MATTHEW 22 - Hakcipta - Biatah Bidayuh

Upama Gawai Sawan

¹ Jesus dinge pakai upama ngga minyu di bara daya.

² “Kan Tapa mritah, kayuh agi keya ka di upama ati. Agi ndi sidah ndi naan raja sidia gawai sawan yŭn anak-i.

³ Ayŭh pait daya gaji-i da kidaan di bara adi ko dog bagan da mandŭg ka gawai anŭ, pak ngara dŭh an mandŭg.

⁴ Jadi ayŭh pait daya daya-gaji adi bŭkŭn ngga pinganang sakati: ‘Gawai ku mbŭh sidia madin; dari dari sapi ngga anak anak sapi ku mbŭh dog simareh, ka sopŭrŭg kayuh mbŭh sidia. Mandŭg meh ka gawai sawan!’

⁵ Pak bara adi dog bagan dŭh piduri ka ndai kraja adŭp ngara: ndi naan di ka teya-i, sianŭ ndi di ka kade-i,

⁶ atan adi bŭkŭn nakap daya daya-gaji anŭ, mukong ngara, ka siŭ ngara.

⁷ Raja anŭ mbŭh raru baji; jadi ayŭh pait soldadu-i da siŭ bara pinyiŭ anŭ ka sigot kupo ngara.

⁸ Komŭnŭ ayŭh bagan bara daya gaji-i ka nang di ngara, ‘Gawai sawan mbŭh sidia, pak bara daya adi aku ko bagan dŭh bia mandŭg.

⁹ Kiang angān di ka arong aran aran passar ka bagan ka gawai sawan ati sikiang daya angān tungang dapŭd.’

¹⁰ Jadi daya daya-gaji anŭ di ka aran aran passar ka bagan sopŭrŭg daya ngara tungang dapŭd, adi kana ngga adi arap; ka tibande birit gawai sawan anŭ mbŭh puno da daya.

¹¹ “Raja di tingga bara pingabang ka kiris ndi naan daya dŭh nēn piraka gawai sawan.

¹² ‘Dingan, simuki kuu tungang mŭrŭt kamati dŭh nēn piraka gawai sawan?’ raja nang di ayŭh. Pak daya anŭ pirŭŭ adŭp-i.

¹³ Nganŭ raja kidaan di daya daya gaji-i, ‘Mŭŭng ayŭh, kaja tangan-i, ka taran ayŭh ka sapa ka yŭn karŭm. Diginŭ ayŭh re sien buang sangsara.’ ”

¹⁴ Ka Jesus meh nang, “Bagŭ dog bagan, pak nisŭ dog mien.”

Pinyiken pasar Bayar Suke

¹⁵ Bara daya Pharisee bu ka bisatur munki ngara re tungang kudog Ayŭh ngga pinyiken.

¹⁶ Komŭnŭ ngara pait ka yŭn-I kada so bara pinunda ngara samŭn kada daya so tibaran daya Herod. “Gurū,” ngara nang, “Kieh puan Kaam kidaan kayuh adi sawŭ. Kaam ngajar kayuh adi sawŭ pasar pinyiraan Tapa yŭn manusia, dŭh kira ani nang daya, sabab Kaam dŭh piduri pangkat daya.

¹⁷ Kidaan di kieh, garang, ani di pikir Mai? Miranggar Ukum-adat ta kah dŭh nŭŭh bayar suke ka Caesar?”

¹⁸ Jesus, taŭn-I puan akar arap ngara, ka-I nang, “Angān pingadong! Mani angān suba an kudog Aku?

¹⁹ Kiren di Aku kiping duit adi ngga bayar suke!” Ngara taban ka yŭn-I ndi kiping duit,

²⁰ ka-I siken ngara, “Raŭn asi ka dŭn asi ati?”

²¹ “Caesar,” ngara nam. Jadi Jesus nang di ngara, “Amai simŭnŭ, nggen di Caesar kayuh adi Caesar dapu, ka nggen di Tapa kayuh adi Tapa dapu.”

²² Kan ngara dingah sakanŭ, ngara mbŭh inga inga; ka ngara bu tingge Ayŭh.

Pinyiken Pasar Pinyimakat so Kabŭs

²³ Di andu anŭ gŭh kada daya Sadducee mandŭg tudu Jesus; ngara dŭh sabah daya re makat so kabŭs.

²⁴ “Gurū,” ngara nang, “Moses nang kambŭi daya adi dŭh biyŭn anak kabŭs, jurud-i dŭh siŭn dŭh tambit uban-i ndu sawŭn isa ngara biyŭn anak adi bisa dog nyirundeng anak sianŭ adi mbŭh kabŭs.

²⁵ Agi ndi sidah, ju madis bijurud adi ko rŭŭ digiti. Adi pinuai sawan ka kabŭs buang dŭh biyŭn anak, jadi ayŭh tingge uban-i di sude-i.

²⁶ Simŭnŭ gŭh kayuh di jurud adi numbor duwŭh, di sianŭ adi numbor taruh, ka sikasŭn-i di sopŭrŭg ngara adi ju madis.

²⁷ Sikasŭn-i, adŭp dayung anŭ kabŭs gŭh.

²⁸ Jadi meh, di andu adi ngga daya kabŭs makat so kabŭs, sawŭn asi ayŭh re? Sopŭrŭg ngara ko tambit ayŭh ndu sawŭn.”

²⁹ Jesus nam ngara, “Mbŭh raru sarah angān! Angān mun anŭ sabab angān dŭh puan Surat-kudus ngga kuasa Tapa.

³⁰ Amai kan daya adi mbŭh kabŭs makat udip bauh, ngara re mun malaikat malaikat di shorga, dŭh sawan.

³¹ Jadi jeja ka daya adi mbŭh kabŭs makat udip bauh: bŭn kah angān basa kayuh adi Tapa ko kidaan di angān? Ayŭh nang,

³² ‘Aku ati Tapa Abraham, Tapa Isaac, ka Tapa Jacob.’ Ayŭh inŭh Tapa daya adi udip, dŭh-I Tapa daya adi kabŭs.”

³³ Kan bara daya bagŭ dingah sakanŭ, ngara mbŭh inga inga di ajar-I.

Pinyipesan Adi Bās

³⁴ Kan daya Pharisee dingah Jesus pirŭŭ daya Sadducee, ngara tikuruk,

³⁵ ka ndi so ngara, gurū Ukum-adat, suba an kudog Ayŭh ngga pinyiken.

³⁶ “Gurū,” ayŭh siken, “aki ndi Pinyipesan adi siabo bās darŭm Ukum-adat?”

³⁷ Jesus nam, “ ‘Rindu Tuhan adi Tapa mu ngga siabo atin mu, ngga siabo asŭng mu, ka ngga siabo pikir mu.’

³⁸ Ati inŭh Pinyipesan adi siabo bās ka adi raru biguna.

³⁹ Adi numbor duwŭh siabo biguna agi sak anŭ gŭh: ‘Rindu dingan mu nimun kuu rindu adŭp mu.’

⁴⁰ Ukum-adat Moses ngga ajar bara nabi bisangan di duwŭh Pinyipesan ati.”

Pinyiken Pasar Kristus

⁴¹ Kan kada daya Pharisee tikuruk, Jesus siken ngara,

⁴² “Ani pikir ngan pasar Kristus? Sesang asi Ayŭh?” “Ayŭh inŭh sesang David,” ngara nam.

⁴³ “Mani, garang,” Jesus siken, “Roh Kudus nguasa David da bagan Ayŭh ‘Tuhan’? David nang,

⁴⁴ ‘Tuhan nang di Tuhan ku: Guru digiti tura ka tauh Ku ndŭg ka Aku mbŭh na pinganyu Mu di ribo kaja Mu.’

⁴⁵ Kambŭi David bagan Ayŭh ‘Tuhan,’ simuki meh garang Kristus bisa jadi sesang David?”

⁴⁶ Mating daya tungang nggen pinyinam di Jesus, ka so andu anŭ mating daya birani nggen pinyiken di Ayŭh tia.