MATTHEW 23 - Hakcipta - Biatah Bidayuh

Jesus Bakan pasar bara Gurū Ukum-adat Jahudi ngga bara Pharisee

¹ Jadi Jesus minyu di bara daya bagŭ anŭ ka di bara murid-I.

² “Bara gurū Ukum-adat Jahudi ngga bara daya Pharisee inŭh adi dog nyibandar da jadi bara adi tukang kidaan rati Ukum-adat Moses.

³ Jadi angān dŭh siŭn dŭh sita ka tunda sopŭrŭg kayuh adi ngara bada angān ndai; pak dŭhnyah nanya urah ngara, sabab ngara dŭh ndai kayuh adi ngara ngajar.

⁴ Ngara bada daya kabis pinyirabis adi raru bat, pak adŭp ngara biar ndi trinju dŭh gŭh ngara an pakai ngga turung daya kabis pinyirabis anŭ.

⁵ Ngara ndai bagŭ masam kayuh isa daya kiris. Tingga nŭh anak kutak adi brisi ngga ayat ayat pinganang Surat-kudus adi ngara na di arŭ ka di tangan ngara, ka tingga munki masam ramba-i! Ka ngatin gŭh munki masam ambu-i taris taris-abuh di jipo ngara!

⁶ Ngara suka tarun yŭn adi rabis kana di tika gawai samŭn baku baku adi tura ka jawin di ramin simayang-Jahudi;

⁷ ngara suka dog tabi ka dog stabi di arong passar ka suka daya bagan adŭp-i ‘Gurū.’

⁸ Angān dŭh siŭn dog kadŭn ‘Gurū,’ sabab angān mbŭh darŭm ndi rawang ka biyŭn ndi adŭ Gurū.

⁹ Ka angān dŭh siŭn kadŭn tadŭ tadŭ daya di ong ‘Sama,’ sabab angān biyŭn ndi adŭ Sama di shorga.

¹⁰ Dŭh gŭh angān patut dog kadŭn ‘Pinguru,’ sabab Kristus inŭh adi sadi-I ndi naan pinguru ngan.

¹¹ Adi siabo bās dupan angān dŭh siŭn dŭh jadi urun ngan.

¹² Asi asi adi bada adŭp-i bās re dog pirapat, ka asi asi adi pirapat adŭp-i re dog kibās.

Jesus Nunggu Urah Pingadong

¹³ “Mbŭh raru payah inŭh angān, bara gurū Ukum-adat Jahudi, ka angān bara daya Pharisee! Angān pingadong! Angān nagah daya kinyam Pinyipritah Tapa. Dŭh-i angān abah kinyam Pinyipritah Tapa adŭ, pak angān nagah daya adi gruwŭn an kinyam-i. [

¹⁴ Mbŭh raru payah inŭh angān, bara gurū Ukum-adat Jahudi, ka angān bara daya Pharisee! Angān pingadong! Angān nipu bara dayung uban ka sirapas ramin-arŭn ngara, ka komŭnŭ nadar bidua tui di sirung jawin daya! Sabab anŭ ukum ngan re rabis bat!]

¹⁵ “Mbŭh raru paya inŭh angān, bara gurū Ukum-adat Jahudi, ka angān bara daya Pharisee! Angān pingadong! Angān birayar mutas rawŭt ka tambus barang rais ramŭn an pibŭrŭt ndi naan daya ka darŭm adat ngan; ka kan angān mbŭh dapŭd, angān bada ayŭh piduwŭh kari arap mun adŭp ngan yŭn patut dog taran ka apui neraka!

¹⁶ “Mbŭh raru payah inŭh angān, pinguru adi karak! Angān ngajar nang, ‘Kambŭi daya bipayu pakai Ramin Tuhan, ayŭh dŭh dog ngabŭt payu-i anŭ; pak kambŭi ayŭh bipayu pakai mas adi di Ramin Tuhan, ayŭh dog ngabŭt.’

¹⁷ Angān budo buang karak! Aki adi rabis biguna, mas kah Ramin Tuhan adi bada mas kudus?

¹⁸ Angān ngajar gŭh, ‘Kambŭi daya bipayu pakai mija-sambah, ayŭh dŭh dog ngabŭt payu-i anŭ; pak kambŭi ayŭh bipayu pakai pinganggen adi di tunduh mija-sambah, ayŭh dog ngabŭt.’

¹⁹ Mbŭh raru karak inŭh angān! Aki adi rabis biguna, pinganggen kah mija-sambah adi bada pinganggen kudus?

²⁰ Jadi meh, kan daya bipayu pakai mija-sambah, ayŭh bipayu pakai mija-sambah samŭn pinganggen adi di tunduh-i;

²¹ ka kan ayŭh bipayu pakai Ramin Tuhan, ayŭh bipayu pakai-i samŭn Tapa, adi rŭŭ dieh;

²² ka kan daya bipayu pakai shorga, ayŭh bipayu pakai Takta Tapa samŭn Ayŭh adi guru dieh.

²³ “Mbŭh raru payah inŭh angān, bara gurū Ukum-adat, ka angān bara daya Pharisee! Angān pingadong! Angān jugan ka Tapa ndi utung darŭm simŭng so rapah rapah, mun silaseh, adar manis, ka jintan, pak angān dŭh tunda ajar adi biguna darŭm Ukum-adat, mun pinyitŭnggŭn ka pinyirasi ngga atin-tŭnggŭn. Kayuh kayuh ati angān patut ndai, buang dŭhnyah kambŭt adi bŭkŭn.

²⁴ Pinguru adi karak! Angān napis tura so piin nok ngan, pak tŭrŭn onta!

²⁵ “Mbŭh raru payah inŭh angān, bara gurū Ukum-adat Jahudi, ka angān bara daya Pharisee! Angān pingadong! Angān pibisig sapa saker ngga pinggen, pak tura ka darŭm-i mbŭh puno ngga kayuh adi angān dapŭd so pinyiganas ka atin sibut.

²⁶ Daya Pharisee adi karak! Pibisig tura ka darŭm diŭ, ka komŭnŭ tura ka sapa re bisig gŭh!

²⁷ “Mbŭh raru payah inŭh angān, bara gurū Ukum-adat Jahudi, ka angān bara daya Pharisee! Angān pingadong! Angān mbŭh keya ka kubur adi buda ngasad ko dog ngu, adi ramus tura ka sapa-i pak tura ka darŭm-i mbŭh puno ngga dudu turang ka tadang tadang manusia adi madam.

²⁸ Simŭnŭ gŭh angān, tura ka sapa angān tatŭng kana ngga sopŭrŭg daya, pak tura ka darŭm angān mbŭh puno ngga pinyikadong ka dosa.

Jesus Kidaan Ukum Ngara

²⁹ “Mbŭh raru payah inŭh angān, bara gurū Ukum-adat Jahudi, ka angān bara daya Pharisee! Angān pingadong! Angān nakit ndai da ramus kubur kubur bara nabi ka ngabuh batuh batuh-pingingat bara daya adi mbŭh kabŭs adi ko udip sanang;

³⁰ ka angān ko nang kambŭi angān udip di jaman tayung-babuk ngan, angān dŭh ndai kayuh adi ngara ndai bait kah siŭ bara nabi.

³¹ Jadi angān taŭn mbŭh ngaku adŭp ngan bara sesang ngara adi ko siŭ bara nabi!

³² Pijuu meh garang, ka ngamas kayuh adi tayung-babuk ngan ko piguru ndai.

³³ Angān jippŭh ka bara anak jippŭh! Simuki meh angān re pirupas adŭp ngan so dog taran ka apui neraka?

³⁴ Ka Aku meh kidaan di angān, Aku re pait ka angān nabi ngga daya adi bijak ka gurū; angān re siŭ kada so ngara, masak di rigang adi bŭkŭn, ka madŭs adi bŭkŭn di ramin simayang-Jahudi ka tadak ngara so kupo ndi ndŭg kupo andi.

³⁵ Ngapŭi meh, Tapa re ngukum angān amai bara daya adi dŭh sarah ko dog siŭ, so Abel adi dŭh sarah ndŭg Zechariah anak Berechiah, adi angān siŭ di asah Ramin Tuhan ngga mija-sambah.

³⁶ Aku kidaan di angān ngga sawŭ-i: ukum, amai sopŭrŭg pinyiŭ anŭ, re nyatŭk daya di jaman ati!

Pinyirindu Jesus di Jerusalem

³⁷ “Jerusalem, Jerusalem! Kuu siŭ bara nabi ka manjan ngga batŭh bara pinyisung adi Tapa pait ka kuu! Pikudu kari Aku raan dakŭp sopŭrŭg daya mu, nimun sindŭ siok nguruk anak anak-i di ribo urad-i, pak daya daya mu abah!

³⁸ Ngapŭi meh Ramin Tuhan mu re dog tagan ka engan.

³⁹ So madin, Aku kidaan di kuu, kuu re dŭh tia kiris Aku ndŭg ka kuu nang, ‘Tapa nyiberkat Ayŭh adi mandŭg ngga adŭn Tuhan.’ ”