MATTHEW 14 - Hakcipta - Biatah Bidayuh

Pinyikabŭs John Pembaptisa

¹ Di tika anŭ Herod, adi mritah Galilee, dingah pasar Jesus.

² “Ayŭh anŭ taŭn sawŭ John Pembaptisa, adi mbŭh pari udip,” ayŭh kidaan di bara soldadu-i. “Anŭ inŭh sabab Ayŭh biyŭn kuasa ngga ndai pingandai-nginga.”

³ Amai Herod ko dawŭ-i nggen ukum bada John dog nakap, dog muak ka dog jer. Ayŭh ndai simŭnŭ sabab Herodias, adi sawŭn jurud-i Philip.

⁴ Amai John Pembaptisa ko ari nyara Herod, nang-i, “Dŭh-i batur kuu tambit Herodias ndu sawŭn!”

⁵ Herod raan siŭ ayŭh, pak taru daya Jahudi, sabab ngara nyirundeng ayŭh nabi.

⁶ Di andu pinyibranak Herod, anak dayung Herodias bitanda di sirung jawin bara pingabang. Herod mbŭh raru munos asŭng-i

⁷ ndŭg ka-i bijanji ngga anak dayung anŭ, “Aku bipayu aku an nggen di kuu tadŭ tadŭ kayuh adi kuu mite!”

⁸ Nunda ka pinyiraan sindŭ-i ayŭh mite, “Nggen di aku digiti madin di pinggen ubak John Pembaptisa!”

⁹ Raja mbŭh raru susah, pak sabab janji adi-i mbŭh ndai di sirung jawin bara pingabang ayŭh nggen ukum nyibandar pimite-i.

¹⁰ Ayŭh pait daya da di kapŭg ubak John di jer.

¹¹ Ubak anŭ dog taban mŭrŭt di pinggen ka dog nggen di anak dayung anŭ, adi tambit-i yŭn sindŭ-i.

¹² Murid murid John mandŭg, tambit tadang-i ka kubur-i; komŭnŭ ngara di kidaan di Jesus.

Jesus Paan Rimŭh Ribu naan Daya

¹³ Kan Jesus dingah agah anŭ pasar John, Ayŭh bu so nŭ pakai arud ka tarun adi pajam sadi adŭp-I. Kan daya dingah, ngara tingge kupo kupo ngara ka tunda Ayŭh so deyŭh.

¹⁴ Jesus ruah so arud, ka kan Ayŭh kiris bara daya bagŭ anŭ, Ayŭh raru masi di ngara, ka pibua sinadan ngara adi birandam.

¹⁵ Singumi andu anŭ bara murid-I tudu Ayŭh ka nang, “Andu mbŭh re karŭm, ka tarun ati inŭh tarun pajam. Bada bara daya ati mari isa ngara miris di anak anak kupo pinguman ngara.”

¹⁶ “Ngara dŭhsah bu,” Jesus nam. “Adŭp ngan nggen di ngara pinguman!”

¹⁷ “Anŭ adi ata biyŭn digiti kaŭs-i rimŭh baru ruti ka duwŭh iken,” ngara nam.

¹⁸ “Taban-i kamati garang,” Jesus nang.

¹⁹ Ayŭh bada daya guru di kupai; komŭnŭ Ayŭh tambit rimŭh baru ruti anŭ samŭn duwŭh iken anŭ, nyigura ka rangit, ka nggen trima kaseh di Tapa. Ayŭh mire ruti anŭ ka nggen-i di bara murid-I, ka bara murid-I nggen-i di daya.

²⁰ Sopŭrŭg daya man ka mbŭh bisoh. Komŭnŭ bara murid nguruk simŭng-duwŭh bakur puno ngga tadŭh pinguman.

²¹ Kiang bara dari adi man agi rimŭh ribu naan, dŭh ngitong bara dayung ngga anak-anya.

Jesus Panu di tunduh Piin

²² Komŭnŭ Jesus bada bara murid mŭrŭt arud ka diŭ di ka pah mandi danu anŭ, atan adŭp-I bada bara daya mari.

²³ Ripas ko bada daya mari, Ayŭh maad sandah sadi adŭp-I di simayang. Kan-i mbŭh karŭm, Jesus mbŭh sadi diginŭ;

²⁴ ka di jam anŭ, arud mbŭh jeh di yun danu, dog girumbang sabab sabak ribut poh maka-i.

²⁵ Di asah pukor taruh ngga pukor nŭm isan isan Jesus mandŭg ka yŭn bara murid, panu di tunduh piin.

²⁶ Kan ngara kiris Ayŭh panu di tunduh piin, ngara taru. “Mindo anŭ!” ngara nang, ka nyirais darŭm tikaran.

²⁷ Jesus rasu minyu ngga ngara. “Nagap yang ngan!” Ayŭh nang. “Aku ati. Dŭhnyah taru!”

²⁸ Jadi Peter minyu, nang-i. “Tuhan, kambŭi anŭ sawŭ Kaam, mritah aku da panu di tunduh piin tudu Kaam.”

²⁹ “Mandŭg kamati!” Jesus nam. Jadi Peter ruah so arud ka piguru panu di tunduh piin tudu Jesus.

³⁰ Pak kan ayŭh kinyam sabak ribut, ayŭh mbŭh taru ka rasu re timŭtŭm di piin. “Tuhan nyiramat aku!” ayŭh nang.

³¹ Jesus rasu nyapai ka digŭng ayŭh ka nang, “Kuu ati paŭh kurang sabah di Aku! Mani kan kuu panu di tunduh piin pinyabah mu bisa miyap?”

³² Ngara duwŭh mŭrŭt arud, ka sabak ribut rŭŭ.

³³ Jadi di arud bara murid nyambah Jesus. “Sawŭ inŭh Kaam Anak Tapa!” ngara nang.

Jesus Pibua Daya Birandam di Gennesaret

³⁴ Ngara mutas danu anŭ ka mandŭg ka deyŭh di Gennesaret,

³⁵ di yŭn daya rasu natŭng Jesus. Jadi ngara bagan bara adi birandam so sopŭrŭg rais adi maning anŭ ka taban ngara ka yŭn Jesus.

³⁶ Ngara mite Ayŭh bada daya adi birandam tama piji ka tŭbŭn jipo-I; ka sopŭrŭg adi tama-i mbŭh bua.