭh sianŭ adi tuan-i tijuan da jaga daya daya-gaji adi bŭkŭn, da nggen man di ngara di jam adi patut.

⁴⁶ Ruai nang bituah-i daya-gaji anŭ kan tuan-i dapŭd ayŭh ndai simŭnŭ di jam-i mari!

⁴⁷ Sawŭ, Aku kidaan di angān, tuan-i re tijuan daya-gaji anŭ da jaga sopŭrŭg buat rata-i.

⁴⁸ Pak kambŭi ayŭh daya-gaji adi arap, ayŭh re nang darŭm asŭng-i ‘Gibayuh inŭh tuan ku mari,’

⁴⁹ ka piguru mukong daya daya-gaji adi bŭkŭn ka man nok ngga bara pimabuk.

⁵⁰ Komŭnŭ tuan mari di andu ka di jam daya-gaji anŭ dŭh puan ayŭh mandŭg.

⁵¹ Tuan anŭ re nŭtŭb ayŭh ka bada ayŭh kinyam nasip daya pingadong. Diginŭ ayŭh re sien buang sangsara.