MATTHEW 10 - Hakcipta - Biatah Bidayuh

Simŭng-Duwŭh naan Pinyuruh

¹ Jesus bagan simŭng-duwŭh naan murid-I da tikuruk ka nggen di ngara kuasa ngga pibu roh arap ka pibua barang masam andam udar.

² Ati inŭh dŭn ngara adi simŭng-duwŭh naan pinyuruh: Adi diŭ, Simon (adi dog kadŭn Peter) ngga jurud-i Andrew; James ngga jurud-i John, adi duwŭh madis anak Zebedee;

³ Philip ngga Bartholomew; Thomas ngga Matthew, adi daya pinsuke; James anak Alphaeus, ka Thaddaeus;

⁴ Simon adi Patriotik, ka Judas Iscariot adi jua Jesus.

Kraja Bara Pinyuruh

⁵ Ngara adi simŭng-duwŭh naan anŭ dog pait Jesus ngga pinganang sakati: “Dŭhnyah di ka tarun tana daya adi dŭh bangsa Jahudi puan kah kupo daya Samaria.

⁶ Pak di ka biri adi manyap, anŭ inŭh daya Israel.

⁷ Panu di nyuse, ‘Dŭm dŭh tui Tapa re mritah!’

⁸ Pibua daya adi birandam, pakat daya adi kabŭs, pibua daya adi naman andam kurit adi bisā, ka pibu umot. Angān mbŭh kambat kuasa ati dŭh so angān bayar, jadi ndai meh sopŭrŭg-i dŭh kira bayar.

⁹ Dŭhnyah taban mas, pirak, puan kah duit timaga di krape ngan;

¹⁰ dŭhnyah taban beg di pimanu ngan, puan kah tambah jipo, puan kah kasut, puan kah sikud. Daya adi nyiraja taŭn patut dog nggen kayuh adi-i biguna.

¹¹ “Kan angān ndŭg kupo puan kah anak kupo, jiroh daya adi raan kambat angān, ka rŭŭ ngga ayŭh ndŭg ka angān bu so tarun anŭ.

¹² Kan angān mŭrŭt ramin daya, nang, ‘Damai ka angān.’

¹³ Kambŭi daya di ramin anŭ kambat angān, isa-i tabi damai ngan rŭŭ ngga ngara; pak kambŭi ngara dŭh kambat angān, angān bisa pari tabi ngan.

¹⁴ Ka kambŭi daya puan kah kupo dŭh an kambat angān, puan kah abah dingah angān, bu so nŭ ka gutog dabu so kaja ngan.

¹⁵ Ingat nŭh! Di Andu Bisara Tapa re masi dŭ di daya di kupo Sodom ngga kupo Gomorrah so di daya di kupo anŭ!

Pimandŭg Pinyikisiis

¹⁶ “Dingah ati! Aku pait angān keya ka biri ka ruang kasong tarun. Angān dŭh siŭn dŭh an nakit mun jippŭh ka duduh mun manuk asang.

¹⁷ Ingat, re agi daya an nakap angān ka taban angān ka yŭn bisara, ka re madŭs angān di ramin simayang-Jahudi.

¹⁸ Amai angān murid Ku angān re dog bisara di sirung jawin bara pinguasa ka raja raja, isa angān bisa kidaan Agah kana di ngara ka di daya adi dŭh bangsa Jahudi.

¹⁹ Kan ngara taban angān yŭn dog bisara, dŭhnyah gapang pasar ani re ngan nang, puan kah munki angān nang-i; kan tipuh-i mandŭg, angān re dog nggen kayuh adi re ngan nang.

²⁰ Amai pinganang adi angān piruah dŭh-i re tung jangān; ayŭh re mandŭg so Roh Sama ngan adi minyu so angān.

²¹ “Daya re jua jurud adŭp-i yŭn dog ukum kabŭs, ka bara sama re ndai simŭnŭ di tunduh anak-i; anak re rawan pimas ka bada pimas dog ukum kabŭs.

²² Barang naan daya re tiru di angān sabab angān murid Ku. Pak asi asi adi bijijŭ ndŭg sikasŭn-i re dog nyiramat.

²³ Kan ngara kisiis angān di ndi kupo, bikaduh bu ka kupo bŭkŭn. Puan meh, angān dŭh re ngamas kraja ngan darŭm sopŭrŭg kupo Israel diŭ so Anak Manusia mandŭg.

²⁴ “Mating murid bās dŭ so gurū-i; mating urun bās dŭ so tuan-i.

²⁵ Jadi anak-murid patut munos asŭng-i amai mbŭh brimun ngga gurū-i, ka simŭnŭ gŭh urun amai mbŭh brimun ngga tuan-i. Kambŭi ubak rawang dog kadŭn Beelzebul, bara di rawang anŭ re dog kadŭn ngga dŭn adi rabis arap!

Asi patut dog Taru

²⁶ “Jadi dŭhnyah taru daya. Ani ani adi dog sukan madin re dog kiruwar, ka barang masam rusia re dog puan.

²⁷ Kayuh adi Aku kidaan di angān darŭm karŭm angān dŭh siŭn dŭh an pari nyabŭt-i darŭm jawa sandu, ka kayuh adi angān dingah darŭm bisukan angān dŭh siŭn dŭh an piranggah-i so tibung ramin.

²⁸ Dŭhnyah taru ngara adi siŭ pŭrŭng pak dŭh biyŭn kuasa ngga siŭ simangi; pak taru meh Tapa, adi bisa pirabur pŭrŭng ngga simangi di apui neraka.

²⁹ Ngga ndi sen kuu bisa miris duwŭh manuk piit, pak ndi manuk piit dŭh gŭh rabu ka tana kambŭi dŭh so pinyibada Sama.

³⁰ Ka kuu, sirah ubok mu mbŭh gŭh dog niap.

³¹ Ngapŭi meh dŭhnyah taru; angān mbŭh brega dŭ so manuk piit!

Ngaku ngga Tirawan Jesus

³² “Ngara adi ngaku adŭp-i pinunda Ku di sirung jawin daya bagŭ, Aku re ngaku gŭh ngara di sirung jawin Sama Ku di shorga.

³³ Pak ngara adi tirawan Aku di sirung jawin daya bagŭ, Aku re tirawan gŭh di sirung jawin Sama Ku di Shorga.

Dŭh damai pak Kaii

³⁴ “Dŭhnyah pikir Aku mbŭh mandŭg taban damai ka ong. Dŭh, Aku dŭh mandŭg taban damai, pak kaii.

³⁵ Aku mandŭg isa bara anak dari rawan sama ngara, bara anak dayung rawan sindŭ ngara, iban dayung rawan dinŭh ngara;

³⁶ pinganyu ngan adi siabo arap re so rawang adŭp ngan.

³⁷ “Ngara adi rindu sama-i puan kah sindŭ-i rabis so Aku dŭh inŭh tibirang jadi murid Ku; ngara adi rindu anak dari-i puan kah anak dayung-i rabis so Aku dŭh inŭh tibirang jadi murid Ku.

³⁸ Ngara adi dŭh gŭrŭng rigang-i ka tunda Aku dŭh inŭh tibirang jadi murid Ku.

³⁹ Ngara adi suba an nyiramat asŭng-i re kinanyap-i; pak ngara adi kinanyap asŭng-i amai Aku re dapŭd udip adi sawŭ adi tan adu adu.

Upah yŭn Ngara adi Kambat murid Jesus

⁴⁰ “Asi asi adi kambat angān kambat Aku; ka asi asi adi kambat Aku re kambat sianŭ adi pait Aku.

⁴¹ Asi asi adi kambat pinyisung Tapa sabab ayŭh pinyisung Tapa, re sua dapŭd upah-i. Ka asi asi adi kambat daya adi kana sabab ayŭh daya kana, re sua kambat upah daya adi kana.

⁴² Angān tatu puan nang asi asi adi nggen nok biar-i piin adud di ndi so bara pinunda Ku ati adi siabo sŭ darŭm pangkat-i sabab ayŭh pinunda Ku, re manŭn trima upah-i.”