MATTHEW 20 - Hakcipta - Biatah Bidayuh

Bara Kuri di Teya Anggor

¹ “Kan Tapa mritah kayuh agi keya ka di upama ati. Agi ndi sidah, ndi naan daya matak awar isan isan di jiroh daya da bikuri di teya anggor-i.

² Ayŭh situju re nggen gaji ngara nanyam adi biasa, anŭ inŭh ndi kiping duit pirak ndi andu, ka bada ngara matak di nyiraja di teya anggor-i.

³ Ayŭh di dinge ka arong passar ngga arong pukor prii ka kiris kada daya mijog paya,

⁴ jadi ayŭh nang di ngara, ‘Angān gŭh matak di nyiraja di teya anggor ku, ka aku re bayar angān nanyam patut.’

⁵ Jadi ngara matak. Komŭnŭ pukor simŭng-duwŭh ka dinge pukor taruh ayŭh ndai simŭnŭ.

⁶ Nganŭ mbŭh sindŭk pukor rimŭh kan ayŭh di ka arong passar ka kiris kada daya dinge babŭ agi mijog diginŭ. ‘Mani angān taran andu digiti mating kayuh ndai?’ ayŭh siken ngara.

⁷ ‘Daya mating nggen kraja di kieh,’ ngara nam. ‘Kambŭi sakanŭ, angān di matak di nyiraja di teya anggor ku,’ ayŭh nang di ngara.

⁸ “Kan-i mbŭh singumi andu, daya adi dapu teya nang di mandor-i, ‘Bagan bara adi nyiraja ka nggen gaji ngara, piguru so ngara adi sikasŭn dog bada nyiraja ndŭg ngara adi sibungas raya dog bada nyiraja.’

⁹ Ngara adi piguru nyiraja pukor rimŭh dog bayar ndi kiping duit pirak ndi naan.

¹⁰ Jadi kan ngara adi diŭ dog bada nyiraja mandŭg re trima tung ngara, ngara pikir adŭp-i re dapŭd bagŭ; pak ngara gŭh dog nggen ndi kiping duit pirak ndi naan.

¹¹ Ngara tambit duit-i ka piguru mingungut di daya adi dapu teya anggor.

¹² ‘Ngara anŭ adi sikasŭn dog bada nyiraja batur-i nyiraja ndi jam adŭ,’ ngara nang, ‘darŭm kieh mbŭh ndi andu andu nyiraja di sura, pak gŭt-i kaam nggen gaji ngara brinyam ngga jami!’

¹³ ‘Dingan, dingah ati,’ daya adi dapu teya nam ndi naan so ngara, ‘Aku dŭh nipu kuu. Adŭp mu mbŭh situju an nyiraja ndi andu yŭn ndi kiping duit pirak.

¹⁴ Tambit gaji mu ka maad. Aku raan nggen di daya anŭ adi sikasŭn dog bada nyiraja nanyam kiang adi aku nggen di kuu.

¹⁵ Dŭh kah aku biyŭn hak ndai ani ani aku raan ngga duit adŭp ku? Mani, kuu sina kah amai aku dŭh sibut?’ ”

¹⁶ Ka Jesus meh nang, “Jadi ngara adi sikasŭn re jadi diŭ, ka ngara adi diŭ re jadi sikasŭn.”

Adi Pitaruh Saba Jesus Minyu pasar Pinyikabŭs-I

¹⁷ Darŭm Jesus panu nuju Jerusalem, Ayŭh taban ngara adi simŭng-duwŭh naan murid-I ka bŭngŭn ka minyu ngga ngara sadi adŭp ngara, darŭm ngara panu.

¹⁸ “Dingah ati,” Ayŭh nang di ngara, “ata panu nuju Jerusalem, di yŭn Anak Manusia re dog nyerah ka tangan pingubak pingubak imam ka gurū gurū Ukum-adat Jahudi. Ngara re nggen ukum kabŭs di Ayŭh

¹⁹ ka komŭnŭ nyerah Ayŭh ka tangan daya adi dŭh bangsa Jahudi, adi re napat Ayŭh, madŭs Ayŭh, ka masak Ayŭh di atuh rigang; pak taruh andu ripas anŭ Ayŭh re dog pakat udip bauh.”

Pimite Sindŭ

²⁰ Komŭnŭ sawŭn Zebedee mandŭg tudu Jesus ngga duwŭh madis anak-i, mutu ubak-i nura Jesus, ka mite kayuh so Ayŭh.

²¹ “Ani raan mu?” Jesus siken ayŭh. Ayŭh nam, “Bijanji ngga aku Kaam bada ngara duwŭh anak ku ati guru ndi tura ka tauh ndi tura ka bait Mai kan Kaam mbŭh jadi Raja.”

²² “Angān dŭh puan kayuh adi angān mite,” Jesus nang di ngara duwŭh madis. “Bisa kah angān nok so makuk jera-birasa adi Aku re nok?” “Kieh bisa,” ngara nam.

²³ “Angān re sawŭ nok so makuk Ku,” Jesus nang di ngara, “pak Aku dŭh biyŭn hak re mien asi re guru tura ka tauh Ku ngga tura ka bait Ku. Sama Ku mbŭh natu asi ngara anŭ adi re guru diginŭ.”

²⁴ Kan murid adi simŭng naan adi bŭkŭn dingah, ngara jadi baji di ngara duwŭh madis.

²⁵ Jadi Jesus bagan ngara sopŭrŭg da tikuruk ka nang, “Angān puan bara pinguasa bangsa adi dŭh puan Tapa piurun daya-i, ka bara pinguru siraru takan daya-i.

²⁶ Pak dŭh-i patut simŭnŭ di dupan angān. Kambŭi agi so angān raan jadi bās, ayŭh dŭh siŭn dŭh an jadi urun daya;

²⁷ ka kambŭi agi so angān raan jadi diŭ, ayŭh dŭh siŭn dŭh an jadi urun sopŭrŭg ngan.

²⁸ Mun Anak Manusia, adi dŭh mandŭg an jadi tuan, pak di bituan ka nggen asŭng-I ngga nubos bagŭ daya.”

Jesus Pibua Duwŭh Naan Daya Karak

²⁹ Darŭm Jesus ngga bara murid-I bu so Jericho, bara daya bagŭ tunda.

³⁰ Duwŭh naan daya karak adi guru di bŭngŭn aran dingah Jesus panu murah, jadi ngara piguru nyirais, nang, “Anak David! Masi di kieh, Tuan!”

³¹ Bara daya nang ngara ka bada ngara pajam. Pak ngara tanŭ ka bana nyirais, nang, “Anak David! Masi di kieh, Tuan!”

³² Jesus rŭŭ ka bagan ngara. “Ani raan ngan Aku ndai yŭn ngan?” Ayŭh siken ngara.

³³ “Tuan,” ngara nam, “kieh raan kiris tarun!”

³⁴ Jesus masi di ngara ka tama batŭh ngara; jam anŭ gŭh ngara tungang kiris tarun, ka ngara tunda Ayŭh.