MATTHEW 19 - Hakcipta - Biatah Bidayuh

Jesus Ngajar Pasar Bisare

¹ Kan Jesus ko nang sopŭrŭg kayuh anŭ, Ayŭh bu so Galilee di ka tarun tana Judea di pah mandi Yang Jordan.

² Bara-bara daya bagŭ tunda Ayŭh, ka Ayŭh pibua ngara diginŭ.

³ Kada daya Pharisee mandŭg tudu Ayŭh an kudog Ayŭh ngga pinyiken, “Agi kah Ukum-adat ta nyibandar daya taran sawŭn-i ngga tadŭ mun sabab?”

⁴ Jesus nam, “Mating kah angān basa pinganang Surat-kudus adi nang di sibungas-i Tapa napa manusia dari ngga dayung?

⁵ Ka Tapa nang, ‘Amai sabab anŭ inŭh, dari re tingge sindŭ sama-i ka bisindi ngga sawŭn-i, ka ngara duwŭh re jadi ndi.’

⁶ Jadi ngara dŭh re tia duwŭh, pak ndi. Mating daya siŭn nyibarai, meh, kayuh adi Tapa ko tubu.”

⁷ Bara daya Pharisee siken Ayŭh, “Mani meh, garang, Moses nggen ukum-adat adi nyibandar dari taran sawŭn-i atas ayŭh nuris surat sare?”

⁸ Jesus nam, “Moses nggen di angān pinyibandar da taran sawŭn ngan sabab angān mbar dog ngajar. Pak dŭh-i simŭnŭ di sibungas ong dog napa.

⁹ Aku kidaan di angān, daya adi taran sawŭn-i ngga tadŭ mun sabab-i pak dŭh sabab sawŭn-i tanggah, mbŭh tanggah kambŭi ayŭh sawan ngga dayung bŭkŭn.”

¹⁰ Bara murid-I nang di Ayŭh, “Kambŭi simŭnŭ inŭh kayuh di dari ngga di sawŭn-i, mbŭh kana dŭ inŭh nŭŭh dŭhsah sawan.”

¹¹ Jesus nam, “Ajar ati dŭh-i yŭn barang naan daya, pak yŭn ngara adi yŭn Tapa ko nggen-i adŭ.

¹² Amai agi bagŭ masam sabab-i dari dŭh dapŭd sawan: agi adi sabab ngara mbŭh dog biranak mun anŭ; adi bŭkŭn, sabab daya ndai ngara da mun anŭ; ka adi bŭkŭn dŭh sawan sabab an bituan di Tapa. Isa-i ayŭh adi tungang trima ajar ati ndai simŭnŭ.”

Jesus Nyiberkat bara Anak-Sŭ

¹³ Kada daya taban bara anak-sŭ ka yŭn Jesus isa Ayŭh na tangan-I di tunduh ngara ka simayang yŭn ngara, pak bara murid nang ngara.

¹⁴ Jesus nang, “Bada bara anak-sŭ anŭ mandŭg ka Aku ka dŭhnyah kijaman ngara, sabab daya adi keya ka ngara inŭh adi kinyam Pinyipritah Tapa.”

¹⁵ Ayŭh na tangan-I di tunduh ubak bara anak-sŭ anŭ ka nyiberkat ngara, ka komŭnŭ Ayŭh bu.

Dari bujang adi Kaya

¹⁶ Agi ndi sidah, ndi naan daya mandŭg tudu Jesus. “Gurū,” ayŭh nang, “pingandai kana munki patut ku ndai ngga dapŭd udip adi sawŭ adi tan adu adu?”

¹⁷ “Mani kuu siken Aku pasar kayuh adi kana?” nam Jesus. “Agi Ndi naan adŭ adi kana. Sita Pinyipesan Tapa kambŭi kuu raan dapŭd udip adi sawŭ adi tan adu adu.”

¹⁸ “Pinyipesan ani?” ayŭh siken. Jesus nam, “Dŭhnyah siŭ daya; dŭhnyah tanggah; dŭhnyah naku; dŭhnyah nggen taksi kadong pasar tadŭ daya;

¹⁹ stabi di sindŭ sama mu; ka rindu dingan mu nimun kuu rindu adŭp mu.”

²⁰ “Aku mbŭh tunda sopŭrŭg Pinyipesan ati,” bujang dari anŭ nam. “Ani dinge patut ku ndai?”

²¹ Jesus nang di ayŭh, “Kambŭi kuu raan jadi sukup kana, panu di jua sopŭrŭg adi kuu biyŭn ka nggen duit anŭ di daya adi sirata, ka kuu re biyŭn pinyikaya di shorga; komŭnŭ ja, tunda Aku.”

²² Kan bujang dari anŭ dingah sakanŭ, ayŭh bu buang susah, sabab ayŭh taŭn raru kaya.

²³ Jesus meh nang di bara murid-I, “Puan meh, raru mbar-i daya kaya re kinyam Pinyipritah Tapa.

²⁴ Pari Aku nang: mbŭh rabis mbar-i daya kaya kinyam Pinyipritah Tapa so ndi onta mŭrŭt tambus rubang utos.”

²⁵ Kan murid murid dingah anŭ, ngara mbŭh inga inga buang gŭgŭh. “Asi meh garang, re tungang dog nyiramat?” ngara siken.

²⁶ Jesus tirek ngara ka nam, “Kayuh ati dŭh bisa jadi so ka manusia, pak so ka Tapa sopŭrŭg kayuh bisa jadi.”

²⁷ Jadi Peter minyu. “Tingga,” ayŭh nang, “kieh mbŭh tingge sopŭrŭg kayuh ka tunda Kaam. Ani re ami dapŭd?”

²⁸ Jesus nang di ngara, “Sabah meh, kan Anak Manusia guru di takta-I adi bragah darŭm Ong Bauh Tapa, angān adi simŭng-duwŭh naan pinunda Ku re guru gŭh di takta, mritah simŭng-duwŭh tibaran-asar Israel.

²⁹ Ka barang naan daya adi tingge ramin arŭn puan kah jurud dari, puan kah jurud dayung, puan kah sama, puan kah sindŭ, puan kah anak, puan kah ŭmŭh sitagar Aku, re trima siratus rupet kayuh adi ko dog tingge, buang trima udip adi sawŭ adi tan adu adu.

³⁰ Pak bagŭ adi diŭ madin re jadi sikasŭn, ka bagŭ adi sikasŭn madin re jadi diŭ.