MATTHEW 21 - Hakcipta - Biatah Bidayuh

Jesus Mŭrŭt Jerusalem ngga Bragah

¹ Darŭm Jesus ngga bara murid-I panu nuju Jerusalem, ngara mandŭg ka Bethphage di Sandah Kanā. So nŭ Jesus pait duwŭh naan murid-I da panu diŭ

² ngga pinganang sakati: “Di ka anak kupo ajeh adi di jawin ngan, ka diginŭ angān re rasu dapŭd kaldi dog nyirunggo ngapid anak-i. Kuka sirunggo-i ka taban soduwŭh-i ka Aku.

³ Ka kambŭi agi daya nang ani ani, kidaan di ayŭh, ‘Tuhan biguna dieh’; ka nganŭ ayŭh re bada angān taban soduwŭh-i.”

⁴ Ayŭh simŭnŭ ngga bada bitŭtŭk kayuh adi nabi ko nang:

⁵ “Kidaan di Kupo Zion, Tingga, Raja mu mandŭg ka kuu! Ayŭh pirapat adŭp-I ka nunggang kaldi ngga anak kaldi.”

⁶ Jadi murid murid anŭ di ka ndai kayuh adi Jesus bada ngara ndai:

⁷ ngara taban kaldi ngga anak-i, na jipo ngara di tunduh soduwŭh-i, ka Jesus maad ka tunduh-i.

⁸ Bara daya bagŭ mamad jipo ngara di aran atan adi bŭkŭn di kapŭg daan daan kayuh ka tipan-i di aran.

⁹ Bara daya bagŭ adi panu di jawin Jesus ngga adi panu di punok piguru nyirais nang, “Puji ka Anak David! Tapa nyiberkat Ayŭh adi mandŭg ngga adŭn Tuhan! Puji ka Tapa!”

¹⁰ Kan Jesus mŭrŭt Jerusalem, sopŭrŭg daya di kupo anŭ guga. “Asi daya anŭ?” ngara siken.

¹¹ “Ayŭh anŭ Jesus, nabi so Nazareth di Galilee,” bara daya nam.

Jesus Di ka Ramin Tuhan

¹² Jesus di mŭrŭt Ramin Tuhan ka pibu sopŭrŭg daya adi bijua ka adi miris kayuh diginŭ. Ayŭh kureb mija mija ngara adi tukang nyambi duit samŭn baku baku ngara adi jua manuk asang,

¹³ ka-I nang di ngara, “Mbŭh dog nuris di Surat-kudus Tapa nang, ‘Ramin-Ku re dog kadŭn ramin simayang.’ Pak angān bada-i jadi tarun yŭn pirupak bisukan!”

¹⁴ Daya adi karak ngga adi kipang mandŭg tudu Ayŭh di Ramin Tuhan, ka Ayŭh pibua ngara.

¹⁵ Pingubak pingubak imam ngga gurū gurū Ukum-adat Jahudi jadi baji kan ngara kiris pingandai bās-I ka bara anak-anya nyirais darŭm Ramin Tuhan nang, “Puji ka Anak David!”

¹⁶ Jadi ngara siken Jesus, “Dingah Mu kah kayuh nang ngara?” “Taŭn Ku dingah,” nam Jesus. “Mating kah angān basa pinganang Surat-kudus ati? ‘Angān mbŭh ngajar anak-anya ngga sipira da jugan puji adi sukup kana.’ ”

¹⁷ Jesus bu tingge ngara ka ruah so kupo di ka Bethany, di yŭn-I nyirŭmŭn.

Jesus Mangu Tŭngŭn Ara

¹⁸ Darŭm-I panu pari ka kupo awar isan isan andu jawa ndi, Jesus sibŭrŭk.

¹⁹ Ayŭh kiris ndi tŭngŭn ara di bŭngŭn aran ka di tudu-i, pak mating buwa dieh adŭ-i dudu dawŭn. Jadi Ayŭh nang di tŭngŭn ara anŭ, “Kuu dŭh re tia buān!” Di jam anŭ gŭh tŭngŭn ara anŭ rayu.

²⁰ Bara murid kiris ka mbŭh inga inga. “Simuki tŭngŭn ara anŭ rikas raru rayu?” ngara siken.

²¹ Jesus nam, “Puan meh, kambŭi angān batur batur sabah di Tapa, angān re tungang ndai kayuh adi Aku ndai di tŭngŭn ara ati. Ka dŭh-i anŭ adŭ, pak angān re rabis tungang nang di sandah ati, ‘Makat ka taran adŭp mu ka rawŭt,’ ka-i re sawŭ taran adŭp-i.

²² Kan angān bidua ka sabah Tapa re ndai nanyam pimite ngan, Tapa taŭn re ndai-i.”

Pinyiken pasar ani Hak Jesus

²³ Jesus pari ka Ramin Tuhan; ka darŭm Ayŭh ngajar, pingubak pingubak imam ngga bara nyamba bangsa Jahudi mandŭg tudu Ayŭh ka siken, “Ani hak Mu ndai kayuh kayuh ati? Asi nggen di Kuu hak ngga ndai-i?”

²⁴ Jesus nam ngara, “Aku an siken di angān ndi pinyiken, ka kambŭi angān nggen di Aku pinyinam ngan, Aku re kidaan di angān ani hak Ku ndai kayuh kayuh ati.

²⁵ So ki hak John baptisa daya: so Tapa kah so manusia?” Ngara piguru bikarit dupan adŭp-i, “Ani re ta nang? Kambŭi ata nang, ‘So Tapa,’ Ayŭh re nang di ata, ‘Mani meh, garang, angān dŭh sabah John?’

²⁶ Pak kambŭi ata nang, ‘So manusia,’ ata taru ani re daya ndai, sabab ngara sopŭrŭg mbŭh tatu sabah nang John inŭh nabi.”

²⁷ Jadi ngara nam Jesus, “Kieh dŭh puan.” Ka-I nang di ngara, “Dŭh gŭh Aku re kidaan di angān ani hak Ku ndai kayuh kayuh ati.

Upama Duwŭh naan Anak Dari

²⁸ “Ani di pikir ngan? Agi ndi sidah, ndi naan daya adi biyŭn duwŭh madis anak dari. Ayŭh tudu sianŭ adi pinuai ka nang, ‘Nak, di nyiraja di teya anggor andu ati.’

²⁹ ‘Abah ku,’ ayŭh nam, pak ripas anŭ ayŭh nukar pikir-i ka matak.

³⁰ Komŭnŭ sama anŭ tudu anak-i anŭ ndi ka nang sakanŭ gŭh. ‘Sa-i, ma,’ ayŭh nam, pak ayŭh dŭh di.

³¹ Aki ndi so ngara duwŭh adi ndai pinyibada sama-i?” “Adi pinuai,” ngara nam. Jadi Jesus nang di ngara, “Aku kidaan di angān: daya pinsuke ngga dayung sundar re kinyam Pinyipritah Tapa rabis diŭ so angān.

³² Amai John Pembaptisa ko mandŭg ka angān, kiren di angān aran adi batur, ka angān dŭh an sabah ayŭh; pak daya pinsuke ngga dayung sundar sabah ayŭh. Adŭp ngan kiris ngara ndai simŭnŭ, dŭh gŭh angān ripas anŭ ngubah pikir ngan ka sabah ayŭh.

Upama Pinyewa Teya di Teya Anggor

³³ “Dingah upama ati ndi dinge,” Jesus nang. “Agi ndi sidah, daya adi dapu tana ndai teya anggor, muwang-i, kareh rubang yŭn mŭ anggor, ka pijog sirangga. Komŭnŭ ayŭh nyewa teya anggor anŭ di pinyewa teya ka adŭp-i di nami.

³⁴ Kan-i mbŭh tika adi ngga daya sun buwa anggor, ayŭh pait urun urun-i ka yŭn bara pinyewa teya an kambat jangi utung so buwa buwa adi dog sun.

³⁵ Bara pinyewa teya anŭ nakap urun urun-i, mukong ndi naan, siŭ sianŭ ndi, ka manjan ngga batuh adi bŭkŭn.

³⁶ Daya anŭ pait dinge urun urun adi bŭkŭn, rabis bagŭ so ngara adi diŭ, ka bara pinyewa teya ndai simŭnŭ gŭh di tunduh ngara.

³⁷ Sikasŭn-i ayŭh pait anak adŭp-i ka ngara. ‘Tatu ngara re stabi di anak ku,’ ayŭh nang.

³⁸ Pak kan bara pinyewa teya kiris anak-i anŭ, ngara nang dupan adŭp-i, ‘Siati inŭh anak daya adi dapu teya anggor. Ja, ata siŭ ayŭh, ka tambit rata-i!’

³⁹ Jadi ngara nakap ayŭh, taran ayŭh ka sapa teya anggor, ka siŭ ayŭh.

⁴⁰ “Jadi kan daya adi dapu teya anggor anŭ mandŭg, ani re-i ndai di bara pinyewa teya anŭ?” Jesus siken.

⁴¹ “Ayŭh manŭn re siŭ bara adi ginaka anŭ,” ngara nam, “ka nyewa teya anggor anŭ di pinyewa teya adi bŭkŭn, adi re nggen jangi utung so buwa buwa adi dog sun di tipuh sun buwa.”

⁴² Jesus nang di ngara, “Mating kah angān basa kayuh adi nang Surat-kudus? ‘Batuh adi tukang ramin taran mbŭh jadi anŭ adi siabo biguna. Ati mbŭh pingandai Tuhan; mbŭh raru sangŭn-i di batŭh ta!’

⁴³ Jesus nang dinge, “Puan meh! Hak kinyam Pinyipritah Tapa re dog tambit so angān, ka dog nggen di daya adi piruah buwa nanyam ka pinyiraan Tapa.” [

⁴⁴ Asi asi adi rabu di tunduh batuh anŭ re asur; ka kambŭi batuh anŭ rabu nyatŭk daya, daya anŭ re randŭk jadi dabu.]

⁴⁵ Pingubak pingubak imam ngga bara daya Pharisee dingah upama Jesus ka puan Ayŭh minyu pasar ngara,

⁴⁶ jadi ngara suba an nakap Ayŭh. Pak ngara taru bara daya bagŭ, adi mbŭh nyirundeng Jesus nabi.