MATTHEW 18 - Hakcipta - Biatah Bidayuh

Asi adi Bās Dŭ?

¹ Di jam anŭ bara murid tudu Jesus, siken, “Asi adi siabo bās di dupan bara daya adi kinyam Pinyipritah Tapa?”

² Jadi Jesus bagan ndi naan anak-sŭ da mijog di sirung jawin ngara,

³ ka nang, “Puan meh! Kambŭi angān dŭh ngubah adŭp ngan ka jadi mun anak-sŭ, angān dŭh re kinyam Pinyipritah Tapa.

⁴ Adi siabo bās di dupan ngara adi kinyam Pinyipritah Tapa inŭh sianŭ adi pirapat adŭp-i mun anak-sŭ ati.

⁵ Ka asi asi adi kambat ngga adŭn Ku anak-sŭ mun siati, kambat Aku.

Pinyisuba adi Bada daya Bidosa

⁶ “Kambŭi agi daya bada ndi so bara pinunda Ku adi sŭ ati dŭh tia sabah di Aku, mbŭh kana dŭ inŭh tibande batuh kisar dog mŭŭng di tungo-i ka pirŭnggŭd di rawŭt.

⁷ Mbŭh raru payah inŭh ong ati amai agi dieh kayuh adi bada daya bidosa! Kayuh ati taŭn re siraru agi, pak mbŭh raru payah-i di sianŭ adi nimbur-i!

⁸ “Kambŭi tangan puan kah kaja ngan bada angān bidosa, kapŭg-i ka taran! Kana dŭ inŭh angān udip ngga Tapa kipang puan kah bajang, so angān ngga tangan kaja ngan anŭ dog taran ka darŭm apui neraka.

⁹ Ka kambŭi batŭh ngan bada angān bidosa, tuket-i ka taran! Kana dŭ inŭh angān udip ngga Tapa kambet, so angān ngga duwŭh batŭh ngan dog taran ka darŭm apui neraka.

Upama Biri adi Manyap

¹⁰ “Ingat nŭh, dŭhnyah ngamun tadŭ tadŭ so ngara adi sŭ ati. Malaikat ngara di shorga, Aku kidaan di angān, agi siraru di sirung jawin Sama Ku di shorga. [

¹¹ Amai Anak Manusia mbŭh mandŭg an nyiramat ngara adi manyap.]

¹² “Ani di pikir ngan, re daya ndai adi biyŭn siratus biri ka ndi so-i mbŭh manyap? Ayŭh re tingge anŭ adi prii puru-prii man di bŭngŭn sandah ka matak di jiroh anŭ adi manyap.

¹³ Kan ayŭh mbŭh dapŭd-i, Aku kidaan di angān, ayŭh rabis gaŭn di ndi biri anŭ so di biri adi prii puru-prii adi dŭh manyap.

¹⁴ Simŭnŭ gŭh Sama ngan adi di shorga dŭh raan tadŭ tadŭ so anak-sŭ ati manyap.

Kan Daya Bidosa

¹⁵ “Kambŭi dingan ngan bidosa di tunduh ngan, di ka yŭn-i ka kidaan sarah-i. Ndai simŭnŭ dŭh di sirung jawin daya bagŭ, pak sadi adŭp ngan. Kambŭi ayŭh dingah pinganang mu, kuu mbŭh dapŭd dingan mu anŭ pari ka kuu.

¹⁶ Pak kambŭi ayŭh abah dingah pinganang mu, taban ndi puan kah duwŭh naan daya bŭkŭn, isa ‘sopŭrŭg itong bisa dog natu taksi so baba duwŭh puan kah taruh naan saksi,’ sak adi nang Surat-kudus.

¹⁷ Ka kambŭi ayŭh abah dingah pinganang ngara, kuu bisa kidaan sopŭrŭg-i di eklisia. Sikasŭn-i, kambŭi ayŭh abah dingah pinganang eklisia, bada ayŭh jadi keya ka daya adi dŭh puan Tapa puan kah mun daya pinsuke.

Nagah ngga Nyibandar

¹⁸ “Puan meh, kayuh adi angān nagah di ong re dog nagah di shorga, ka kayuh adi angān nyibandar di ong re dog nyibandar di shorga.

¹⁹ “Puan meh gŭh, kan duwŭh naan angān di ong situju pasar tadŭ tadŭ kayuh adi angān simayang mite, Sama Ku di shorga re ndai-i yŭn ngan.

²⁰ Amai di yŭn duwŭh taruh naan daya mandŭg tikuruk darŭm adŭn Ku, Aku agi diginŭ ngga ngara.”

Upama Daya-Gaji adi dŭh Biyŭn Pingapun

²¹ Komŭnŭ Peter tudu Jesus ka siken, “Tuhan, kambŭi dingan ku adu adu ndai dosa di tunduh ku, pikudu kari aku patut apun ayŭh? Ju kari?”

²² “Dŭh, dŭh ju kari,” nam Jesus, “pak ju puru kari ju,

²³ sabab kan Tapa mritah, kayuh re keya ka simuti: Agi ndi sidah, ndi naan raja adi mbŭh natu adŭp-i an pirasa kira-kira bara daya gaji-i.

²⁴ Ayŭh mbŭh re an piguru kan ndi so ngara dog taban mŭrŭt adi birutang di ayŭh bijuta juta duit.

²⁵ Daya-gaji anŭ dŭh biyŭn sukup duit re ngga bayar utang-i, jadi raja nggen ukum bada ayŭh dog jua nimun urun samŭn sawŭn-i ngga bara anak-i ka sopŭrŭg kayuh adi-i biyŭn, ngga bayar utang-i.

²⁶ Daya-gaji anŭ sidikang di sirung jawin raja. ‘Sabar ngga aku,’ ayŭh mite, ‘ka aku re bayar sopŭrŭg-i!’

²⁷ Raja masi di ayŭh, apun ayŭh ka kambŭt utang-i ka pirupas ayŭh.

²⁸ “Komŭnŭ daya-gaji anŭ ruah ka bidapŭd ngga daya-gaji adi bŭkŭn adi birutang nisŭ duit di ayŭh. Ayŭh nakap ayŭh ka piguru nyiap ayŭh. ‘Bayar kayuh adi kuu ko nginjam so aku!’ ayŭh nang.

²⁹ Daya-gaji anŭ sidikang ka mite masi so ayŭh, ‘Sabar ngga aku, ka aku re bayar pari!’

³⁰ Ayŭh dŭh piduri, pak bada ayŭh dog jer ndŭg ka ayŭh muko bayar utang-i.

³¹ Kan daya-gaji adi bŭkŭn kiris kayuh adi mbŭh jadi, ngara mbŭh raru susah ka di ka yŭn raja ka kidaan sopŭrŭg kayuh anŭ di ayŭh.

³² Jadi ayŭh bagan daya-gaji anŭ da mŭrŭt. ‘Kuu urun adi dŭh biguna!’ ayŭh nang. ‘Aku apun kuu ka kambŭt sopŭrŭg utang mu, amai kuu mite aku ndai simŭnŭ.

³³ Kuu patut biyŭn atin masi di dingan mu adi samah daya-gaji, nimun aku ko masi di kuu.’

³⁴ Raja anŭ mbŭh raru baji, ka ayŭh bada daya-gaji anŭ dog jer yŭn dog ukum ndŭg ka-i mbŭh kubo bayar utang-i.”

³⁵ Ka Jesus nang, “Simŭnŭ inŭh Sama Ku re ngga barang naan angān kambŭi angān dŭh apun dingan ngan so atin ngan.”